ده مش تأثير العفاريت ...ده حسد الناس

عم سعيد

كنت زمان بسمع كتير حد يتكلم عن شخص بسيط او طيب قوي كان يعرفه او مازال يعرفه وتعب فجأه ويحكي للناس ازاي الدنيا مالهاش امان وان ممكن الواحد فجأه يلاقي نفسه تعبان والدنيا صعبه قوي حواليه وكنت في العاده بعتبرها قصص لازم نتعظ منها ونعرف ان الدنيا والصحه والمال كلها اشياء زائله وممكن في لحظه كل ده يروح والواحد ميبقاش ليه غير عمله

بس اول مره يحصل قدامي موقف مؤثر زي ده
عم سعيد ده راجل شغال معانا في الشركه سنه مش كبير قوي شخصيه طيبه جدا هو بيشتغل في البوفيه لكن اسلوبه وزوقه واخلاقه تخليك تفتك انه احسن من اجدع مدير عندنا علشان كده طبعا اي وفد اجنبي بيجي الشكره ودول كتير قوي استحاله حد يتعامل معاهم غيره لأنه شيك في لبسه واسلوبه وبيتعامل معاهم كأنه متربي بره مصر غير الناس اللي في البوفيه خالص المهم يعني عم سعيد ابنه الكبير جاب مجموع كبير في ثانوي ودخل كلية هندسه ربنا يوفقه
والحمد لله هو قدر يوضب بيت لنفسه يستقل فيه عن بيت العيله اللي كان عايش فيه وبالتالي اصبح عم سعيد الحمد لله عايش في بيت ملكه لوحده وبأسلوبه في الشغل اخد وضع محترم جدا لدرجة انهم ادوله الرشيف يديره وقلناله اكتر من مره ليه متشتغلش في الرشيف بس وتسيب البوفيه لأن شغل الأرشيف مسؤليه ومن حقك تتفرغ ليه ويبقى برستيج احسن ليك لكنه قال انه شايف انه بيعتبر مرتبه مقابل كل تعبه يعني مينفعش يقلل الشغل اللي بيعمله علشان هيحس انه بياخد فلوس اكتر من حقه طبعا انا كنت هاتشل قدامه

بعد العيد رجعت الشغل لقيته مش موجود قالوا انه واخد اجازه سالت عنه عرفت انه تعبان اتصلت بيه لقيته بيقولي انه تعب جامد في العيد وانه قضى العيد في السرير وفي المستشفى زعلت من نفسي قوي اني مفكرتش اتصل بيه في العيد اسلم عليه وكنت ساعتها هاعرف انه عيان وهازوره مثلا المهم قررت فعلا ازوره وكنت اعرف بيته بالوصف كده طبعا مش هاقولكم ان الفذلكه بتاعتي خلتني الف قد ايه علشان الاقي بيته ولما قابلته اكتشفت انه كان تعبان جدا ولسه مش عارف الأشعه هتبين ايه

والنهارده الشعه ظهرت واتضح ان عنده ورم في المخ

حسيت اني اتصدمت قوي بس انا عارف ان ده ابتلاء من ربنا يعني اكيد ربنا هيعوضه عنه بحاجه تانيه او رحمه من ابتلاء تاني اكبر
عم سعيد راجل طيب قوي حتى وانا بكلمه وعايز احاسب على كلامي قوي معاه لحسن يتخض ولا يفهمني غلط لقيته هو اللي بيهزر ويضحك
ربنا يصبره ويشفيه

انا حبيت احكي للناس وافكر نفسي معاكم ان فعلا مفيش حاجه مضمونه في الدنيا ممكن في لحظه كل حاجه انت شايف انها تحت ايدك وواثق منها ممكن تخونك وتضيع منك فلوسك صحتك اصحابك حتى
ادعوا لعم سعيد ربنا يشفيه ويرجع بالسلامه

اخر حاجه الناس قالوهاله انه عفريت لمسه مع ان انا شايف ان الحسد هو اللي لمسه

مـــــاااااااااء...مـــااااء...مااء

مـــــاااااااااء...مـــااااء...مااء

هم دول اخر 3 كلمات قالهم فقيد الأسره

العزيز الغالي خروفنا المبجل

قامت قواتنا الجويه والبريه والمبلوله بالهجوم صباح اول ايام العيد بتنفيذ عملية اغتيال الغير مأسوف على شبابه خروفنا الغالي

طبعا كل سنه وانتم طيبين

المجهود كان شاق قوي والخروف قاوم كتير وتعبنا قوي بس الحمد لله قمنا بالتغلب عليه بمساعدة قوى الشعب

بحب العيد قوي وخصوصا العيد الكبير لأنه اكبر طبعا يعني اجازه اطول وافلام ولعب ومتعه اكبر طبعا ده في الغالب بيبقى مجرد خيال عندي لأن العيد الكبير مليان شغل

اول يوم فيه الخروف والمعركه الداميه وبيبقى منظري تحفه وانا غرقان دم وماسك السكاكين والساطور وحاجه تحفه يعني لكن طبعا في نهاية اليوم وبعد انتصارنا على الخروف المزعج بنقعد نتغدى من لحمة اللذيذ ونفتكر حركاته المزعجه وازايي نطحني وضرب عبده ولما عبده اصر يركب عليه ويفطسه والخروف الغلبان بعد ما قعد ضيف عندنا من شهر رمضان وهو باشا ياكل ويشرب ويضربنا كمان بيجيي يوم العيد ونطلع عليه كل ده

افتكرت صدام لما اتكاتروا عليه وضحوا بيه العيد الليي فات علشان ينكدوا على المسلمين

عبط قويي الأمريكان دول ميعرفوش ان الناس خلاص اخدوا على كده اخوانهم بيموتوا كل يوم

في النشره يقولكك نهاركم سعيد وبعدين يرزعنا اخبار موت وحرق واغتصاب المسلمين والعرب كلهم وبعدين في الأخر يقولكك وختاما نتمنى لكم عيدا سعيدا

المهم يعنيي الناس خلاص بقت تسمع وتمصمص شفايفهم مش عارف بيمصمصوا من زعلهم ولا علشان العضمه لسه فيها لحمه تاني وعايزين يخرجوها بالقوه الشافطه الفمويه

العيد في ناس كتير قويي نفسيي اعيد عليهم

ناس عرفتهم طول عمري

وناس عرفتهمم من فتره قريبه جدا لكن معزتهم في قلبي وصلت لدرجه غريبه جدا

بقيت احسهم اخواتي اليي عمري ما قابلتهم في الواقع لكن معزتهم عندي كأنهم اخواتي فعلا

لكن منهم للأسف ناس مش عارف اطولهم واسلم عليهم ومن هنا بقولهم كل سنه وانتم طيبين

وطبعا احب اقول لنور عيني كل سنه وهي طيبه وسبحان الله من سنه بالظبط كانت الدنيا صعبه قوي والمستقبل مجهول تماما ومش عارفين رايحين لفين شوفي دلوقتي بقينا فين

الحمد لله رب العالمين

المشكله دلوقتيي اني عايز اخرج في العيد بس المصيبه اني مش عارف اروح فين الدنيا زحمه قووويي قويي

وانا عايز اروح حته حلوه وشيك و رخيصه ودمها خفيف وجديده وفيها ناس كتير وتكون برده مش زحمه

يعني من الأخر عايز لبن العصفور

مش عارف بقى فكروا معايا ولا تفتكروا اقعد في بيتنا واستنى الغداء وخلاص

عموما كل سنه وكلكم طيبين

سلاااااااااااااااااااااااااااااااام

كنت عايز احط صورتي مع الخروف بس لقيتها عامله زي الأمريكان بعد ما قتلوا صدام فقلت بلاش

في المترو بشوف كتير

في المترو

مواقف كتير بتمر علينا في اماكن عجيبه
مثلا المترو

يوم الجمعه راجع من مشوار جميل ركبت المترو وقعدت على الكرسي اللي بياخد اتنين ده في طرف العربيه فتحت الموبايل علشان ادور على اسم واحد صاحبي علشان ارن عليه طبعا مش هاكلمه خساره فيكوا الخمسين قرش المهم يعني
فجأه لقيت في راس محشوره بين عيني وبين الموبايل بتاعي واضح انه حد مش بس عايز يبص بصة فضول كده لا ده بيقرأ بتمعن ركزت كويس ورجعت بظهري شويه علشان افهم ايه الشعر اللي دخل في عيني ده لقيتها طفله صغيره عمرها حوالي 10 او 12 سنه تقريبا رفعت عينها في عيني وهي بتضحك قوي الأول حسبتها من الأولاد المعاقين يعني وصعبت عليا جدا بس لما رفعت وشها لقيتها بنت عاديه بتضحك ببراءه وفرحه شديده ومبسوطه قوي بألوان الموبايل وسألتني ايه ده قلتها دي نمر اصحابي ردت بسرعه وسألتني فين الصور ؟

زنقت الراجل اللي عامل نايم جنبي وافسحت ليها مكان وقلتلها اقعدي بس جنبي وفتحت الصور علشان تتفرج عليها وكل صوره تتضحك وتسألني مين ده ايه وايه ده!!؟؟

شافت اصحابي و شافت صورة الفرح اللي عندي وشافت الصور كلها
بس فجأه مامتها ندهت عليها علشان تنزل كان نفسي تقعد كمان وافرجها على النغمات اكيد كانت هتضحك عليهم قوي

مش عارف انا اللي انبسطت بيها اكتر ولا هي اللي فرحت اكتر

بس اللي عرفته انها بعد ما نزلت سابت على وشي ابتسامه جميله قوي



يوم السبت اللي فات الصبح كنت برده بركب المترو بس انا كنت لسه على السلم وسامع صوت الباب بيتقفل انا عارفهم تلات رنات وفي التالته بيكون بيقفل الباب جريت علشان الحق حشرت رجلي بين الضرفتين علشان مش يتقفل لقيت اتنين شباب راكبين جوه واحد جه من اليمين والتاني من الشمال وكل واحد شد الناحيه بتاعته ففتحوا الباب ودخلت ولحقت المترو الغريب انهم مش مع بعض ومش متفقين على انهم يقوموا هم قاموا بدون تفكير علشان يساعدوني من غير ما اطلب مع ان في ناس كتير في الموقف ده بتكبر دماغها شكرتهم ودخلت قعدت
بس برده سابوا جوايا ابتسامه وشكر ليهم

من كام يوم كده في المترو مش فاكر امتى ركبت في العربيه التانيه بعد الساعه 6 بتكون مختلطه انما العربيه الأولى بتفضل للستات بس دخلت وقفت فجأه لمحت شلة بنات وصبيان مع بعض تقريبا في معهد او من الجامعه ركبوا مع بعض في عربية الستات البنات شجعت الصبيان انهم يدخلوا معاهم وطبعا هم ما صدقوا في الزيطه انا اتنرفزت قوي ايه التسيب ده هي موافقه تركب معاهم من حقها لكن تركبهم مع الستات التانيه ليه قلت اكيد حد هينزلهم دلوقتي لكن الغريب محدش فتح بقه بكلمه الكل مكبر دماغه قلت لنفسي انا هاحرق دمي ليه
بس وانا نازل فضلت فاكرهم وقرفان منهم جدا مش علشان راكبين مع بعض لكن علشان بيعملوا الغلط كأنه من حقهم
وكأنهم برغم التعليم معندهومش اي مشكله يخالفوا النظام لمجرد التسليه

كتير بيعدي علينا ناس مش هنقابلهم تاني في حياتنا لكن بيسبوا اثر كبير قوي فينا
ناس بنحترمها قوي ونحبهم
وناس بنحتقرها قوي ونكرههم

اتمنى كل واحد يحاول يسيب عند الناس ذكرى حلوه

انت تسألين وانا اجيب

مجموعة اسئله سمعتها كتير قوي بين المخطوبين والمحبين ويمكن برده ناس متجوزين ومحدش يسالني يقولي هم مين

