شاب شنكوتي

وصحي المارد

2012-01-11T09:40:00.001+02:00

انا جدي زمان حكالي تحت البلد دي مارد

في تراب الأرض غاطس

مدفون وفوقيه بلاوي

قطران وحديد ودبش

وفوقه دبحوا كبش

علشان ميقومش ابدا

وعيونا متشوفوش

كان جدي تمالي يدعي

تيجي ايد تنش وتحفر

ونشوف من تاني مارد

يلم كل شارد

يخضر المزارع

ويدور المصانع

ويعلم في المدارس

بسنانه الحاميه ينهش

في ضلوع اللي خاربها

واللي يجيها يحاربها

لكن يا خساره جدي مات السنه اللي فاتت

في طابونه عيش شاطوه

الخبطه كانت شديده وقع مقامش تاني

عالأرض دمه سال

اكمن دمه حامي

عمل في الأرض مجرى وصلت للألف مارد

صحت في شعب بلدي مليون مارد ومارد

وقفوا في وش الرصاص بالحق وبالهتاف

واتزلزلت بلادي

كان نفسي يا جدي تحضر

وتشوف اهلك وناسك

الخوف هجر عيونهم ومكانه في كرامه

متشكرين يا جدي دمك بدأ الحكايه

كدبه

2011-12-16T22:51:00.000+02:00

لما اتنين ماشيين في طريق وتقابلهم عقبه فواحد منهم يهرب ويقول اصلي خايف العقبه دي تفرق بينا وتزعلنا من بعض فأنت عديها لوحدك وبعدين اندهلي يبقى بيبيعك ولا بيحافظ عليك

لو حد فاهم يقولي

خساره اللي كنت بعتمد على فهمهم زمان كلهم انشغلوا او بعدوا

فين ايام زمان

الثقات

2011-10-19T14:56:00.001+02:00

قامت الثوره وقامت معها الدنيا وحلمنا بالتغيير

لكن

ودائما كلمة لكن تعيش خلفها كائنات ووحوش وبلاوي سوداء كثيره

فالثوره هاجمت الرؤوس الضخمه متخيلين ان قتل رأس الثعبان سيقتله تماما لكن للأسف ثعبان مصر مثل البورص تقتل الرأس فيظل الذيل حيا يرقص طربا بنجاته والمصيبه ان الذيول كثيره جدا وليس ذيلا واحدا

كنت مصدوما في اشخاص احترمهم واقدرهم جدا ولكني فوجئت بأن تفكيرهم هو نفس تفكير الفساد السابق

لا يهم كفائتك ولا خبراتك المهم الثقه

يخرب بيت دي كلمه

الثقات :هم الشخصيات عديمة الكفائه الفنيه والأداريه الكسالى ذوي الرواتب الخياليه والمكافئات المخفيه لا يقومون بأي عمل غالبا الا فيما ندر ولكن يمتازون بالخنوع والخضوع التام وتقبل الأهانات بصدر رحب لا يظهر لهم اي طموح حقيقي ولا رغبه في تطوير انفسهم او غيرهم ومع ذلك يصلون لأعلى المراكز

هؤلاء فقط لهم الحق في كل شيء

تفشل مؤسسات كامله وقد تصل للإفلاس بسبب غبائهم وكبتهم للكفائات حولهم ولكن كل هذا لا يهم ماداموا من الثقات

والمصيبه الثانيه هي ان شعور اصحاب الكفائات بالظلم وتعودهم على الصدمات والضغط المستمر يتحول بعض منهم الى كائنات يائسه بائسه لا يقاوم ولا يحاول مره اخرى والبعض يتحول الى مخربين والنتيجه واحده

المركب هتغرق يا رجاله كله ينجى بنفسه

وسلامتها ام حسن

فليسقط الفيتو

2011-09-14T09:17:00.000+02:00

ادعو كل انسان مسلم ومسيحي

مصري او غير مصري

ان يقف ويقول كلمة حق

ان يعلن العالم كله رفضه لحق الفيتو

لا افهم معنى الفيتو والغرض منه.

هل هي وصايه للقوه العظمى امريكا؟ ما معنى الديموقراطيه اذا احتفظت امريكا او غيرها من الدول بحق الفيتو اي عداله هذه التي يتشدقون بها ويتفاخرون بتطبيقها ومناصرتهم للضعفاء

ان يقتل شعب فلسطين وتغتصب ارضه ويباد بالكامل وتقرر امريكا استعمال الفيتو لحماية اسرائيل للمره المليون

ان امريكا لا تخجل من خلع ستار الشرف وتكشر عن انياب الغدر والطمع والوحشيه والتخلف لتعلن للعالم ان العاهره المحببه لديها لا يمكن ان تهزم وامريكا موجوده

في الماضي حاربت اسرائيل ليعترف بها العالم وطبعا بدعم من الأمريكان حصلت على اعتراف الجميع

والأن ترفض امريكا ان يعترف العالم بفلسطين وهل فلسطين اصلا غير معترف بها كدوله

انا لا افهم ما حدث للعالم كله هل اصاب الخرس كل الدول

اوباما نجم الشاشه الأسود صاحب نوبل الذي استخف بعقولنا وداعب احلامنا في شخص محترم وقائد عادل لدوله ماجنه لكن يبدو انه لو كان بهذا النبل الذي ادعاه ما وصل لهذا المنصب

هذه هي امريكا تعلنها للعالم دائما

انا الأقوى انا اسحق كل ما يقلقني ولا يوجد عدل ولا حقوق ولا شيء يعلو فوق صوت الفيتو

ادعو الله ان تزول امريكا واسرائيل في القريب العاجل بأيدي المظلومين

فليسقط الفيتو وتسقط امريكا

رمضان روح يا ولاد

2011-09-04T14:15:00.000+02:00

زي كل سنه برده انتهى رمضان وجري بسرعه

وعمري ما حسيت اني شبعت منه ولا اني اديته حقه

اللهم بلغنا رمضان القادم وتقبل منا اعمالنا واغفر لنا جميعا

كل سنه وانتم كلكم طيبين وبخير

سلااااااااااام

رمضان جاني

2011-08-06T09:57:00.003+02:00

طبعا كل سنه وانتم طيبين

يا اهلي

يا اصحابي

يا مدونين يا حبايبي

يا مصريين

يا مسلمين الأرض كلها

اخيرا رمضان رجع تاني انا حاسس انه رجع علشاني انا رمضان جاني مش رمضان جانا

رمضان براحته النفسيه

برحمة ربنا ومغفرته والعتق من النار

بالثواب المضاعف مئات والاف المرات

بالطمع في الجنه ونعيمها

بالأمل في انك تكون من الفائزين

رمضان شهر التصالح مع نفسي ومع الناس

الحمد لله الذي بلغني رمضان

يارب اكتبلنا فيه اعلى الدرجات وارزقنا ليلة القدر وثوابها كله

اللي عايز يستغفر يلحق يا جماعه اللي عايز رحمه ورزق وسعاده وهدوء نفسي يلحق يطلب

اللي عايز اي حاجه يقوم بالليل يدعي ربنا الذي لا يغفل ولا ينام ويسأله وهو كريم قوي هتلاقوا كل اللي هتتمنوه منه

كونوا على يقين بده وان شاء الله هيرزقكم كل اللي عايزينه

متنشغلوش بالمسلسلات والبرامج ده شهر رمضان مش شهر الضياع

كل سنه وكلكم طيبين

انا عايز اكون مسؤول

2011-07-14T09:53:00.002+02:00

امبارح في الراديو كان في برنامج عن الوزاره واعبائها والمنصب الوزاري وصعوبته وايه رأي كل واحد هل يحب يبقى وزير ولا هيخاف من المسؤليه وهل المنصب ده ممكن حد يمسكه ويرضي الناس كلها ووووو

حسيت اني بسمع برنامج مسكنات من بتاع النظام الزفت البائد
كل حاجه صعبه والمسؤوليه كبيره ولازم نتحمل المسؤولين اكتر من كده ونصبر عليهم
يا عالم اللي مش قد المسؤوليه بيتحملها ليه
ولا هي طفاسه وخلاص
اللي بيقبل منصب كبير بيقبله ليه وهو مش هيقدر عليه

رد واحد من المتصلين بالبرنامج وقالهم انا عايز ابقى وزير تقوم المذيعه تقوله علشان الوجاهه والمنصب يعني
قالها لأ علشان ده واجب وطني ان كلنا نبقى مسؤولين في بلدنا ونقوم بيها والسيد الوزير اللي مش قادر يقوم بمهام منصبه يتفضل متشكرين ليه قوي ويرحل من غير صداع
عجبني رده عليها
احنا مش عايزين النظام القديم بتاعهم الوظائف والمناصب تتوزع على الحبايب بس

احنا عايزين ناس كفاءه بجد
عايزين ناس تقوم بالبلد دي بجد
عايزين ناس عارفه يعني ايه ثوره
ولا هم متهورين ولا هم متخاذلين
ولا يكونوا طمعانين ولا يكونوا مستغنيين قوي برده لأن المستغني عن البلد دي مش هتفرق معاه قوي
عايزين ناس رجاله بجد

وانا متأكد ان مصر فيها رجاله كتير جدا بمعنى كلمة رجاله

سلاااااااااااااااااااااااااااام كبير لكل رجالة مصر

عايزين اختراع

2011-07-04T08:15:00.003+02:00

علشان البلد دي تنهض لازم اول حاجه نفكر فيها هي التفكير العلمي والبحث العلمي

يعني عايزين كل واحد يشغل دماغه ويخرج بفكره جديده

كل واحد يحاول يتعلم ويقرأ في كتب العلم والعلوم المختلفه لأن مش شرط كلنا هنخترع لكن اكيد لو كلنا دماغنا تفتحت للعلوم هنتقبل الأفكار العلميه بصوره احسن وهنقدر نساعد المفكرين

واللي يقدر يعلم الناس يحاول

واللي يقدر يوصل لطرق الصناعات الحديثه ينشرها على النت وباي طريقه علشان كلنا نتعلم

يعني صناعات الكمبيوتر

والبوردات بتاعة الأجهزه

مش معقول نستورد ملايين الموبايلات والأم بي ثري والأجهزه التانيه ومش عارفين نصنعها هنا

تخيلوا كم التوفير والنمو اللي هنوصله لو حققنا ده وصناعه زي دي بقت في بلدنا

مش معقول يبقى عندي 29 سنه ولسه مش عارف البروسيسور ده بيتعمل ازاي وبيشتغل ازاي

والصينين بيصنعوه تحت السلم عندهم

الفوانيس ولعب الأطفال الصيني مش عارفين نعمل زيها ليه

التكنولوجيا يا ناس

الله يخرب بيت كل واحد في النظام القديم وقف في وش مشروعات التكنولوجيا

شايفين ماليزيا وصلت لإيه وهم اتحرروا بعدينا ب25 سنه

حرام على المصريين نبقى اجهل دول العالم ومش عارفين نعمل حاجه كده

فين العقول فين المهندسين فين المبدعين

كفاينا بقى تفاخر بعدد الرقاصات والفنانات والعاهرات في بلدنا وكأن كل حضارتنا تنحصر في اجساد النساء