تسأل هي : انت نفسك نخلف ولد ولا بنت وعايز كام واحد وهنسميهم ايه
يرد هو عليها : حبيبتي هناك اربع احتمالات
لو خلفنا بنت هتكون نعمه من ربنا اللي يربي بنته صح يبقى ليه الجنه وفي حديث عن النبي (ص) عن فضل تربية البنات والبنت احن شخص على اهلها لما يكبروا وهي صاحبة امها وحبيبة ودلوعة باباها
لو خلفنا ولد يبقى ربنا رزقنا برجل نعتمد عليه ويساعدنا لما نكبر ويشيل مسؤلية اهله
لو خلفنا ولد وبنت يبقى ربنا اكرمنا بنعمه من عنده
لو ربنا اراد ميكونش عندنا اولاد يبقى الحمد لله انه خلاكي ليا بنتي وانا هكون ابنك وهافضل ارعاكي لحد اخر يوم في عمري وانتي ترعيني لحد اخر يوم في عمري

استريحتي يا ستي تسكت قليلا ثم تسأله
حبيبي هو انت ممكن في يوم من الأيام تتجوز عليا واحده تانيه
يرد في هدوء عزيزتي ايه الأفكار دي بس اولا فكرة الزوجه التانيه دي صحيح انها حلال بشرع الله لكن ليها شروط صعبه قوي واللي يخالف الشروط دي او ميقدرش ينفذها يبقى ميحاولش يحط نفسه في الوضع ده اصلا لكن ده بالنسبه للشرع والمجتمع اما انا عن نفسي حبيبتي لا اظن اني ممكن يوم تكون في انسانه تانيه غيرك تحمل اسمي انسانه احكي امامها ادق اسراري انسانه اشتهيها لما اشوفها انسانه اشوف كلمة بحبك في عيونها من غير حتى ما تنطقها انسانه عارفه انا امتى سعيد وامتى حزين ايه بيسعدني وايه بيضايقني انسانه استحملت المشاكل ي كلها معايا وعمرها ما زهقت او ملت مني يعني من الأخر مفيش مجنون بيغلط ويخش القفص مرتين الا اذا كان مجنون فعلا وعلى رأي المثل جوز الأتنين يا قادر يا فاجر

خلاص بقى هديتي كده

حبيبي سؤال كمان معلش
قولي يا مغلباني
هو انت ممكن بعد فتره تزهق مني وتتعود عليا فتحس انك زهقت من حياتنا
يا ساتر على الأفكار السوده
لا يا ستي عارفه الناس اللي بتشوفيهم متجوزين ويقولك اصلنا خلاص زهقنا من بعض واتعودنا على بعض الغريب انهم مش ناس معينه في سن معين علشان الواحد يقول اصل العمر الإفتراضي للزواج هو مثلا كذا سنه لا انما تلاقي ناس بعد سنه واحده جواز يقولك انا زهقت يا عم عايز اخرج مع اصحابي عايز اعيش شويه بقى زهقت من خنقة البيت وتلاقي واحد مثلا بعد عشر سنين بدذأ يقول الكلام ده وواحد تاني بقاله 25 سنه متجوز وبدأ يقول الكلام ده وواحد تاني احفاده بتتنطط حواليه وبدأ يقول الكلام ده وواحد تاني بس قليل شويه احفاده قربوا يتجوزوا وهو عايش مع زوجته اخر انسجام
طيب ايه بقى الفرق بينهم الفرق يا حبيبتي ان كل واحد منهم اتجوز لمجموعه من الأسباب والأمال كان عايزها من الجواز وطبعا بمجرد ان المجموعه دي يتحصل عليها كلها بيزهق ويمل مثلا واحد كل اللي عايزه من الجواز انه يشوف واحده ست ويتكلم معاها ويعاشرها معاشرة الأزواج فطبعا متعه الجنس متعه كبيره لكن بعد مره واتنين وتلاته وعشره وعشرين مره كمان خلاص هو جرب كل حاجه وشاف كل اللي كان عايزه فخلاص بقى البيت سجن والزوجه ممله لأنها خلاص معندهاش جديد تقدمه وواحد تاني بيدور على الأستقرار بعد الصياعه فطبعا بمجرد الخلفه والبيت والمسؤليه وينبسط شويه بإحساس الأستقرار بيلاقي ان الأستقرار مرتبط بيه المسؤليه وهو اصلا مش متعود عليها خلاص بيزهق من الإستقرار والمسؤليه ويقولك يغور الجواز وسنينه واحد تاني بقى بيتجوز علشان مش عايز يحس بالوحده فبيدور على انسانه تشاركه حياته وميحسش انه لوحده ويتيم في الدنيا وطبعا بعد عشره او خمستاشر سنه العيال كبرت ومنهم اللي بقى صاحبه او بنته بقت قريبه منه قوي وسرها معاه فخلاص الزوجه اصبحت مش مهمه قوي لأن في حد تاني بيشاركه الحوار وبيونسه ويمكن ساعات الأولاد بيكونوا لى قدر من التعليم او الثقافه اكبر من امهم بالتالي بيرتاح معاهم اكتر فبيزهق منها وغيره وغيره كل واحد عايز حاجه معينه وبيدور عليها في الزواج وكل ما تكون الحاجه اقوى وادوم كل ما حياتهم تكون عمرها اطول واسعد
اما انا عن نفسي يا حبيبتي اخترتك لأسباب يطول شرحها اسبابي كتير قوي وحتى عندما تنضب اسبابي اللي اخترتك علشانها عملت حسابي واخترتك زوجه ذكيه عقلك دايما بيدور على سعادتنا وافكار تنشطي بيها حياتنا يعني عمري ما هازهق منك ابدا

طيب افرض مثلا اني كنت مش جميله وكان شكلي زي البنات زمايلنا اللي كنت بتتريق على انهم مش حلوين قوي

يا لهوي يا حبيبتي اكيد مكنتش هاتجوزك اصلا ولا هاعبرك
ايه؟؟؟؟؟؟؟؟؟؟؟
خلاص يا ستي بضحك معاكي
اولا يا حبيبتي انا عارف ان عمري ما كنت هاشوفك مش جميله لأني بشوفك بعين الحب مش بعين النقد يعني كل ما فيكي جمال بشوفه لو كان فيه تراب على وشك من الطريق تفتكري هاقول ايه ده دي مش حلوه لأ هاشوف ان التراب اصبح من التبر الذهبي علشان بس اختلط بملامحك يعني جمالك نابع من حبي ليكي مش حبيتك علشان جمالك
ده طبعا غير كل نظرات الحسد في عيون الناس اني اتجوزت قمر زيك

ممكن اطلب حاجه
اطلبي يا ستي
ممكن اقدر اقولك كل حاجه وعمري ما احس اني انكسف اقولك على حاجه وميكونش عندي مشكله اني احكيلك اي موقف مهما كان
يا ستي ما انتي عماله تقولي كل حاجه اهو هو انتي بتسكتي ابدا
ما علينا عامة يعني الصراحه بين الزوجين هي اهم اساس لأي علاقه قويه

سؤال اخير
هو انت ممكن تخوني

.................................
سكت ليه ؟؟!!

تفتكروا هو سكت ليه هنعرف في البوست الجاي
سلااااااااااااااااااااااام

النهارده فرحي يا جدعان

الشنكوتي عملها ولبس الدبله يا رجاله

اخيرا وبعد انتظار سنتين
بعد ما كنت مرت علينا لحظات حسيت اني بحارب طواحين الهواء زي الراجل اللي بيقولوا عنه ده
الحمد لله من عند ربنا كده المشاكل انكشحت شويه والدنيا سلكت كده فجأه وهوب لقيت نفسي بلبس الدبل يوم الجمعه 26اكتوبر اللي فات الحمد لله

انا قبل ما اجكي عن جو الفرح واللي حصل فيه حبيت بس اقول للناس واوضح للكل ان الموضوع مجاش بالساهل كده
لأن مفيش حاجه حلوه في الدنيا بتيجي سهله علشان بس الناس اللي عمالين يتكلموا عن الظروف والمشاكل ومش عارف ايه ويقولك خلاص مفيش فايده وزمن الحب والتضحيات انتهى
وتلاقي كل واحد منهم عمال يكلمك عن ان هو عمل الصح لما انهى علاقة الحب بتاعته علشان ميعطلهاش ويوقف عمرها على ظروفه
وهي برده تعمل فيها شهيده وهوب تسيبه وتقوله انا بعفيك من المسؤليه وبعفيك من التزامك ناحيتي لو هسببلك مشاكل

حرام عليكم هو انتم بتحسبوا ان الحياه كلها ورد وياسمين
الدنيا مليانه مشاكل هتقابلكم في حياتكم ولازم تتعودوا تتحدوها وتتغلبوا عليها
ولا انت وهي لما كنتم بتقولوا لبعض انا مستعد اواجه الموت علشانك يا سحر تقله وانا كمان يا وائل كنتم فاكرين الموت بتاع الكارتون يعني والتحدي الأكبر هو علبة الكانز اللي هتفتحهالها بنفسك يا سبع البرمبه
الدنيا مليانه مشاكل حقيقيه هتواجهكوا و-ملحوظه سحر ووائل دول بتوع مسرحية ريا وسكينه اللي هم ابو هني احمد بدير يعني- عموما حبيت بس اقول لكل واحد حبيبته تقله انا بعفيك من كيت وكيت وتقوله انا حاسه اني بقيت حمل عليك يقوم يهبدها قلمين وتهزيئه حلوه كده علشان تصدق وتقتنع انه مش هيفرط فيها بالساهل
وطبعا كل قطه حلوه البيه يقولها انا مش عايز اتعبك في الأنتظار اكتر من كده وانتي شايفه ظروفي عامله ازاي تقوم تخبطه بكعب الجزمه على دماغه وتقوله ده بعينك علشان يقدر هي متمسكه بيه قد ايه

الحاجه المهمه دلوقتي هي فرحي انا سيبكم من الناس المسحوكه دي
الحمد لله الفرح كان تحفه هو اصلا الموضوع اتفقنا انه عائلي في اضيق الحدود لظروف عائليه عندنا وعندهم بالصدفه الله يرحم امواتنا جميعا المهم
عبده اخويا قالي متزعلش هاعملك زفه تهبل اطمن
وكان ما قال صدقا لقيته جايب عربيتين شكلهم تحفه وركنهم قدام البيت قبلها بليله وجايب شنط واكياس سوده كبيره قوي سألته ايه ده يا ابني
قالي دول شوية صواريخ وشوية مفرقعات وعلبتين طلق صوت وورق ملون وحاجات كده لزوم الزفه
طبعا انا اتسرعت من المنظر اسطوانات طويله قوي كده ملونه وعلب تخينه مرسوم عليها انفجارات غريبه
وطبعا الأيس اللي بيتبخ من انابيب كده وبهدل الناس في الأفراح
وفي يوم الخطوبه نفسه لقيت شلته المكونه من اصناف عجيبه من الشباب معظمهم ابطال في الرياضه ماشاء الله اللي بتاع مصارعه روماني واللي جودو واللي رفع اثقال وناس كده شكلها مرعب عاملين زي الحيطه ايه دول ياد دول الجاردات اصحابي
كمان جايبلي بودي جاردات في الفرح
ما علينا اهو برده ينفعونا في الزنقه
رحنا الفرح وطبع القياده المذهله اللي قطعت خلفي خلاص كانت روعه
وصلنا واخدنا العروسه من الكوافير وطلعنا على البيت عندهم
بمجرد ما خرجنا من العربيه انطلقت الأنفجارات وورق ملون طاير في كل حته وصواريخ ومسدسات الصوت عامله زي الرز كل واحد ماسك مسدس وعمال يضرب بيه في الهواء
وقفت معاهم شويه وطبعا رقصت لما اكتفيت وبعدين طلعنا لبسنا الدبل في البيت فوق
واستأذنت حمايا العزيز اني اخرج انا وهم وخطيبتي بعد الفرح ووافق الحمد لله
واخدونا على مركب في النيل لوحدنا بس كانت تحفه
مش هاحكيلكم على المركب علشان دي كانت حاجه مجنونه خالص