يارب انصرنا

قله مندسه

2011-06-27T08:07:00.002+02:00

واضح اننا هنرجع تاني لموضوع قلة مندسه
والقله المندسه دي هم الناس اللي بيعملوا كل التصرفات الغلط حوالينا
زمان كانت الحكومه بترمي عليهم غلطاتها
المصيبه دلقوتي ان الشعب هو اللي بيعمل اخطاء الحكومه وبيدور على القله المندسه علشان يتهمها
لما نلاقي الاف الأفدنه الزراعيه بتتحول لمباني وتتخرب علشان تتباع بالغالي وهي اصلا بقت بالرخيص
لما نلاقي كل واحد ساكن في عمارة مساكن شعبيه فجأه بنى لنفسه شقه فوق العماره وتنهد بقى العماره على اللي فيها مش مهم وبقيت الجيران كل واحد بنى غرفتين جنب شقته هتقولولي ازاي اقولكم من الدور الأرضي بيبنوا بيت مجاور لعمارتهم ويلزقوهم في بعض وطبعا دي ارض الدوله وسلمولي على الدوله بقى وبعد كده علشان الردم والتكسير والحجاره محدش يلاقيهم وياخد باله من الجريمه قال يعني العماره اللي طلعت مش هتبان ياخدوا الردم ده ويرموه في وسط الطريق العام قدام العربيات وشوفولنا البلديه تلم بقى
والمصيبه لما تلاقي واحد بيرمي الردم فوق الدائري يعني لو عربيه لبست فيه او اتقلبت بسببه شوف كام واحد هيموت بسبب الحيوان اللي رمي الردم ده في طريق الناس
اللي بيحصل ده نفس جرائم الحكومه اللي غارت
سرقة اراضي الدوله
تخريب الزراعه والصناعه
تدمير البلد
ضياع الأمان وزرع الخوف
انا مش عارف ده لمصلحة مين الناس بتدور على السرقه والنهب كأنها مش بلدهم وكأن البلد كلها حراميه
حسبي الله ونعم الوكيل

تحرير ميداني

2011-06-23T10:13:00.006+02:00

كتاب جديد ورائع ان شاء الله في الأسواق قريبا جدا وهو من تاليف مدونه ممتازه الأستاذه : رشا ابو السعود

ده اللينك بتاع مدونتها قصص بالهمزه

ورشا بتكتب قصص في مدونتها من زمان وانا اتهبلت بيهم بجد وعجبني جدا اسلوبها وافكارها القصص واعتقد هتعجبكم جدا

قريب ان شاء الله هتعمل حفلة توقيع للكتاب واكيد ان شاء الله هكون هناك اتمنى تيجوا كلكم ويعجبكم الكتاب

الف مبروك ليكي يا رشا على الخطوه الهايله دي وبالتوفيق وعقبال الف كتاب باسمك

عصفور وغار

2011-05-19T11:44:00.003+02:00

عصفور وغار
تحلم وتحلم كل يوم

وتنام تقوم بردك بتحلم
وفي يوم تقوم

تلقى اللي كان في الحلم اصبح واقع حصل
تفرح تطير وتنط فوق عند القمر
تنده صحابك والجيران
تنده توريهم جنان
مجنون وفرحان بالحياه
احلامه صبحت كلها ما بين ايديه
لكن خساره الحلم كان.. لعبة حواه
الحاوي شطب لعبته
وجبت عليه ساعة الرحيل
لم السيخين والمنديلين
جوه القفص حط الطيور
عصفورك الحلو اللطيف
اللي اتولد هنا بين ايديك
الحاوي اداك منديلين

وفي براعه مذهله
قالك بسرعه افتح عينيك علشان تلاقيه بين ايديك
عصفور جميل
ترقص تزغرد من الفرح ترقص معاه
لكن خساره الوقت راح
والحاوي عايز عدته
عصفوره راح ياخده معاه
سابك هنا وسط الطريق في الشارع الزحمه الكئيب
قابض على ريشه بخيالك
كأنه لسه بين ايديك
يا خساره راح
لكن هقولك كلمتين
انسى اللي راح
عصفور عبيط خليه يروح
مع سيده غار
بكره تلاقي اللي يداويك
عصفور جديد يرتاح معاك ويكون وفي
اوعاك تبص وراك عليه
عصفور وغار

يا تحافظوا على الثوره يا متستاهلوهاش

2011-05-05T11:24:00.004+02:00

ايه يا رجالة مصر

اقول فيكم ايه

صحيح ان الشعب اثبت ان فيه رجاله وقفوا ضد الظلم

صحيح ان الشعب اثبت ان لسه جوانا معدن اصيل

لكن المشكله لسه في القله المندسه اللي بنقول عنها كل مره

اللي بيثيروا الفتن ويثيروا الشغب ويثيروا الفوضى اللي يتحرقوا بجاز دول

ودول عدد مش قليل لأننا في مصر اعدادنا كتير فكل ظاهره عندنا بيكون فيها عدد كتير

يعني البلطجيه والحراميه اللي عمالين نسمع انهم هجموا على فلان وقتلوا فلان وسرقوا فلان

البياعين اللي استغلوا الظروف وبيجزرونا

النصابين اللي شغلهم ابتدى يذدهر تماما

اللي بيخطفوا الأطفال وطلبوا فديه

اللي بيبني فوق اراضي زراعيه ويعلي ادوار بدون ترخيص ويبني فوق اراضي الدوله

المصيبه ان معنى اللي بيحصل ده ان ايام الفساد كان مجموعة الكبار هم الفاسدين دلوقتي الشعب كله بيفسد ورا بعضه

يبقى الحل ايه يا اما الحكومه تكون مواقفها حاسمه شويه يا اما نروح نرجع البرنس وعياله يحكمونا بقى

الخلاصه يا نبقى قد المسؤليه يا اما منستهالهاش

ورساله مني لكل كلب بيسرق او بيبلطج او بيظلم انتم اقبح وجه للخيانه

خيانه لبلدكم ولأهلكم ولكل شهيد مات وهو عايز ليكم الأحسن

اه يا دماغي

2011-04-24T14:08:00.003+02:00

قعدت اقول بكره احلى بكره احلى واصبر تنول

لحد ما لقيت انك مادمت راضي بحالك كل الناس بتعاملك على انك هتفضل راضي طول عمرك حتى لو اخدوا حقك قدامك وادوه لناس تانيه ولو اتكلمت بقى يقولك ايه انت اتغيرت احنا مكناش فاكرينك وحش كده

طيب بالعقل كده

رئيسك اللي على المعاش هيمدوله تاني بعد المعاش ومش هيطلع معاش وهيفضل ياخد 3 اضعاف مرتبك ويشتغل ربع شغلك بالأضافه للبرستيج طبعا وانت هتفضل زي ما انت وهيجيلك زميل جديد مبيعرفش حاجه مطلوب منك تعلمه وفي نفس الوقت مرتبه هيبقى اعلى من مرتبك وهيتساوى معاك في الوظيفه ورئيسك طبعا اللي مدوله بعد المعاش ده مبسوط قوي وكل اللي يهمه انه هيفضل قاعد على قلبك ومش مهم مستقبلك بقى

المهم انك لما تاخدك الكرامه وتقرر تسيب وظيفتك وتتنقل قسم تاني تبتدي من اول وجديد جايز تلاقي مستقبل احسن يقوم يقولك مينفعش منقدرش نمشيك امال مين اللي هيشيل الشغل اقعد غصب عنك واللي يعجبك اعمله

المشكله ان مديرنا اللي عمل كده معايا كان اعز الناس عندي وبقدره جدا وشايفه قدوه ممتازه برغم ان ناس كتير بتقوللي انه ظلمهم

مفيش قدامك حاجه تقولها غير

حسبي الله ونعم الوكيل

حلقات مكرره

2011-04-13T09:10:00.004+02:00

الدنيا دي عامله زي مجموعة حلقات مكرره

كل فتره تتعاد زي التلفزيون بالظبط لما بيعيد المسلسلات القديمه او يعيد انتاج افالم قديمه بممثلين جدد

بس في الدنيا ساعات نفس الشخص دوره يتغير

يعني مثلا شغلي زمان حصلي فيه موقف وعدى والغريب ان في شغلي الحالي بيحصلي موقف صوره منه لكن انا في موقع تاني خالص وبقيت شايف الصوره من ناحيه تانيه

مع اني متغاظ من الموقف ومتضايق الا اني حسيت اني هضحك على المشهد

نفس الصوره القديمه بس انا قاعد في كرسي واحد تاني لدرجة اني حاسس اني بتفرج على مشهد مش عايش الموقف

ولما فكرت في ده استريحت شويه لأني عرفت ان اكيد هيجي يوم والكرسي هيلف كمان شويه واقعد في احسن كرسي في الصوره المكرره بس الموضوع عايز صبر

حسني مبارك نفسه مين كان يصدق ان الكرسي هيلف بيه كل اللفه دي

ده على مستوى الدوله برده على مستوى حياتنا بنلاقي كل يوم مشهد متكرر بأشخاص مختلفه او نفس الأشخاص بس في اوضاع مختلفه

يمكن علشان كده بيقولوا ان الخبره في الدنيا مهمه جدا لأن الناس القديمه اكيد عدى عليها المواقف كلها او اغلبها قبل كده بالتالي هو هيبقى عارف افعاله هيبقى نتيجتها ايه مش حكاية انه حكيم عصره ولا ان السن بيديله ذكاء اكتر كل الحكايه انه بيبقى بيتعامل مع الموقف كأنه مكرر مش لسه هيخمن ويجرب طرق للحل

مش هقول ان كل الطرق القديمه هي الصلح دائما لكن غالبا بيبقوا عارفين نتيجتها فبتكون هي الأسلم

الخلاصه من ده كله ان خلاص مش هزعل من مكاني في الصوره المره دي انا بس هستنى لما اغير مكاني واقف في مكان افضل من الصوره

؟؟؟

2011-02-23T18:49:00.002+02:00

السؤال : بكره لمين؟؟

الأجابه : !!!!!