سلام بقى وعقبالكم جميعا

كل الناس دي بتكتب عن ايه

في عندي كلام كتير

مش عارف اتكلم عن ايه بالظبط كل ما ادخل عند الناس الاقي كل واحد شايف حاجه غلط بيحكي عنها او شايف حاجه صح بره بلدنا

طبعا وعايزنا نعمل زيها

وفي ناس بتتكلم عن الدين والخلاق وبتحرب وتزعق علشان الناس تحس وحالها ينصلح

وفي ناس ناسيه الدين والأخلاق خالص وعايشينها كده هبلاوي الجبلاوي يعني زي ما تيجي تيجي
مش مهم اي حاجه المهم يكونوا مبسوطين

وفي ناس بتتحدى الدين والأخلاق والقيم وكل الرموز الجميله حوالينا علشان محدش يحاسبهم او جايز علشان الكل يبقى زي بعضه الدنيا تبقى كلها عك في عك

وفي ناس بتتفرج بس مش بتشارك براي يعني ممكن يكتب تعليق صغير يشجع بيه مره او يعترض مره بس مبيحاولش يبين رايه او يعرض قضيه في باله

وفي ناس زي العسل عايشه بدماغ فله تقريبا محششين يعني ميهمهمش من الليله كلها الا انه يطلع بمصلحه حلوه يظبط مع بنت لذيذه يديها ميعاد او يكلمها ويتعرف عليها يمكن العمليه تصيب وتطلع مزه في الجون مثلا

وفي ناس تانيه جايه تفرغ شحنة الكبت والمشاعر المدفونه الو المقتوله جواها وتلاقيهم يا اخي بيكتبوا شوية اشعار تجنن مش عارف بيجيبوا الكلام منين وفي الغالب بيكونوا حساساين ومش بيشاركوا في اي قضيه او راي

وفي ناس غاويه تسخين وخلاص يعني يدخل مدونه واحد مجاهد وبيدافع عن فكره معينه يشجعه ويهتف معاه وبعدين يخلع من دماغه وهوب يروح مدونه تانيه يلاقيها رقص وفرفشه ومزه بتكتب عن رغباتها الدفينه يبقى ناقص يطبلها علشان ترقص شويه

ويا سلام بقى لو وقعت في واحد من بتوع الحركات اياها يعني مثلا ليه فكر سياسي او فكر ديني او فكر سياسي ديني متفهمش هو عايز ايه بالظبط وتلاقي القضايا عنده سخنه ويقولك ده اتحبس من فتره ولسه خارج انا طبعا مبعيبش على اصحاب الأراء الحره بس فيه البعض بيستغل العمليه دي وينط يحط نفسه مع الأبطال مع انه اصلا ابن ..... كافر والعياذ بالله وتلاقي منهم اللي يطلعنا كلنا كفره ولاد .....

وفي ناس بقى تحس ان فيه قلم جامد قوي اترزعوه على غفله فجايين وهم حالفين يخربوا الدنيا خالص يتكلموا في كل حاجه وبكل صراحه ويمكن وقاحه بس المهم ميسيبوش قضيه ولا موضوع مهما كان شائك الا ويتكلموا عنه ويناقشوه بصراحه جدا وفي ناس منهم بصراحه بتجيب حاجات جامده قوي خاصة لما الصراحه بتاخد حقها تلاقي نفسك عرفت بلاوي منهم

وفيه ناس تانيه الموضوع بالنسبه ليهم مجرد مذكرات يفضي اللي جواه فيا ويريح دماغه مالهوش دعوه بحد ولا بيبص على كلام حد تاني خالص ودول مالهومش احتكاك بحد كتير حتى التعليقات مبيردوش عليها

وفيه ناس تانيه تلاقيها عامله علاقات ومعارف واصحاب يجي سبعتلاف واحد ويبقى مش عارف هو بيجيب وقت يروجح للناس دي كلها امتى بس وتلاقيه متابع في كل مدونه وصورته ملطوعه عند كل الناس وتدخل عنده تلاقي يجي سبعتلاف لينك للمدونات اللي عاجباه ودول منهم ناس فعلا دماغها حلوه قوي بس هاموت واعرف بيجيبوا الوقت منين

وفي ناس بتتكلم زي ما تكون بتحسب ان ده حمام بيتهم المصون تلاقي الفاظ هايله متتقالش في خناقة عربجيه وتلاقي شتيمه وقلة ادب مع عدم مراعاة ان ممكن بنات تدخل او اطفال ساعات وانا عارف ان البنات بقت عارفه كل حاجه وعصر السهوكه انتهى لكن الحياء حلو برده وميصحش اني استغل اني مختفي واتحول لكل قلة الأدب دي

وفي ناس بقى عجبوني قوي واحده لقيتها حاطه كومنت عندي حسبتها بتهزر لكن لما فتحت المدونه بتاعتها لقيتها فاكره نفسها في احدى بيوت الدعاره على رأي هنيدي صور اباحيه والفاظ سافله واللي يجننك مش البنت انما الناس اللي بتعلق عندها واحد بيشتم وواحد بيبدي استعداده للقاء العاطفي الحار وواحد عامل ناصح قوي قال ايه بيبدي اعجابه بصراحتها وصدقها خلاني كنت هاموت من الضحك عليه يا ابني دي شكلها رقاصه ومهتجيبش معاها حركات الأعجاب بعقلها دي

وطبعا المثال المناقض ليها هو البنت اللي بتكتب بجرأه مجنونه وبتدخل مواضيع شائكه جدا ومع ذلك تلاقي انها مش صايعه ولا هي اصلا تربية كابريهات بس الدنيا علمتها والقرأه والتلفزيون وكلنا دلوقتي عارفين كل حاجه لكن هي مبتتدعيش انا بريئه ومش فاهمه بتقول وتناقش وتتخانق بس هي لسانها طويل شويه

وفي ناس عاملها معارض يعني حاطط صور عجبته وناس مصاحبهم واي حاجه عايز يعرضها يعني

يا لهوي ده لسه في ناس كتير

اه كنت هانسى اصحابي الأعزاء الساده المثليين الله يهديهم حاجه تموت من الضحك لما الاقي واحد منهم بيجادل الناس ويتهم العلماء بالجهل والتخلف ويحول كل الحرام حلال ويستشهد على الأيات بالعكس كله عك في عك كده ومنهم ناس عارفه انهم بيغلطوا لكن زي اي حد فينا مش قادر يبطل نفسه يكون كويس ويقولك بصلي وبصوم لكن دي حاجه صعب اتخلى عنها ودول اتمنى ربنا يهديهم وينجيهم على القل هم على اول الطريق للصلح ما داموا عارفين ان فيه غلط ومش بينكروه ولو ان اللي يغيظك ان في منهم ناس دماغهم في المواضيع العاديه حلوه قوي لكن تيجي لحد الموضوع ده والعك يشتغل

وفي اللي بحتقرهم صراحه العلمانين اللي بيشتموا العلماء والرسول وكل ما هو متعلق بالدين يا اخي انت كفرت وقررت تروح النار بتغلط ليه في الناس دي الا اذا كنت متغاظ منهم زي الشييطان لما ربنا وعده بدخول النار قالك لازم الكل يروح في داهيه زيي

وعلى ذلك احب اقول لكل واحد ياريت كل واحد يفكر هو مين في دول ويقولي لو شاف اشكار تانيه ويقيمني انا نفسي ممكن اكون مين في دول

اصلي اكتشفت اني من كل خطأ شفته وقعت في جزء منه برده
ماعدا المثليه والإلحاد

تحياتي
سلاااااااااااااااااااااااااام

قال بيقولوا شعب طيب

من لا يرحم لا يرحم
رأيت في حياتي حاجات كتير بتحصل اكدتلي ان بلدنا خلاص مبقاش فيها حاجه اسمها رحمه
كلها مواقف شفتها بعيني
عربية البلديه او شرطة البلديه تمر في الشارع والباعه بيجروا كل واحد عمال يحاول يلحق يهرب قبل ما ياخدوا كل اللي حيلته المهم قفشوا بضاعة عيل صغير كان بيبيع هدوم وقماش في السوق اخدوا الفرشه كلها وحطوها في العربيه الواد مش عارف يعمل ايه عمال يجري وراهم ويعيط واحد منهم شاورله قاله خد ياد قرب هنا تعالى الواد جري بيحسبه هيحدفله البضاعه الراجل ضربه قلم على وشه وقع الواد في الأرض معرفش هو ضربه ليه يمكن علشان يحرم يعيط قدام رجال البلديه الشجعان
اب واقف عمال يزعق لأبنه علشان راحله المدرسه المدرسه قالتله انه مش بيعمل الواجب ضربه قلم على وشه عين الواد ازرقت من الضربه وفي البيت ربطه في السرير من غير اكل يوم كامل علشن الواد يعرف اهمية العلم
زوج راجع من الشغل تعبان لقى زوجته مش عامله اللي هو قال عليه وراحت لأمها من غير ما تقول راح ماسكها بالأقلام والشلاليت واللكميات كأنه في ماتش ملاكمه بس برده محسش انه شبع وفش غله راح جايب كوباية مياه معدنيه كبيره وفضل يضربها بيها في دماغها لحد ما الدم انفجر من رأسها ونزل على ايده ساعتها هدي شويه وسابها تقع على الكنبه علشان يستريح شويه
في الشارع شاب غلبان كده ماشي وفجأه امين شرطه وقف قدامه سأله فين ياد بطاقتك اتخض قاله حاضر هاطلعها اهي الأمين طبعا مستعجل قاله بسرعه يا ابن الم..... يا ..... الواد قاله طيب حضرتك بتشتم ليه هو انا عملت حاجه راح نازل على وشه بأقوى صفعه قدر يجمعها الواد عينه دمعت من الألم والذهول مش الم الصفعه لكن الم كرامته اللي نزفت كل دمها
مدرس في الفصل دخل لقى طالب بيكتب على السبوره قاله بتعمل ايه يا ابن ال.... وراح رافع ايده ورزعه قلم نسى الواد اسمه الواد صرخ وقال هاجيب ابويا راح برجله ضربه حتة شلوت كوم الواد على الأرض
شوية عيال في المدرسه ماسكين عيل غلبان كده ونازلين فيه تريقه وشتيمه ومعاكسات راح ماسك في واحد منهم اتلموا كلهم عليه ضربوه مع بعض وقطعوا هدومه وسابوه مرمي في الأرض بيبكي وراحوا يكملوا لعب
ام قاعده مع صاحبتها بترغي شويه الواد عمال يلعب فجأه لقيته راح بيلعب في الدولاب وقع نص الهدوم على الأرض حبت تعاقبه قامت جابت ملعقه وسخنتها على النار ومسكت ايده وحرقته بالملعقه علشان ميعملش كده تاني
أخ مش لاقي شغل وقاعد في البيت اخته بتنزل تشتغل كل يوم رجعت يوم متأخره طلب منها فلوس رفضت راح ماسكها من شعرها ونزل فيها ضرب لحد ما استسلمت واديته كل اللي معاها
سواق ميكروباص بيسابق واحد تاني علشان الدور الشارع ديق والعربيتين لازقين في بعض ست كبيره ماشيه على جنب الطريق بس مش على الرصيف شافها زمر لها علشان تغور بعيد بسرعه ملحقتش خبطها بقوه فظيعه علشان الفرامل مقدترش توقفه الست وقعت على جنب الطريق لا تنطق
في الشارع جنب بعض البائعين لقيتهم ماسكين واحد بيقولوا حرامي قلت يا ساتر جدعان فجأه لقيتهم بيضربوه كأه يهودي اقلام وشلاليت وضرب مبرح بصوره غير ادميه الواد هيموت في ايدهم مش عارف اقول ايه طيب افرض بعد ده كله طلع مش حرامي ولو حرامي يضربوه كده ويعذبوه كل ده الواد كان هيموت في ايدهم انقذه منهم ان الحكومه جت علشان تكمل عليه يمكن هو يستاهل مش عارف
خناقه في الشارع بين اتنين شباب فجأه اهل واحد منهم وجيرانه واصحابه اتدخلوا ومسكوا الواد الغريب يضربوه كل واحد كان بيضربه كأنه مش مسلم زيهم ولا حتى مصري زيهم كل واحد بيضرب بغل وعنف وكراهيه كأن الواد ده اغتصب نسائهم مع ان الموضوع خناقه على لعبة كوتشينه