خليك في حالك

2011-01-26T12:30:00.004+02:00

ملحوظه انا كنت شيلت البوست بدوافع جبنيه لكن بعد بجاحة اعلانات الشرطه اللي بتدعي راحة المواطن والمعامله الحسنه وانا عمري ما فيه امين شرطه عاملني بأحترام مع اني عمري ما عملت تظاهر ولا نيله فقلت اقول براحتي انا كمان مش دي بلد ديموقراطي

خليك في حالك بص لعيالك ولم نفسك وامشي عدل
لا تقول سياسه ولا حماسه ده كلام منيل ومالوش تمن
خليك في شغلك واكل عيشك وبلاش تضيع نفسك هدر
انا كنت ناوي انزل واهاتي ويا الجموع
لا هيعرفوني ولا يقفشوني ولا حد ممكن كده يتحبس
دي مظاهره عامه والناس دي لمه الكل واقف عنده امل
اصل الحكايه حبة حماسه

لكن ارتجعت

غيرت راي
طب والسبب?
مليون سبب
الميه ساقعه
والطوب بيوجع
وعصايته ناشفه
ودمي اتحرق
فأخدت بعضي ورحت شغلي
افش غلبي في حبة ورق
لقتني ساكت والناس بتصرخ
فقلت اشارك واعمل قلق
لسه بفكر ايه يتعمل
الناس قالولي الحق دي ولعت ضرب وحجاره والميه والعه وشاب اتفرم

فبلعت تاني الصندل في بقى
وقعدت ساكت وكفايه ادعي ليكم تعدوا وميتقفش اللي اتضرب
دي حكومه واعيه
ورجليها ثابته
ضوافرها غارسه في قلب الوطن
لا هتخلعوهم ولا هتشيلوهم
والأكاده بجحا
طالعين يقولوا الشرطه تعبت واتعورت

يلعن ابوكم واللي جابوكم واللي يجاوركم يا محترم
وارجع واسكت واكتم في قلبي انا واللي زيي واللي انضرب
حطوا الصنادل جوه خاشمكم واكتم بقى يادي القلم

المتحكمووووون

2011-01-23T21:29:00.002+02:00

المتحكمون او المتحكمين
بغض النظر عن محلها من الأعراب لكن المهم محلهم هم من الأعراب
في كل حياتنا ناس بتحاول تتحكم فينا وتتدخل في حياتنا
يعني اهلك عايزين يفرضوا رأيهم قوي عليك وعلى حياتك حتى بعد ما تكبر
وفي شغلك تلاقي ناس بتحب تفرض ارائها حتى لو غلط عايزينك تعمل كل حاجه بأسلوبهم هم وتحت عبايتهم هم
كل واحد عايز يبقى هو الريس
ناس بتقول ان دي سنة الحياه اللي بيبقى ورا المدفع غير لما يبقى في وش المدفع
انا مستني لما ابقى ورا المدفع علشان اشوف يمكن اقتنع بأراهم ساعتها

هل السفارات نوع من الوجاهه الدوليه

2011-01-01T14:16:00.002+02:00

هل السفارات نوع من الوجاهه الدوليه ؟
سؤال نفسي اساله لحكومتنا الرشيده وخارجيتنا الرشيده برضه
هل السفارات بتاعتنا في دول العالم كله ليها دور معين ام انها نوع من الوجاهه والتزام دولي بنعمله شكليا وخلاص بدون اي دور فعال
كل شويه نلاقي حد مصري في دوله من الدول عربيه او اجنبيه بيتهان او بيتحبس او بيتنصب عليه او حاجات كتير قوي خلاصتها الأهانه والذل وكل لما تسأل طيب هو ليه مش بيلجأ للسفاره يقولك لجأت قالولي منقدرش نعملك حاجه اصل دي بلدهم برده.
يا سيدي عارفين انها بلدهم هو احنا جايين نحتلها بس المفروض ما دام انت مسافر بصوره شرعيه ومش واخدها سباحه ونط سور يبقى ليك حقوق ومن حقك تلاقي سفاره بلدك واقفه جنبك ما انت معاك الشرعيه
انما العجيب ان السفارات دورها سلبي بطريقه مثيره للحزن والأسف
انا مش خبير دولي لكن بس انا نفسي حد يشرحلي دور سفارتنا اللي بيتعملها ميزانيات بالملايين دي بتعمل بيها ايه ولا الموضوع كله مرتبات وشوية وظائف لولاد الناس الذوات
طيب ياريتني كنت من اولاد الذوات
اللي مضايقني اكتر ان المهانه للمصريين مش بس في دول الغرب اللي بيعتبرونا متخلفين وهمجيين وارهابيين
لكن كمان في الدول العربيه اللي بيعاملونا كأننا مش بني ادمين ويقولك انتم طمعانيين في الفلوس ولازم تستحملوا اي حاجه مقابل الفلوس طيب ما انتم بتستفيدوا من خبرات ومهارات بتبني في بلادكم وتفيدكم وتعلم ولادكم وتخدمكم كل ده ميستحقش مقابل ولا الفلوس اللي بتدفعوها بتبقى هدايا ومنح يعني
الفظيع بقى الدول اللي بتتكلم عن الظلم والفساد في دولتنا وده مش هدافع عنه كل بلد فيها فساد واخطاء لكن لما قناه كبيره اخباريه كل شغلهم وهمهم انهم يتكلموا عن الفساد في الدول اللي حولهم وتدور انت جوه بلدهم تلاقيهم على سبيل المثال يقولك معنديش حاجه في القانون تحفظ حق العامل الأجنبي حتى لو معاه عقد وليه حقوق.
يعني ممكن يديلك بالجزمه ويمشيك ولا تقدر تفتح بقك ولو مش عاجبك اشرب من البحر دي بلدنا هل عمركم سمعتم في القناه الأخباريه العظيمه دي عن حاجه زي دي ولا اتناقشوا فيها
نفسي الناس دي تبطل تترسم علينا كده ويعيشوا دور الشرفاء وهم ظالمين الناس وعايشين بعقول حجريه وعصبيات لبعض بالباطل
بجد حسبي الله ونعم الوكيل

ارجوكم الدعاء

2010-12-11T17:05:00.002+02:00

عرفت منذ ايام بإصابة والدة المدونه ساره في حادث ويبدو ان اصابتها شديده ارجو من الجميع الدعاء لها بالشفاء

الى اختي ساره ربنا يطمنكم عليها وتقوم لكم بالسلامه ويتم شفائها على خير

شهر فات

2010-10-26T22:45:00.003+02:00

شهر فات

وايه حصل من شهر فات

ايه حصل !!!!!

كان يوم ميلادها من شهر فات

من شهر فات صرخت حبيبتي من الألم

وخلال ساعات سمعت صوت انسان جديد

مبقتش انا وانتي وخلاص

نور اتخلق في حياتنا والفرح اترسم على ضحكتك

انا مش مصدق يا بشر

وبقيت انا اب لقمر

اما الغريب اني زمان لو كنت اشوف والدين جداد

اضحك عليهم وابتسم

شوف ابني شكله ايه

شوف بنتي ريالتها عسل

وده يقولك عن ذكاوة حضرته قال ايه عشان بيقول كلام اهبل عبيط

وبيقول كمان امبو يا بشر

دلوقتي انا الدور عليا كمان اقول

اضحك وافرح وانبسط لو تبتسم

ولو ةشاور للسما انا فوق اطير لحد السما

وانده ابويا وامي واخواتي كمان

عشان يشوفوا ويفرحوا بنتي بتعوج بؤها

من شهر الحمد لله ربنا رزقني ببنوتي الجميله الأستاذه " هنا" ابنتي العزيزه احساس لحد دلوقتي مش فاهمه انك تشوف كائن صغير عبيط كده ودمه خفيف كده موضوع جديد عليا وعلى امها طبعا وبالتالي احنا محتاسين شويه وما بين نصائح الأهل والبحث على النت في مواقع التربيه والطفوله وخبرات اللي خلفوا قبلينا بنحاول نمشي معاها الف باء اطفال طبعا انا كأب اعتقد ان دوري دلوقتي محدود قوي في مساعده بسيطه لغاده اني اشيلها شويه صغيرين او اجيبلهم حاجه عايزينها لكن المسؤليه معظمها تقريبا على غاده

برغم اني طول عمري عارف خلقها ضيق انما سبحان الله الأم برده تختلف عن اي حد تاني سهر وعياط طول الليل زن لأسباب غير معروفه ومع ذلك غاده صابره على ده كله عادي ربنا يقويها بقى

انا بحمد ربنا على نعمته وبشكر كل اصدقائي واخواتي اللي كانوا دايما بيسألوا عني وعن جميلتي هنا

الله اكرم

2010-08-14T11:41:00.003+02:00

كل عام وانتم بخير

ربنا يتقبل منا ومنكم صيام الشهر الكريم ويقدرنا جميعا نجمع اكبر قدر من الخيرات والحسنات في الشهر الجميل اللي ربنا امرنا بالصيام فيه وجعل السنه بمقام فريضه والفريضه بمقام 27 فريضه

استغربت قوي من كم المسلسلات اللي هتتعرض في رمضان ونوعها هو اللي خلاني استغرب اكتر مشاهد عري ورقص وسفالات اكتر من الطبيعي وكأنهم بيتحدوا ربنا في الشهر الكريم وكأن الناس دي واخده عهد على نفسها تكون ضد الدين وضد التدين

ومع ذلك بيدعوا الفضيله

لما واحده مخرجه افلام متستاهلش اقول اسمها عندي تغلط في عمرو خالد وتقول صوته بينرفزني وتدعي تقول ربنا ما يكتب عليا الحجاب ابدا نرد عليها بأيه

اولا عمرو خالد بيتحارب من زمان من اللي زيها لأنهم خايفين دعوته تحول الناس كلها للدين فيتبقى شياطين الأنس ويتكشفوا قدام كل الناس علشان كده بيكرهوه

زمان الكفار برده حاربوا النبي وقالوا عنه كتير برغم ان لو هم مقتنعين انه شاعر او مجنون زي ما قالوا كانوا مش هيشغلوا دماغهم بيه اصلا لكن كلمة الحق بتوجعهم هم خايفين على عيشتهم اللي معتمده على الفساد

عموما انا بس بدعي الناس على قد ما تقدروا في رمضان تقاطعوا المسلسلات والبرامج اللي فيها عري وسفاله افتكروا يا جماعه لما تيجوا يوم القيامه ونبقى مستنين حسنات ورحمات رمضان ومستنين نطلع من عتقاء النار تفتكروا المسلسلات دي هتنفعنا

ربنا اجعلني وكل احبائي من عتقائك من النار

كل سنه وانتم طيبين

حكايات

2010-07-19T00:55:00.002+03:00

اول حكايه عن طفل كان كل يوم بيحلم انه هيهرب من بيت اهله ويجري بعيد بعيد لحد ما يقابل بيت في ناس طيبين يحبوه ويهتموا بيه ويدوله الحمايه والحنان اللي بيحلم بيهم وانه هيعيش معاهم في حلم جميل ويكون طوع ليهم ويكون سندهم لما يكبروا وبعدين لما يكبر يروح يقابل اهله دولو ويقولهم انه محتاجهمش وهم اللي يحتاجوه فيعطف عليهم لكن يفضل مع اهله اللي ربوه