النبي –ص- قال من لا يرحم لا يُرحم الناس بتستغرب اللي بيحصل في البلد من قلة بركه وشعور بلاقهر وكل اللي بيحصل ده السبب يا ناس مش ان الحكومه والسياسه وكل اللي بنقوله ده السبب ان احنا مبنرحمش بعض اللي بيقدر على حد بيطلع فيه كل الحقد والغضب والغل اللي جواه
انا من كتر ما شفت كرهت البلد كلها
وكنا زمان بيقولونا ان الشعب المصري شعب طيب قوي وغلبان الظاهر الحكايه دي خلاص راحت

نبا هام هبه اختي هتنشر الكتاب بتاعها بتاع " عمر وساره" يوميات اتنين مخطوبين

ايوه يا ناس اخيرا هتنشر الكتاب الحمد لله طبعا ممكن ناس منكم متعرفش ان هبه هي صاحبة السلسله دي اصلا وكانت بتنشرها على مجلة بص وطل لكن للأسف في ناس سمحت لنفسها تستغل القصه ونجاحها ويكتبوها بأسمهم وانتشرت جدا على النت لدرجة اني كان بيجيلي من اصحابي اجزاء جديده كل يومين وهي اصلا مش بتبعت الأجزاء اللي عندها للمجله علشان متحرقش باقي السلسله الي في الكتاب والغريب اني لقيت ناس بتكتب اعتراضات في النت عن ان القصه بتغلط في الدين وان فيها بجاحه وحاجات عجيبه المهم ان هبه كانت زهقت من الناس اللي سرقت القصه وكانت قررت متكتبش ولا تنشر باقي الأجزاء لكن الحمد لله هي اتعاقدت مع دار نشر وهتنشر القصه والكجله بتاعة بص وطل نشرت الخبر في العدد الجديد وحاطين صورة هبه وهي بتمضي العقد كمان علشان كده عايزكم كلكم تستنوا الكتاب لما ينزل وتقروا وتقولولي رأيكم ايه وانا ممكن ابقى اوزع نسختين تلاته هديه لأصحابي المدونين

اللي عايز يحجز نسخه يبقى يقولي بسرعه

عايز تشجيع من نار لهبه اختي

تحديث

الكتاب هيتنشر تبع دار نشر " اٌكتب" معلش هو حصل خطأ في اسم دار النشر يا جماعه

وده الأسم الصحيح للدار اللي هتنشر الكتاب

وهينزل انشاء الله في معرض الكتاب واحتمال ينزل قبل كده بكام يوم علشان في معرض تاني عايزين يلحقوه المهم انا هابقى احط اللينك بتاع مجلة بص وطل علشان اللي عايز يقرأ التفاصيل كلها

شكرا لكل اللي علق وهنأني اتمنى ليكم كلكم النجاح

رمضان كريم

اللهم تقبل منا

رمضان كريم

كل سنه والمسلمين بخير

كل سنه والمصريين كلهم بخير

كل سنه والدنيا كلها بخير

اللهم اغفر لي ذنوبي

اللهم اغفر للمؤمنين والمؤمنات والمسلمين والمسلمات الأحياء منهم والأموات

سبحان الله وبحمده سبحان الله العظيم

جاء شهر رمضان الحمد لله اتمنى كل واحد يلحق يفوز فيه صدقوني دي فرصه لا تعوض ان كل واحد يرمي حمل الذنوب اللي شايله على ظهره طول السنه

ارمي اللي لميته من الذنوب وعبي مكانهم حسنات ورحمات ومغفره

حاولوا على قد ما تقدروا شوف كل واحد فينا بيتعب علشان الدنيا قد ايه

يبقى لازم نتعب علشان الأخره اكتر واكتر

ادعوا لي وانا بادعيلكم كلكم

مبروك علينا رمضان ويارب اكرمنا فيه واغفرلنا كلنا

وحقق لكل منا حلمه وباركله وذده فوق ما يتمنى برحمتك وواسع فضلك يارب

ادعوا ولا تملوا من الدعاء فإن الله لا يرد داعي او سائل ابدا فهو الكريم ولا يقول احد منكم اني ادعي ولا اجاب فإن الله كريم

وحتى اذا لم يكن في طلبك خير لك فإن الله سيبدلك خيرا وربما يمنع عنك مصيبه ما كانت ستصيبك

احمد لله على نعمة الأسلام وكفى بها نعمه

سلامي للجميع

كل سنه وانتم طيبين

الحكايه اللي بدات عند كده سبونسر

بناء على فكرة الواد الروش بتاع كده سبونسر قرر اننا نكتب قصه كل واحد يكتب جزء منها والحمد لله العيال طلعوا جدعان وافتكروني بعد ما زنيت عليهم وبعتولي الدور علشان اكتب فصل في الأحداث اللي المفروض تكون باللغه العربيه الفصحى ربنا يستر واكتب كويس

هابقى احط اللينكات او احط اللينك بتاع كده سبونسر ومن عنده هتلاقوا باقي اللينكات

الفصل الأول

الفصل التاني

الفصل التالت

هذا الجزء على لسان احمد بعد ما حضراتكم طيرتم البطل علىظهر حصان معدي بس الله ينور عليكم في اللي كتبتوه استعدوا للعك اللي هاكتبه

الجزء الرابع : الغرباء

بعد ان الجمتنا الدهشه والخوف والمفاجأه حاولنا اللحاق بذلك الفارس الذي اختطف ابراهيم لكن يد قويه جذبتنا نحن الأثنين من الخلف لتمنعنا

التفتنا لنجد شاب اسمر في لون الليل يقف خلفنا وبوجه كالصخر اشار لنا لنتبعه
هتف به احمد ولكن صديقنا معه اشار الرجل في هدوء الينا ان نتبعه والا نقلق
تبعناه ولا نعلم لماذا وثقنا به بهذه السهوله ولكننا كنا مذهولين ولا نفهم اي شيء مما يجري تبعناه الى منزل قديم الطراز ربما كان من احدث المنازل في العصر الذي اصبحنا فيه في الداخل وجدنا انفسنا في غرفه ضيقه بها ركن وضعت به انيه من الفضه وحولها بعض المقاعد ويطغى على المكان عطر غامض يثير الريبه وفجأه وجدنا امامنا نقيض الرجل الأسود الذي احضرنا الى هنا رجل شاهق البياض له لحيه ناعمه ويرتدي جلباب ابيض نظر الينا في هدوء قائلا مرحبا بكم يبدو انكم اغراب عن هذه المنطقه ان ملابسكم تدل على ذلك التفت اليه وهتفت به ارجوك اخبرنا اين ذهب ذلك الفارس بصديقنا وهل يمكنك ان تساعدنا على استرجاعه اشار لي بيده كي اصبر واتبعه واتجه في هدوء ناحية الركن الذي وضعت فيه المقاعد والآنيه الفضيه اقتربت لأجد في وسط الجلسه صحن من الماء يبرق ويلمع كأنه فضه ذائبه وبهدوء تمتم ببعض الكلمات لتهتز المياه في قوه ثم فجأه شاهدنا ابراهيم ملقى على الأرض وقد قيد الى عارضه خشبيه لم نفهم ما هذا كيف نراه في هذا الشيء وما الذي حدث له وهل ما نراه حقيقة ام خداع شياطين مددت يدي الى الماء فمنعني الشاب الأسود في حزم وقوه فتراجعت وانتظرت ان يتكلم الرجل الذي قال لنا في هدوء ان صديقكم قد اختاره الفارس كجندي في جنود المتمردين وسيتم فحصه غدا وامامه امران اما ان يقبل بين صفوفهم او ان يتم قتله .....

صرخت به وماذا سنفعل الأن علينا ان ننقذه اجابني الرجل في قوه وكيف تظن انك قادر على انقاذه اخبرته انني اريده فقط ان يرشدني على طريق هؤلاء المتمردين وهنا نطق على بقوه سيدي اعتقد انك تخفي عننا شيء ما وربما ستعرضه علينا الأن بعد ان تخبرنا انك تستطيع مساعدتنا فلماذا لا نوفر على انفسنا الوقت دهشت من كلماته ولكنني دهشت اكثر عندما رد الشيخ قائلا حسنا انت لا تضيع وقتك اتبعوني وتحرك في هدوء ناحية مجموعه من المقاعد لم اكن قد لاحظتها من قبل واثناء اتجاهنا اليها لمحت فتاه غاية في الجمال تختلس النظر من طرف الغرفه وتحدق في عيني بقوه يبدو انه لاحظ اتجاه بصري فنظر في سرعه ولكنها كانت قد اختفت من امامنا لمحت شرارة غيره في عينه ولكنها مسحها بسرعه واشار لنا كي نجلس حانت مني التفاته مره اخرى ناحية الفتاه فلم اجدها ولكني ذهلت عندما وجدت ان كل ما كنا نقف وسطه منذ قليل من الغرفه قد اختفى وكأن الحجره تبدأ حيث نجلس اختفت المقاعد الأخرى واختفت الأنيه الفضيه سرت قشعريره في جسدي ولم اعد افهم شيء مما يجري وهنا بدأ الشيخ يتكلم ويحكي لنا القصه من البدايه

نحن لسنا من هذه المنطقه ايضا ولا هؤلاء المتمردين نحن من مكان بعيد ربما لا تعرفون عنه شيء ولكننا جئنا هنا سعيا وراء هؤلاء المتمردين ولكننا اكتشفنا ان كل اسلحتنا وقوتنا لم تعد لها قوه الا اقل القليل منها بعض ادواتنا لازالت تعمل وهم ايضا مثلنا لذلك بدأنا في تقوية انفسنا وتدعيم قوتنا بما نجده حولنا من هذه البلاد وبدأ المتمردين في نفس الأمر لكنهم لم يجدوا حلا سوى اختطاف البعض الذي يقدرون على حمله على خيولهم التي سرقوها ويقوموا بتدريبه ليعمل لصالحهم ويعطونه بعض القوه الخاصه التي لازالت معهم ولكن بعض الناس لا تتحمل اجسادهم تلك القوه هم لا يهتمون بذلك ولكنهم يبحثون فقط عن من يملك خصائص معينه تجعله قادرا على ذلك ويبدو انهم وجدوها لدى صديقكم نظرت اليه وسألته حسنا وماذا نستطيع ان نفعل لنساعدكم وكيف ستساعدوننا اجابني قائلا نستطيع ان نرسلكم الى المكان الذي احتجزوا فيه صديقكم ولكن لا يمكننا ان نتدخل اكثر من ذلك رد علي بسرعه حسنا وماذا سنقدم في المقابل اجابه الرجل في هدوء شيء بسيط مجرد تجربه بسيطه سنجريها على صديقكم عندما يعود لنعلم ما الذي وجده فيه المتمردون والذي يجعله قادرا على تحمل القوه الخاصه فربما يساعدنا ذلك على التغلب عليهم والعوده الى ديارنا سريعا

شعرنا بالقلق من عرضه ما نوع التجارب بالظبط وماذا يمكن ان نفعل الأن اخبرته اننا موافقون كان كل همي ان نصل لإبراهيم ثم نبحث عن حل مع هؤلاء الغرباء التفت الرجل الينا وفي هدوء اشار الى الشاب المظلم هذا ليرشدنا حسبته سيقودنا الى باب البيت لكنه اشار الى ستار منسدل في نعومه على الجانب اقتربنا منه وفجأه دفعنا في قوه بإتجاه الستار لنجد انفسنا نسقط في هوه عميقه ومنها الى الأرض مباشرة في المكان الذي قيد فيه ابراهيم ارتعد من هول المفاجأه وصرخ كيف وصلتم هنا ومن اين دخلتم والباب في الجهه الأخرى اجبته انه ليس هناك وقت للشرح فجأه وجدت امامي الفتاه التي رأيتها هناك اقتربت مننا واشارت لنا قائلة اياكم ان تتركوهم يأخذوا صديقكم ستندمون صدقوني اشد الندم اهربوا الآن والا لن تستطيعوا الهرب ابدا وفجأه ارتفعت الأصوات في الخارج همس ابراهيم يا الهي انهم عائدون اختبئوا.................