ودي اخرة فرجة العيال الزبله الصغيره على الأفلام العربي هيتنططوا على اهاليهم

تاني حكايه عن زوجه عايشه مع زوج فقير قوي قوي وكمان مفتري عليها قوي وبيضربها كل يوم ضرب موت الجيران كلهم زهقزا من التدخل كل يوم وبقوا يسمعوها بتنضرب ويقولك دول زي كل يوم سيبك منهم الزوجه برغم الجهل وبرغم الفقر وبرغم عدم جمالها بتحلم شوف العجب طلعت عندها قلب وهقل بوبتحلم

عارفين بتخلم بأيه

بتحلم انها هتهرب مع واحد قريبها من البلد بيحبها وانها هتطلب الطلاق وهتتجوز الواد اللي بيحبها ده وهتعيش مستريحه ومتهنيه

بتحلم انها هتبهدله وانه هيتلطم من بعدها وانها كل الناس بتعاكسها وبيشاغلوها بتحلم انها ست

وليه صايعه اصلا وعايزه الحرق بقى عايزه تسيب جوزها وتروح تمشي مع واحد صايع زيها نسوان تقرف

ثالت حكايه

عن راجل عجوز عاش عمره كله بيحلم بأنه يكون عنده اسره كبيره وعيله ويجمع ولاده حواليه ويكون هو الراجل الكبير اللي في البيت الكلمه كلمته والشوره شورته بس يا خساره في حلمه كان دايما شايف ان هو بس اللي هيتكلم وهو بس اللي هيقول والكل يخاف ويعمله الف حساب الراجل كان بيحلم تكون كلمته سيف على رقبة الكل ويكون هو الكبير في كل حاجه الولاد كبروا وتعبوا من تحكماته البيت الكبير فضي عليه كل واحد راح لحياته كل واحد استق لببيته بعيد وبدأ حياة جديده والغريب ببقى ان كل واحد منهم لسه بيحلم يبقى هو كبير العيله اللي بدأها ويبقى هو اللي يحكم وينهي ويقول ومحدش يقول غيره محدش فيهم اتعلم انه بكره هيتساب لوحده زي ما هم سابو الجد العجوز عايش لوحده في البيت الكبير اللي بقى عامل زي الخرابه

رابع حكايه

عن الصاحب اللي راح سافر بعيد عني ومش عارف اطوله هناك لا انا قادر امد ايديا اوصله ولا قادر في ضيقته اغيته من كربه

وحيد في سجن من حيطان وسور السجن من نيران بلا حراس ولا سجان لكنه وحيد في ارض الجان شايف بعيونه في قصورهم

ملوك عايه بتتنعم وهو وحيد بيتألم لا عارف يدعك الخاتم ويتحرر ولا قادر يهد المعبد على دماغهم

ياريتني يا صاحبي اكون كالجان واهد بيوت وعدي ببان واجيلك فوق سحابة خير

واغيتك من اللي ظالمينك

سامحني يا صاحبي عالتقصير

لكنك عارف الدنيا لا انا ولا سحار لكني وعدي اقولهولك هتلاقاني في كل مكان

واقف مستني ترجعلي

يارب تكون عايش في امان واترجع تاني تحضني

ربنا يفك كرب كل مسلم ويجزي كل اللي ظلم

جيت اكحلها

2010-06-10T07:53:00.002+03:00

مثل مشهور قوي جه يكحلها عماها

اصعب موقف تتحط فيه انك تكون بتعز شخص معين جدا وهو جدع معاك جدا وتقعد تدور على حاجه تعملها تنفعه وتبقى كويسه كده ويحس انك شايل جميله فبدل ما تعمل حاجه تفيده تعمل حاجه تضره وتتحول لأنسان ناكر للجميل ويبقى لسان حال الناس بص مش هو ده اللي انت واقف معاه اهو بيضرك فتبقى انت مش عارف تعمل ايه لأن الموقف شكله منيل فعلا

كتير ده بيحصل وانا نفسي حاليا مريت بموقف تمام كده

مديري في الشغل وبيعاملني كأني اخوه الصغير وانا بحترمه جدا لكفائته واخلاقه وشخصيته ده غير الجمايل اللي عملها معايا

حبيت اجرب حاجه جديده في الشغل علشان تبقى تطوير لشغلي ويبقى الناس عارفه ان اختياره ليا كان صح لكن المشكله اني دبسته في مشكله تانيه خالص كنت ناسيها بقيت لا انا عارف اوريله وشي علشان اعتذر ولا عارف اسكت واسيب الموضوع كده

النهايه طبيعي كان لازم نتقابل بحكم الشغل مقاليش حاجه خالص ولا حتى وبخني واتعامل عادي خالص قدام الناس

وتاني مره دخلتله وافتكر الموضوع سالني بأستغراب يا ابني حديعمل كده رديت بكلمه واحده وبدون ما ارغي كتير زي عادتي واشرح مبرراتي

هي كلمه واحده انا اسف

سكت ومعلقش وقالي خلاص روح شوف الشغل بقى

بس انا عارف انه مش هيزعل وهينسى بعد شويه الموقف لكن بفكر ان صحيح التسرع ممكن يكون نقمه رهيبه ويخسرنا ناس مهمين في حياتنا ويخلينا نغلط غلطات مش معقوله علشان كده حتى لو نيتك كويسه فكر الف مره قبل اي خطوه مبقولش نبقى سلبيين ونمشي جنب الحيط وبلاش افكار جديده لكن بقول نفكر ونسال ونتشاور الف مره قبل ما ننفذ بأندفاع