والأن سأترك لكم التكمله يا اعزائي

يا ترى مين ممكن يكمل الجزء الجديد

طبعا مش هلاقي حد يكمل الجزء التاني احسن من الغاليه هبه في مدونة دوبه

تحياتي

شبرا وبنات شبرا ......ورقصني مع بنات شبرا

انا لمن لا يعرف بموت في حضور الأفراح عشان كده تلاقيني في كل الأفراح في البلد عندنا موجود عشان استمتع باللحوم الفظيعه والأكل اللي يهبل وفي افراح اصحاب عبده اخويا بكون موجود اتفرج على المسدسات وهي بتفرغ عشرات الطلقات تحيه للعروسين وساعات يخلوني اجرب اضرب طلقه او اتنين عشان يفرحوني وطبعا بخلي عبده يصورني وانا ماسك المسدس ويا سلام على افراح هبه اختي واصحابها في الغالب بتكون في نوادي او قاعات الشرطه والجيش وطبعا انا لازم اوصلها امال يعني اسيب اختي لوحدها وبحب قوي الديك الرومي اللي بيعملوه في البوفيه لكن في ايضا افراحي انا بتاعة زمايلي في الشغل اللي في الغالب بتكون في شبرا وانا اصلا من عشاق شبرا وبنات شبرا طبعا مش بعرف اعاكس حد عشان ميصحش الناس تعزمني وانا اقل ادبي واصلا انا بطلت المعاكسات بعد كلمه قرأتها عند ميس ايجيبتيانا ترابد سول

المهم طبعا عارفين انا بموت في الأفراح دي عشان الرقص مفيش دلوقتي بنات كتير بترقص في الأفراح الا نادرا في الغالب الشباب بتاكل الجو وبنفضل نرقص ونتنطط طول الليل وبروح هاموت من التعب المهم اني المره دي يوم الخميس اللي فات رحت فرح في شبرا وطبعا لقت دقني وحطيت البرفان اللي فاخر جابهولي في عيد ميلادي هديه وضربت الحته اللي على الحبل ورحت اقابل العيال عند نفق شبرا عشان مش عارف العنوان وفعلا قابلوني ورحنا الفرح وبدأت المزيكا والأغاني والليله كانت تجنن لكن فجأه جه واحد زميلنا اسمه سيد ومعاه نورهان بنت اخته طفله زي العسل لأ دي هي العسل نفسه حوالي خمس سنين هو عمرها وطبعا طولها ميعديش ركبتي بحوالي عشره سنتيمتر وكرشها قدامها يفطس من الضحك وقفت وسط الناس احنا بنرقص وهي عماله تسقف وعايزه تدخل ترقص معانا طبعا ممكن اي واحد زي الحيطه يدوس عليها يفطسها رحت اخدتها من ايديها وقعدت انا ارقص معاها وسط الشباب وهي انطلقت على الأخر عماله تحاول تعمل زينا في كل حركه البنت كانت حتة سكره تحاول تسقف بكف ايدها الصغنن وانا عمال اضحك واشاور لها تقرب لي عشان نرقص ورحت شايلها وقعدت الف بيها في الهواء ونزلتها انا دخت وهي ولا هي هنا عماله تضحك وبرده عايزه تكمل رقص وكل ما اروح ارتاح على جنب الاقي ايد بتشد البنطلون اتاريها هي برده وتشاورلي كأنها هي اللي هترقصني تعالى تعالى اقوم اروح معاها وقفت ترقص قدامي فنزلت على رجلي عشان اكون طولها ورحت مميل على الأرض وراسي للخلف وهي فضلت تضحك اول ماانا عملت كده رحت جيت اقوم راحت مشاوره تاني تاني قلت حاضر يا ستي عشان خاطرك المهم احنا كان الوقت اتأخر خالص وقررت اني امشي وكام واحد تاني ندهت لسيد خالها عشان ياخدها وهي مش عايزه تمشي طبعا بس قالها يا بنتي امك هتموتني وعرفت ساعتها منه انها من شبرا قلت يا خبر هو البنات الشبراويه بيبقوا سكر كده حتى وهم لسه ضغننين قوي كده

الحمد لله انا ناوي اتجوز من شبرا انشاء الله

اللي يكون عنده فرح قريب يبقى يعزمني يا جماعه

تحياتي للجميع وانا انشاء الله لما اجي اتجوز هاعزمكوا برده

واحده ست وواحده ست ...و...واحد بدقن وواحد بدقن

انا اليومين اللي فاتوا كنت مشغول بتحضير ورق الشغل ايوه بحضر اوراقي عشان طالبينها مني في الشغل وطبعا لفيت على كل الأماكن السياحيه اللي الحكومه مشكوره عاملاها عشان الخدمات للجمهور السعيد اللي زي حالاتي عموما انا خلصت الحمد لله معظم الأوراق بسرعه لأني كان معايا فاخر وهو اصله شغله متعلق بالتأمينات فكان اكتر واحد فاهم القصص دي لكن انا مش هاحكي عن كل الرحله بتاعة الورق دي عشان اكيد كلكم عديتوا بالمهمه المستحيله اللي عديتها دي اللي هاحكي عنه هي مقارنه بسيطه بين اتنين ستات واتنين رجاله من الموظفين اللي اتعاملت معاهم وتحديدا في مكتب التأمينات اول ما دخلت المكتب كان شكله اصلا زباله من جوه وطبعا انا قولت اكيد غرفة الحاسب الألي تختلف لكن سبحان الله اول مره اشوف كمبيوتر شبه الموظفين لدرجة اني حسيت اني هلاقيه بيناقش الأله الطابعه في ميعاد الجمعيه اللي هايدخلها معاها المهم بمنتهى البشاشه والأبتسامه المشرقه على وشي دخلت على الموظفه المسؤله وقلتلها اني عايز طبعه واحد وطبعه اتنين بتوع الموقف التأميني بتاعي راحت بصاللي وقالتلي بعصبيه يعني ايه طبعه واحد وطبعه اتنين دي , كتمت غيظي من استهبالها وقلتلها بصي حضرتك هم في الشغل طالبين ورقه مطبوعه من التأمينات بموقفي التأميني فهمتي حضرتك راحت بقرف ردت عليه وقالتلي احنا معندناش طباعه هنا روح الشقه التانيه طبعا انا كنت هاقولها شقة ايه هو انا جاي ابيع لبن وجايبلك الدليفري يا ستي شقة ايه قالتلي قصدي المكتب التاني عند الغرفة التجاريه سرحت بخيالي طبعا عشان افكر فين يا اخويا الغرفه التجاريه دي وطبعا هي امتنعت تماما انها تفهمني فين الغرفه اللي بتقول عليها دي لكن الحمد لله ولاد الحلال على البوابه وصفولي المكان وطلع قريب مسافة ربع ساعه مشي رحت ركبت الميكروباص ووصلت بسرعه عشان الحق قبل ما يروحوا لقيتها عماره فخمه والسلم رخام انا طبعا انشكحت قوي وقلت طبعا انا مقامي اني اجي الحته الحلوه دي واخلص ورقي هنا سألت فين التأمينات قالولي الدور التالت طلعت بسرعه وانا كلي انشكاح بمجرد ما دخلت من الباب كأني عديت من احدى بوابات الإنتقال اليوني الجزئي لأني لقيت نفسي في نفس الشقه اللي كنت فيها هناك بس الفرق ان الطرقات اضيق شويه ولقيت ناس زحمه رحت دخلت على مكتب كده لقيت فيه اتنين موظفات وراجل بدقن خارج منه ردت الموظفه اللي قاعده بهدوء الحق الأستاذ اللي بذقن اللي خرج هو يعملهالك شكرتها واتلفت الحقه لقيته اختفى في الزحمه رحت لقيت واحد في وشي بدقن تاني شكله طيب كده سألته عن طلبي قالي روح الفرع المكتب التاني مش عندنا هنا قلتله حضرتك هم قالولي معندهومش طباعه وقالولي اجي هنا رد بعصبيه مش مشكلتي ده مش عندنا هنا وبسرعه لقيت الموظفه اللي كنت سألتها بتشاورلي اني اتبعها روحت بسرعه لقيتها قفشت الراجل التاني وقالتله لو سمحت اطبع الموقف التأميني للأخ ده قالها من عيني وقالي اتفضل حضرتك شكرتها ورحت معاه الراجل كان زوق برده وقالي اتفضل استريح وبدأ يطلع اسمي من الكمبيوتر الفقري اللي عنده وراح يجيب ورق عشان يطبع عليه المهم لقيت الشيخ التاني جاي عايز يلغي اللي على الشاشه عشان يعمل حاجه تانيه الراجل قاله استنى يا شيخ نطبع للراجل مصلحته قاله بغيظ طيب يا سيدي اطبع اخدت الورقه اللي حبرها اصلا مختفي ومش شايف منه حاجه وهربت من قدامهم بسرعه عشان الحق مكتب العمل اعمل كعب عمل ولقيت هناك شوية ستات حاطين مكياج يكفي انهم يدهنوا بيه اسوار القلعه كلها وقلت اكيد هايزهقوني ويتغابوا عليه والغريب انهم كانوا سكره كلهم كانوا بيضحكوا وانا مش عارف حتى اهزر معاهم من كتر زهولي من الموقف واخدت الورق بسرعه وخرجت وقعدت افكر ايه الفرق بين الست اللي ردت عليه الأول في المكتب بتاع التأمينات بأسلوب في منتهى الغباء وبين اللي ساعدتني عشان اخلص ورقي وايه الفرق بين الشيخ اللي كان عايز يحدفني من الشباك والشيخ اللي ساعدني اخلص حاجتي
انا شايف ان الفكره مش في ان ده شيخ ولا لأ او ان الست دي محجبه ودي مش محجبه لأن الأتنين كانوا محجبين والأتنين الرجاله كانوا ملتحيين الفرق بيكون في اخلاق الشخص نفسه ولأن في بلدنا الخدمات اللي بتتقدم للشعب الموظفين بيحسوا انهم بيتفضلوا علينا وبيعطفوا علينا بيها مع ان هو ده شغلهم اللي بيقبضوا مرتب عليه لكن هم بيحسبوا انهم بيقبضوا مرتب على انهم بيحضروا في الميعاد ويمشوا في الميعاد بغض النظر عن اللي عملوه طول اليوم لما اتفتحت خدمات المحمول في مصر وبدات الناس تشوف المعامله الهايله بتاعة خدمة العملاء لكن ده عشان الناس دي بتفهم الموظف عندها ان العميل هو رقم واحد وان تقديم الخدمه هو فن يجب اتقانه مش يعاملوا الناس كأنهم بيشحتوا مش عارف اقول ايه عن الناس دي الغلط فيهم ولا الغلط في الناس اللي بتديهم التعليمات والقرارات وفالحين بس يقولك كلنا في خدمة الجمهور انا نفسي اروح اشوف الجمهور اللي بيتكلموا عنه ده يمكن قصدهم ناس من بره عموما مش مهم المهم اني خلصت الورق ادعولي ان ربنا يسهل في باقي الأجراءات

انا حر وانت حر وانت من الأحرار يا علي

النهارده كنت ماشي في ممر غريب كده وفجأه سمعت صوتها طبعا عارفينها العرافه بتاعتي اصلها رجعت من عالم البحار اللي زارته مع ملك الجان حبيبها
فرحت قوي بيها بس كانت مش مبسوطه انا خفت تكون عرفت عني مصيبه جديده من مصايبي
بس لقيتها بتكلمني عن تعليقي عند اجندا حمراء على البوست اللي فات وعرفت منها ان الموضوع ليه بدايه انا معرفتهاش وان فيه قصه ومعركه حصلت وانا مكنتش موجود وحتى لما جيت مشوفتش اثار الحرب ولا الدماء على الساحه المهم عشان ما اطولش عليكم هي قالتلي ان كان فيه ناس خبطت في الدين وفي ربنا وحاجات كتير لا تليق بأي حوار محترم انا مش عارف اجيب الحاجات دي او حتى اقرأها دلوقتي لكن ده م موضوعنا انا النهارده عايز اقول كلمتين لكل الناس اللي بعرفهم وبعتبرهم اصدقائي سواء كانوا اشخاص عاديين زي حالاتي او مثليين حتى انا يا جماعه لما بدأت التدوين كان عندي هدفين بمنتهى الصراحه ومالهومش تالت
الأول اني يكون عندي مكان انشر فيه كلامي براحتي من غير ما اتحايل على حد عشان يساعدني انشره
الثاني وهو الأهم فكرة اني انضم لمجتمع جديد مخهم حلو وموافقين يعتبروني صديق ليهم
ودي كانت اهم حاجه تكوين صداقات مع كل الناس شباب وكبار بنات وولاد مسلمين مسيحين عرب او اجانب عاديين او مثليين
وقررت اني اعمل الحاجه اللي اتعلمتها من فاخر صاحبي اني لما اصاحب حد عمري ما اجي على اسلوب حياته واعدله واقوله اعمل دي ومتعملش دي لأن كل واحد في الدنيا نفسه يكون حر وبيكره اللي بيفرض رأيه عليه وانا لأني استمتعت جدا بصداقة فاخر وعرفت يعني ايه ميزة الصديق اللي عمره ما يحاول يفرض حاجه عليك او يخنقك بالنصايح
وحتى لما ابتديت اتعرف على المثليين في المدونات في البدايه كانت عندي اعتراضات لكن كنت ملتزم بالعهد اللي اخدته على نفسي اني ما اعترضش حرية حد وبصراحه زي ما لقيت منهم ناس مش عجبوني خالص وحسيت انهم جايين فاكرينه شات للمثليين وبيدوروا على علاقات وخلاص لكن شويه ولقيت منهم ناس بتتكلم في مواضيع جميله جدا ودماغهم حلوه قوي وبيتكلموا في مواضيع بعيد عن فكرة المثليه وابتديت اعجب بيهم واحاول اقرب منهم
وفعلا خبيت منهم ناس كتير اسلوبهم حلو واحتقرت ناس تانيه فقررت اني اواصل علاقتي بالناس اللي حسيت انهم بيحترموا انفسهم ولغيت كل علاقتي باللي مش عاجبني وخلاص
وكنت سعيد جدا الفتره اللي فاتت لأن برغم بعدي عن النت كله كنت شايفهم كل اصحابي المدونين بيسألوا عني وبيحبوني
وكنت في غاية السعاده ان منهم اللي اتصل بتليفوني يطمئن على صحتي

المهم كل ده حلو قوي بس فجأه لقيت حاجه مش قادر اسكت عنها ايوه انا فعلا مصر اني ما اعترضش على حد او على كلام حد لكن انا اعتراضي المره دي على اللي دخلوا الدين في مجال الحريه الشخصيه طبعا كل واحد حر في تدينه لكن مش حر يغير الدين ويعدله على هواه انا لما بغلط واعمل ذنب مش بقول اني صح وده حلال انا عارف اني غلطان ولو مش مقتنع بكلام الناس مش بدخل الدين في الجدل واحلل واحرم على مزاجي
لكن مش معقول نغير الأحاديث والقرآن يعني انا مش هادخل معاهم في جدل مش هايغير من فكرهم ككتير لكن ارجو ان زي ما انا بحترمك ومش بهين فكرك انت كمان لا تهين ديني ولا تعبث به

انا قولت اللي عندي مش عايز حد يزعل مني بس برده مش عايز حد يزعلني
كلنا احرار زي بعض بس محدش يتعدى حدود الدين



وحشتوني كلكم
سلااااااااااااااااااااااااااااااااام

التاجات جت ....ولا ماجتش

انا اخترت الصوره دي عشان كانت نتيجه اختبار انت شبه مين من القاده مش عارف هم اختارولي كلينتون ليه يمكن عشان هو كمان بيحب مونيكا
التاج ده جالي من الأخت الغاليه داليا الله يسامحها ويديها على قد نيتها واشوفها ظابطه في الجيش كده وتصحى كل يوم من الفجر

قولو امين

انت مين؟

انا ايهاب

في جوايا حاجات كتير مجنونه فضلت حابسها سنين لكن من حوالي بعد ما سبت الدراسه اتجننت واتغيرت وبقيت شنكوتي
مين اكتر 6 اشخاص بتحبهم؟
هبه اختي و مامتي و فاخر صاحبي و عبده اخويا الصغنن واتنين جداد على حياتي مش عايز اقول اسمهم

انت سعيد؟
انا الحمد لله عندي نعم كتير مش عند غيري لكن انا دايما بحب اكون احسن واتقدم واتطور في حياتي عشان كده مش عارف اوصل للسعاده الكامله

لو اجتمعت انت وحسني مبارك في غرفة واحده؟
اكيد هيكون في خمسميت واحد جاهزين يسحلوني من قفايا لو نطقت عشان كده هاقوله ممكن سعادتك تديني حته من العزبه بتاعتك

لو معاك مليون ونص جنيه......تعمل بيهم ايه؟
هاتجوز طبعا وهاشتري فيلا فيها حمام سباحه فظيع وافضل قاعد فيه ليل نهار وافتح مؤسسه للأيتام تعلمهم وتشغلهم وتدربهم على حرف تفيدهم او كورسات تؤهلهم كويس وبالباقي افتح مشروع للنقل التقيل مع خالي

بتحب مصر؟

ايوه بحب بحب مصر البلد نفسها وكنت زمان بحب المصريين بس للاسف فيه ناس مصريين كتير دلوقتي كرهوني فيها
بتحب البنات؟
بموت فيهم يا ناس من اول الطفله الصغيره اللي عندها سنتين وبتجري عليه في الشارع عايزاني اجيبلها شيكولاته قبل ما اطلع البيت لحد البنت اللذيذه صديقتي واختي

مسلم؟

مسلم طبعا الحمد لله
ليه؟
وانا صغير عشان انا اتولدت كده لكن كل يوم بأحكبر اكتر وافهم اكتر بحمد ربنا انه خلقني مسلم وبدعي اني اكون نعم المسلم

مين اكتر شخصية ما تقدرش تستغنى عنها في حياتك؟وليه؟
ياه كتير هبه وهبه الأتنين اخواتي وفاخر صاحبي وناس كتير تانيه

ايه اكتر موقف محرج اتعرضت ليه في حياتك؟واتصرفت ازاي؟
ايه الأحراج ده بس كان واحد زميلنا عازمني على عصير عشان افطر بيه وانا صايم وجه معايا واحد تاني صاحبي فقلتله هاتله هو كمان واكتشفت ان هو جاب لناس كتير ولسه هو مفطرش فأنكسفت اني مخدتش بالي منه وهو عمال يفطرنا ويطمن علينا

معرفتش اعمل حاجه غير اني اسيبه يفطر هو وجبت انا العصير للواد التاني

ايه الأمنية اللي بتدعي ربنا دايما انه يحققها لك؟

ادخل الجنه قبل كل حاجه

اني اتجوز واحده احبها وتحبني وتكون جوازه جنان غير تقليديه

بفكر ابعت التاج ده لكام واحد عزاز عندي قوي لكن اللي عمله قبل كده خلاص واللي مكسل ينفض

دوبه

ميمي

كده سبونسر

العرافه

هل قابلتم يوما عرافه

لا اظن ان كثير منكم قد فعل لكن انا اقدر ان اقول نعم لقد قابلتها هل تذكرون اغنية عبد الحليم حافظ قارئة الفنجان

انا للأسف لم القاها في بيتها او مغارتها ولكني لي الحق فقط في محادثتها من بلوره مسحوره اجلس امامها لساعات اتحدث معها وتكلمني وتخبرني بالحقائق التي غابت عن عيني وهي امامي كلماتها بريئه ورقيقه دائما هي على صواب لم اجرؤ على ان اقترب منها كي احبها لأنها كما اخبرتني قد كتبت منذ الأزل لملك الجان وقد اخذتني مره لأراه وقد هالني شكله ولكنها كانت دائما بجواري منذ فتره القى بعض العفاريت علينا لعنه فدمرت البلوره التي كنت اراها من خلالها وظننت اني فقدتها للأبد ولكن في احدى الأيام وجدت من يهمس في اذني بصوت ناعم مرتعش يسألني انت يا هذا (انت ميت ولا ايه) لم اعرف ماذا اقول اهذا انت ؟

وكيف وصلتي اللي قالت في رقه وثقه انا اعلم كيف اجدك دائما سألتني عن حالي بدونها

ومن جديد اعادت الي الألهام

حتى عندما كنت في اصعب الامي وحزنت لألم صديقي وجدتها تكلمني من وراء السحاب مرة اخرى وتسألني

ماله صاحبك؟

وفتحت لها قلبي كالعاده واخبرتها بكل الأمر

وكعادتها اخبرتني بكل ما يهمني وفهمت منها كيف يكون الكلام وعجزت ان اشكرها

احيانا اسألها ان لكل ساحر بلوره سحريه يرى فيها الأجابات ولكني لم اراكي تنظرين في اي بلوره قالت في هدوء

انت برج ايه؟

واجبتها برج الأسد وفي لمح البصر كانت قد اخبرتني بكل اسراري وصفاتي حتى تمنيت ان تتوقف قبل ان تخبرني بما اخجل ان تعرفه امرأة عني وقلت لها حسنا لقد اقتنعت

وعندما سألتها عن صاحبي سألتني كعادتها عن برجه وطبعا لم اعرف فأخبرتها بيوم ميلاده ومنه اخبرتني بالكثير

اعرف انكم تحسدونني عليها انا نفسي احسد نفسي عليها

انها صديقتي الجديده التي لم اتوقع ان القاها ابدا انا لا اعرف كيف بدا الأمر وكيف اصبحنا اصدقاء ربما كان سحرا خفيا لم اعرفه

بقي ان اخبركم امرا واحدا

ان ساحرتي من بنات شبرا

اسف صديقي .....لم استطع ان احميك

اسف صديقي

نعم انا اسف ممكن تستغربوا وتقولوا انا عملت ايه زعله انا معملتش حاجه وهي دي الغلطه اني سيبت صديقي من غير ما اخد بالي منه وانا عارف كويس قد ايه هو كان محتاج حد يحميه وهو في ضعفه ده

انا حاسس اني شايف السيف مغروز بين ضلوعه والدم بينزف من جرحه وانا واقف ندمان اني اتأخرت عليه

لأنه فنان علمني حاجات كتير قوي اتعلمت منه يعني ايه جمال وازاي اشوف الجمال في حاجات بريئه ورقيقه ازاي لما اشوف ورده اشوف خجلها وجمالها وعلمني يعني ايه حريتي متأذيش حرية الناس واتعلمت منه اني لما يكون عندي صاحب اسيبه يعيش حياته بأسلوبه وبطريقته ومحاولش افرض فكري عليه وعلمي اني مش قاضي عشان احكم على الناس كل واحد يحاكم نفسه وفي الأخر ربنا يحاكمنا كلنا بس يا خساره اتعلمت منه حاجات كتير واتعلمت برده من ناس تانيه عرفتهم ان الدنيا مش خير وجمال بس الدنيا فيها وحوش وشياطين واتعلمت اني اذا كنت ضعيف مش هاقدر اتحمل الضربات الغادره يبقى لازم اضرب الناس قبل ما يضربوني اتعلمت اني لما الناس تخاف منك احسن ساعات من انها تحبك عشان كده مش هايحاولوا يلعبوا بيك اتعلمت امتى اكون ملاك واتعلمت امتى اكون شيطان اكدب واخدع واجرح ناس ولقيت الدنيا كده احلى قوي وبطلت انجرح صحيح ساعات مش بلاقي فرصه اضرب الأول وبنضرب برده على دماغي بس خلاص عرفت ازاي افاديها عشان اطلع بأقل خسائر بس يا خساره اتعلمت كل ده ونسيت اعلمك انت كمان كنت فرحان بيك وبأنك فنان جميل وقلبك طيب قوي نسيت اعلمك اللي انا اتعلمته لحد ما انت جربت انك تنجرح من ناس معملتلهومش حاجه

انا عارف ان الجرح مش جرح قصة حب لكن لو دورت كويس هتلاقي ان مشكلتك انك كنت صريح ومخدعتش حد فالنتيجه انهم هم اللي قرروا يردوا على رفضك ليهم بأبشع الأساليب واذوك قوي

ياريتني كنت جنبك من بدري يمكن كنت لفت انتباههم وقدرت اخدعهم ونكون احنا الظالمين احسن من اني سيبتك تكون مظلوم

الغريب اني اكتشفت اني اتعلمت كل حاجه عن القوه بس نسيت اتعلم ازاي اداوي ودلوقتي كان نفسي اداوي جرحك واوقف نزيفك بس يا خساره انا نسيت اتعلم اني اشفي الجرح عشان مكنتش فاضي اداوي

مش عارف اقولك ايه هل انت كنت غلطان انك كنت بريء في عصر خلصت منه الكرامه والشهامه والأخلاق انت بيقيت فارس جاي في زمن غلط احسنلك ترجع زمنك تاني او تتعلم انك تكون زيي فارس من فرسان الزمن الجديد

بجد يا صديقي انا اسف

ولازال جانبي يؤلمني .......لكن كرامتي بخير

عبرت من سواقي المترو ناحية السلالم المتحركه

اسرعت الخطى كي الحق بالقطار الصارخ في الأسفل

وضعت قدما على السلم المتحرك

جذب قدمي في سرعه لم الحق به تعثرت

كدت اسقط على السلالم المعدنيه

القيت بنفسي ناحية السور

تمسكت بالسير الأسود المتحرك

تمالكت نفسي واعتدلت

وقفت معتدلا ولكن جنبي كان يؤلمني

من اثر الخبطه

كنت سعيدا انني لم اقع بالكامل ولم تهدر كرامتي امام الناس

لكن الألم كان قويا

كان جنبي يؤلمني

ولكن كرامتي كانت سعيده انها لم تسقط امام الناس

صوري في رحلة اسكندريه ولسه فاضل كتييييييييير

واخيرا وبعد طول انتظار فاخر جابلي الصور بتاعتي في اسكندريه انا طبعا كنت عايزكوا تفضلوا متخيلني شبه شوم كونري كده وانا كبير او حتى بيرس بروسنان بس مش مهم الواقع المر لابد من مواجهته

فاخر فعلا فنان في التصوير ايه رأيكم

الواد محمد بتاع الفول

في شخصيات بتمر علينا وتخلينا غصب عننا نقف نتفرج عليها ونضحك شويه او نزعل ساعات وممكن برده نقف نستغرب منها
محمد بتاع الفول هو ولد صغير واقف في محل الفول بتاع ابوه عمره مش اكتر من 13 سنه بالكتير يعني
قصير القامه زي عم فرغلي ابوه مليان شويتين وعنده حتة كرش مش عارف لحق يكونه بالسرعه دي ازاي مع انه مش موظف حكومه ولا متجوز طبعا بس تشوفه وهو ماشي ناقص يدحرج ومع ذلك فحركته نشيطه جدا وبيقتح المحل من 7 ص يعني قبل كتير من المحلات الأخرى ويقف محمد لوحده الصبح يقطع الخضره للطعميه ويثبت القدره في مكانها على النار الهاديه ويظل يعاكس في اللي رايح واللي جاي ويتريق على الأولاد اللي اكبر منه وبيشتغلوا في المحلات المجاوره الغريب اني تخيلت محمد هذا لو انه التزم بدراسته فقط وترك مهنة ابيه لربما رأيته ببدانته هذه مسخرة الطلبه الذين لا يجدون متعه اكثر من السخريه من كل طفل او طفله بدينه وربما اصبح ضعيف الشخصيه لا يفقه من خبرات الحياه شيء ولكنه الآن يتلعم الكثير من الدنيا هو يعرف معنى ان يعطي للرجل الفقير الذي يمر عليه صباحا بعض الطعام ليفطر به بدون مقابل اللهم الا الدعوات له ولوالده بالصحه والخير ويعلم ان عليه ان يعير جيرانه بعض المواد اذا نقصت لديهم من شنط واوراق وملح وبصل لأنه سوف يحتاجهم في يوم ما وسيقرضونه ما يحتاج ايضا وهو يعلم متى يرفض ان يعطي شخصا مشاكسا البضاعه على الحساب لأنه ليس عبيط ولن يستكرده احد وايضا تعلم ان يعطي الزبائن المضمونين بضاعتهم اذا لم يتوفر لديهم فكه في جيوبهم ويدفعون لاحقا لنهم زباين مضمونين ولن يخسرهم عشان ربع جنيه مالوش لازمه وهو ما لا يدركه ال كل بائع عرف معنى التجاره واهمية رضاء العميل هو ايضا يعرف ان عليه ان يدفع للبعض كي يسكتوا عنه من التموين والضرائب وخلافه
هو الآن لم يصبح طفلا ذو 13 عاما هو الآن رجلا عاملا يعرف مسؤلياته قد تقولون لي انه يفقد اجمل ايام عمره وطفولته في هذا الشقاء ولكنني لا ارى ذلك في عينيه الضاحكه دائما فهو سعيد جدا بكونه اصبح رجلا يعمل وليتك تسمعه وهو يسمس كل واحد من اقرانه حسب وظيفته فهذا الواد فينو شغال في الفرن الأفرنجي وهذا جبنه شغال عند البقال وغيرهم اما ذلك الواد الذي لا يناديه الا بإسم الصايع فهو لا يعمل لقد كان يعمل في محل الجزاره ولكنه تركه بعد ان مل من العمل اصله عيل حرع ومش راجل
لقد اصبح يقيم الأشخاص بعملهم ويعتبر نفسه من قوى الشعب العامله
الغريب انه لم يترك المدرسه كل ما في الأمر ان مدرسته صنايع او تجاره لا اذكر بالضبط فقد اخبرني من قبل ولا اذكر الآن المهم انهم لا يهتمون بالحضور او الغياب هو فقط يترك اباه في ايام الأمتحان عشان يروح يمتحن
الجميل هو اني وجدت اباه يعامله معاملة رجل لرجل لم يعد منظر الواد بليه اللي الأسطى عمال يفرغ فيه عقده واحباطاته بل هو الآن مثله مثل اي موظف ليه حقوق وممكن يعترض على رأي ابوه في الشغل في حدود الأدب وضحكت جدا عندما احتدم النقاش بنهم مره واخذ يبرطم بكلام غير مفهوم فنهره ابوه بتقول ايه ياض فاسرع قائلا بقولك هاتجيب خضره للطعميه دلوقتي ولا استنى شويه فتناسى الأب ما حدث واسرع قائلا لأ استنى شويه لما نعوز واللي هنا يخلص ابقى روح جيب وانتهى الموقف في هدوء
قد يكون محمد مظلوم في هذا الوضع وقد لا يكون انا لا اعرف
اخبروني برأيكم واشخاص مثله قابلتموهم

خلاص يا بابا والله مش حعان حرام كده

مش عارف اقولها ازاي بس انا بصراحه تعبان من الموضوع ده قوي ومخنوق وعايز ابعبع شويه يا جماعه

انا مش عايز اكل مع بابا تاني في الشغل

طبعا هتسألوني ازاي

اصل انا سبت شغلي القديم ورحت اشتغلت مع ابويا في نفس الشركه اللي هو شغال فيها وكنت بشتغل قي مكتب فيه 3 شباب فقريين جدا وكانت ايام دماغ طول الوقت نهرج ونهزر ونحكي لبعض على مشاكلنا وخطط المستقبل وهووب ابويا كان طبعا بيحاول ينقلني مكان احسن ويا سلام لو يكون في نفس الإداره بتاعته عشان نبقى جنب بعض طبعا انا لما بقيت بشتغل معاه في نفس الشركه بس بيني وبين مكتبه حوالي 200 متر وبشوفه قليل كنت زهقان من انه كل شويه يسأل عني وعايز يعرف كل خطوه بعملها طول اليوم المهم ان انا دلوقتي بقيت جنبه بالظبط يعني هو في الدور الأول وانا في الدور التاني على طول وطبعا ما ادراكم بإن ابوك يبقى جنبك بالظبط كده طول الوقت عايزني عنده وعايزني افطر واتغدى ويمكن كمان اتعشى هنده ماهو احنا بنقعد في الشركه 12 ساعه متواصله ويا سلام لو عايز اغيب يوم يفضل يسألني ليه وعشان ايه اكتر من المدير بتاعي وطبعا مينفعش اقوله معلش حضرتك اصل عمتي ماتت ورايح ادفنها ويا سلام لو شافني خارج من المكتب على طول يروح صايدني من قفايا انت رايح فين وليه وهو ده شغلك وانت ليه بتروح هناك ومتتأخرش كتير هناك وطبعا نظام الصداقه ده شيء تاني ممنوع عليه اني اصاحب اي حد يكون هو شايفه دمه تقيل او شخصيه مش محترمه وساعات بيكون رأيه مبني على اعتقاد شخصي غير صحيح لكن هو انا اقدر اعترض ده غير الناس اللي بتتبرع مشكوره بإنها تبلغه عن اماكن تواجدي طول اليوم عشان يطمنوه عليه المهم بقى ان انا ساعات بحب اروح اقعد او اكل مع اصحابي اللي كانو زمايلي في المكتب القديم فبعيدا عن انه عايزني انسى بقى الناس القدام واتلفت لمكاني الجديد فأنا مينفعش اكل مرتين يعني لو كنت فطرت معاهم ببقى مش جعان لكن لو اتجرأت وقلت لأ مش عايز اكل انا مش جعان تبقى مصيبه واكيد انا مبوز عشان اسد نفسه وانا جاحد وناكر للجميل يا عم انا بقولك مش جعان هو بالعافيه المهم انا تعبت خلاص وبقيت على طول بطني بتوجعني من كتر الوجبات المذدوجه

وطبعا هاتقولولي خلاص متاكلش مع زمايلك وخلاص لكن انا بحب اكل معاهم الأكل برضه مع اللمه الحلوه واصحابك ليه طعم تاني بس تقول ايه

لكن طبعا لسه فيه جزء تاني لسه لازم احكيه الأول عن ابويا وطبيعته قبل ما اكمل

وللحديث بقيه......سلام

ايوه يا بابا جاي اهوه عشان ناكل

عن اذنكم عشان رايح اتغدى للمره التالته

مص صدر زميلتك عشان تبقى امك..........والله حاجه تكسف

يعني يا ريت حد بس يأكدلي او ينفي يعني هو فعلا ده حصل ولا مجرد اشاعه

هو صحيح ان فيه حد بيفهم يقول الكلام ده

يعني ايه عايزين يخلوا الخلوه بين الموظفين شرعي يعني هو الحل انهم يرضعوا بعض ممكن حد يقولي العك ده معناه ايه

يعني انا اجيب واحد شحط واقوله ان مينفعش تقعد مع زميلتك لوحدكوا عشان الشبهه بمعنى انه حرام انك تلمسها او تشوفها لوحدكوا عشان الشيطان

اقوم انا اقوله قوم حط صدر زميلتك في بقك وخدلك مصتين عشان بعد كده تقولها يا ماما

يعني راجل بكامل فحولته وشهوته يعمل ايه بلاش كده...نفرض ان

انا مثلا لو واحده زميلتي وقالولي بس الفكره ممكن يجرى حاجات كتير قوي ادخل بعدها السجن بتهمة اغتصاب انثى

ده جنان يا جدعان موضوع الرضاعه ده بيحصل لعيل معندوش اي حاجه تتأثر بشكل جسم الست يعني من الآخر صدر الست بالنسبه ليه هو مجرد شكل من اشكال معلبات التغذيه

اما الشحط الكبير فلو بس زرار البلوزه بتاعتها اتوارب شويه ممكن عينه تنط تمزع بقيت البلوزه

على العموم بالشكل ده ممكن نقنع كل بنت محترمه انها تستقيل من شغلها

وانا عن نفسي بعد ما اطمن ان كل بنت او ست بتمثل لي حاجه في حياتي سابت الشغل خلاص واطمن عليهم

هاكون اول واحد يشجع

واول واحد يشفط اول مصه

اصلهم بيقولوا ان لبن السرسوب مفيد قوي

وسامحوني على كلامي بس اصلها بقت حاجه تنرفز

نافذه على العالم وجولة الكاميرا وحاجات كتير بالشكل ده

حد فيكوا يفتكر برنامج نافذه على العالم
كان برنامج مدته حوالي خمس دقائق ولكن كان الواحد بيقعد يتفرج كانهم حلم جميل البرنامج بيعرض لقطات من اغرب الحاجات في العالم يعني فقرات من كل بلاد الله وكانوا يجيبوا حاجات تضحك قوي عروض سيرك حيوانات غريبه ناس بتعمل حاجات مجنونه ودايما كانوا يجيبوا عروض ازياء بس مجانيني خالص هدوم مش للبس بس تضحك جدا
الغريب اني معرفش البرنامج ده اختفى ليه
برنامج جولة الكاميرا
وبرده كان بيجيب حاجات من كل الدنيا مناظر طبيعيه وعجائب الشعوب وكانت المذيعه ست شيك قوي وحلوه بس مش عارف اسمها ايه وكان ليها اسلوب كده تحب تقعد تسمع صوتها وهي بتحكي
وطبعا برده تم الغاء البرنامج مش عارف ليه

وطبعا كان فيه برنامج مواقف وطرائف وكان زمان بيجيب حاجات حلوة قوي لكن فجأه حبوا يطوروه عشان ينافس برامج الفضائيا الجنبيه اللي بتلعب على نفس الفكره لكن للأسف بقى سخيف قوي ومكرر وتحس انه فقد شخصيته المميزه
حاجات كتير كانت حلوه لكن اختفت من حياتنا مش عارف ليه
يا ريت كل واحد يفكر معايا في حاجه كان بيحبها في صغره لكن بطلوها بدون سبب
وسلااااااااااااااااااااااااااااااااااااااااااااااااااام
______________________

خايف بكره يلاقوا المدونات شيئ جميل يقوموا يلغوها

آخر حاجة لأحمد فؤاد نجم وبقينا زي الفراخ

آخر حاجة لأحمد فؤاد نجم

طاطي راسك طاطي طــــاطي

انت ف وطن ديمقراطـــــــي

انت بتنـــعــــم بالحــــــــــرية

بس بشرط تكون مطاطــــــي

لما تكون شغــال بذمــــــــــة

خايف على مصــلحة الأمــة

شغلك يطلع من غير لازمــة

علشان مبيعلاش غير واطي

طاطي راسك طاطي طاطـــي

انت ف وطن ديمـــــقراطي

لما حاميها يكون حراميــها

وبلاده ورا ضهره رامـيـها

طالع نازل واكل فيـــــــــها

مسنود بالبدلة الظباطــــي

طاطي راسك طاطي طاطـــي

انت ف وطن ديمـــــقراطي

لما شــقاك يصــبح مش ليك

فقرك سد السكة علــــــــــيك

تتلفّت تلــــقى حـــوالـــــــيك

إما حرامي و إما عقــــاطي

طاطي راسك طاطي طاطــــي

انت ف وطن ديمقراطـــــــي

لماتلاقي بـــــلاد الـدنـيـــــــا

فيها البني آدم حــــاجة تانية

وانت في الطبقات الـــــــدنيا

قرد مسلسل أو وطواطــــي

طاطي راسك طاطي طاطـــي

انت ف وطن ديمقراطــــــي !

لما الجهلة يبــــــقوا أمــامــك

أو فوقك ماسكــين ف زمامك

ويسوقك ع الهــلكة إمامك

تشرب م السم السقـــــراطي

طاطي راسك طاطــــي طاطي

انت ف وطن ديمقـــــــراطي

لمــــا الكلـــمة تكون بتدينـك

لما تخبي ف قلـــــــبك دينــك

لما الذل أشوفه ف عيـــــــنك

هات إحباطك على إحباطــــي

طاطي راسك طاطي طاطـــي

انت ف وطن ديمقراطــــــي

انت ف وطن ديمقراطـــــــي

وديه قصيده ل اخمد فؤاد نجم بعتهالي صديق عمري واخي احمد فاخر

يارب تكون خلصت الصور بتاعتي يا احمد

هي المخ وانا العضلات

طول عمري نفسي اتكلم عنها واحكي لحد قد ايه بحبها طبعا لأن هي اللي فتحت عيني لقيتها الريسه والزعيمه والثورجيه والمحامي بتاعي واختي واخويا كمان وسعات بتبقى المفتريه البلطجيه بس ده زي شغل العيال بلطجة اطفال يعني
اصل هي اكبر مني بسنه واحده وكنا طول عمرنا كأننا توأم وماليش اخ اكبر
ولأنها شخصيه قياديه بطبعها وانا اصلا وانا صغير كنت جبان جدا وبمشي وراها على طول فكانت هي الزعيم وانا بنفذ على طول وطبعا كنا لما بننضرب كنا بننضرب سوا
لما كان بابا يبعتنا نجيب حاجه من الشارع لازم ننزل مع بعض وطبعا كنا بنمشي بطريقه رائعه نقعد نتنطط ونتمرجح في طريقه غريبه وهي مشيه مش عارف اوصفهالكوا ازاي المهم مره كنا ماشيين وعدينا جنب اتنين مخطوبين ماشيين على مهلم طبعا واحنا روحنا ورجعنا وهما لسه في اول الشارع روحنا ضاحكين عليهم قوي وقولنالهم هو انتوا لسه هنا راحوا ضحكوا قوي مش عارف ليه
ولما كنا نجيب حاجه حلوه ونقعد نخطط ان احنا نشترك وتجيب حاجه معينه بس غاليه شويه ونقعد نحوش لحد منجمع تمنها ونروح سوا نجيبها احساس فظيع بالإنتصار وكانت هي اطول مني بشويه وكانت تحط ايدها على كتفي واحنا ماشيين وانا اقولها هو انا امتى هاطول واحط ايدي على كتفك واحنا ماشيين وكانت تقولي ان هي هتفضل اطول مني لكن سبحان العاطي الوهاب انا بقيت دلوقتي اطول منها بحوالي 20 سم
بس للأسف ماسكه عليا صورهكان خالي صورهالنا عند مصوراتي صاحبه وكنت لابس بدله لبني وهي لبسوها طرحة عروسه وكنا شكلنا مسخره العريس قصير جدا والعروسه عماله تضحك عليه
الغريب اني لما كبرت وبابا خلاها تبطل تنزل معايا نشتري من الشارع عشان انا كبرت ومش محتاجها
تعبت جدا لأني كنت بحب جدا هزارنا في الشارع وكلامنا وفضفضتنا لبعض
لأ واللي يغيظك انهم عايزيني اخد عبده معايا وده واد كسلي طول عمره وانا متعود اني امشي مع دماغ بتفهم مش دماغ نسوسه
طول عمري وهبه هي اللي بتتخانق في البيت عشان تجيبلي حقي وابويا يتغاظ منها ويقولها هو انتي المحاميه بتاعته
بس هي ايه ولا يهمها برده ترجع تتكلم تاني مش عارف افتكر ايه ولا ايه
هي اللي خلتني اعرف انجليزي كويس لنها بتحبه جدا وهي اللي كانت بتخليهم يدوني دروس عند المدرسين اللي هي عارفاهم كويسين وكانت بتساعدني فيه وطبعا انا دلوقتي كل ما اتزنق في كلمه اسألها اصلها اتخرجت من اداب انجليزي وعملت دبلومه في الترجمه كمان اصلها شاطره وغاويه مذاكره انا بقى ما صدقت خلصت الكليه ومش عايز اعتبها تاني
وعشان تكمل افضالها عليا بتشتغل دلوقتي في المصريه للإتصالات وبتجيبلي اي نمره انا عايزها وببلاش من غير ما اتصل بالدليل ويا سلام لو حد عاكسني بالتليفون بعرف اسم عائلته كلها وعنوانه ايوه انا بقيت راجل صاحب اتصالات
وحتى في موضوع الجواز هي اكتر واحده بتشجعني وبتساعدني
يا رب اسعدها واكرمها وحقق لها كل احلامها
وختاما تحياتي اليك يا اختي وتاج راسي

انا مش بهزر مع حد انا جد جدا جدا

مين منكم ممكن يقولي ازاي يعرف ان الشخص اللي قدامه وبيكلمه ده هيتحول لشخص تاني خالص فجأه كده وعلى سبب غريب جدا
يعني مثلا واحد تتعرف بيه وتبقى مبسوط قوي وتقول يا سلام على الشخصيات المحترمه ده انا محظوظ اني بتعرف على ناس كويسه كده
لكن هوووب تلاقي الواحد من دول بيعاملك فجأه كانك حشره عنكشيه متخلشه ومحدش يقولي يعني ايه المهم انك ممكن في الأول تقول ياه ده تلاقي في مشكله كبيره عنده ومضايقاه يعني لازم تتحمل صاحبك في ازمته امال صاحبك ازاي بس الغريب انك تكتشف ان الحكايه انه خلاص قرر يعتبرك مش على مستوى صداقته او معرفته
انا ممكن اكون يعني بحب اهزر كتير لكن ده مش معناه اني بحرج حد بكلام سخيف انا بس بحب اهرج لكن تلاقي واحد بيرد عليه بنرفزه انت ايه اللي بتقوله ده اعرف حدودك وكاني غلطت في سلطان الماهايا يعني المهم انا قررت اني احاول امسك نفسي في موضوع الهزار ده يعني استنى اشوف الأول مين عنده استعداد للهزار وبيحبه وهو اللي يبتدي وبعدين انا هاهزر معاه على طول
الغريب انهم بيقولوا ان الشعب المصري ابن نكته
وعجبي
سلاااااااااااااااااااااااااااااااااااااااااام
يا ريت لو حد يعرف ميعاد مقابلة المدونين المصريين يبقى يقولي مش كل مره تفرقعوني كده
عيب عليكوا ويا ريت يوصفلي العنوان لحسن انا زي ابو عمه مايله في الليله الكبيره لعمنا صلاح جاهين