تحياتي لصديقي ورئيس م ياسر

وسلام كبير قوي لفاخر صاحبي اللي علمني ازاي اعترف بغلطي واعتذر مادمت غلطان

سلااااااااااااااااااااااااام

حرف السعاده

2010-05-13T08:57:00.002+03:00

اشرقت الشمس ككل يوم
يتأمل في هدوء الماره من حوله وهو جالس في الحافله
غريب اسم الحافله ربما اشتق من ان العدد المهول من الشخصيات التي تركب بجواره كل يوم
المهم ان يصل الى عمله هذا هو ما يقلقه وليس من يجلس بجواره
وصل الى عمله بشق الأنفس وبهدوء صعد الى مكتبه الضيق القى التحيه على زميله العجوز وجلس يقلب في اوراقه والبريد الواصل اليه
لازالت الهيئه تستخدم البريد العادي والدفاتر القديمه وكل شيء برائحة التراب والعفن جلس واخد يتخيل لو انه كان يعمل في شركه استثماريه ويملك جهاز حاسب له وحده ويتصفح النت مثل ابن خالته الذي عينه ابوه في شركة احد معارفهم
ارزاق قالها في سره وجلس الحمد لله اننا بنشتغل ولاقيين مرتب قالها عقله لنفسه لعلها تقنع وتخرس قليلا
جذب رزمة المراسلات والخطابات الوارده وبدأ يفتحها ليصنفها وفجأه وجد خطاب موجه اليه شخصيا ولكن على عنوان مكتبه
فتحه في لهفه من يا ترى يذكرني ويرسل الي ربما كانت شركه تقدمت للعمل بها ربما كانت رساله من خالي في الخليج يخبرني بأنه وجد لي عملا هناك يا ما انت كريم يارب
فتحها بقوه واخرج الخطاب ليجد ورقه بيضاء خاليه من اي كتابه الا حرف واحد فقط

(F)

سكت قليلا نعم هو يعرف المعنى
نعم هو يعرف الراسل
هو لا يحتاج الى اسامي ومقدمات وتحيات من هذا الراسل انه حرف واحد يحمل الف معنى
ذلك الحرف الجميل هو علامتها
نعم ورده Flower
لقد سافرت منذ زمن

من هي

اميرته الخياليه

اسند ظهره قليلا على الكرسي المهترئ وابتسم وشعر ببروده في قلبه ورعشه تجتاحه وسعاده تغمره كل هذا من حرف واحد
نعم حرف واحد منها معناه انها برغم كل ما حولها تذكره برغم كل حياتها تحفظ له مكانه في ذاكرتها هو لا يبحث عن شيء اكثر من ذلك ربما كانت تلك البقعه في ذاكرتها اوسع واقيم لديه من الاف الأمتار في اراضي الدنيا كلها
الأن فقط يعشق الخطابات الورقيه لأنه سيحتفظ بهذا الحرف الذي كتبته بيدها ولمست حروفه بقلمها

امسك قلمه وقرر الرد ولم يعرف بما يبدأ وماذا يحكي ولكنه في هدوء وحماسه عرف ما سيكتب
حرف بكلمه حرف منها وكلمة منه
وحشتــــــــــــــــــــــــــــيني

اوعى تخاف

2010-04-14T11:23:00.001+02:00

خايف
خايف ليه
مخنوق
من ايه
لما تكون حاسس بالخوف
جرب تسال نفسك فورا
خايف ليه
خلي اجباتك هي بداية خط السير
خللي اجباتك تفتح عقلك يدخله نور
خايف ليه
لما غبائك يملى دماغك
يقلب كل حياتك هم
لما تقوم مالنوم تتمنى ما تتطلع شمس
لما تقوم مرعوب من فكرة وحرقة دم
اصحى وفكر كده في الخطه
علشان تغلب بيها الخوف
علشان تكبر قدام نفسك
علشان ثقتك فيك تذداد
ايه هيخوف
خايف تتخن بطل تاكل
خايف تكذب قول الحق
خايف تتعب بطل زفت
خايف حبك يجري يسيبك
حسن نفسك تبت ايدك واحضنه واوعى تسيبه يسيبك
خايف تغرق جرب تسبح
مره هتغرق مره هتقدر
خايف افشل لازم تفشل
علشان فشلك راح يرسملك احلى خريطه علشان تنجح
خايف منهم لا متخافش هم كمان خايفين كده منك
اصل عدوك مهماً كان برده جبان
طول ما هو شايفك خايف منه هيفضل ياذي اصله جبان
جرب انت تواجهه وتصمد
راح يهرب منك بحصان
اوعى تخاف من حد يا صاحبي
خوفك من صنعك انت وبايديك
كل حياتنا قدر مكتوب
يبقى تخاف ليه من المحتوم
اللي يصيبك ده مكتوبك
واللي ما صابك مش بايديك
ولا بهروبك ولا بشجاعتك
كله نصيب ولازم هيصيب
يبقى تواجه كله بوشك
علشان لما الخبطه تجيلك تبقى في وشك مش في قفاك
اوعى تقوللي جنب الحيطه هدوء وامان
جنب الحيطه هتبقى جبان
جنب الحيطه في ريحه خنيقه وفيه دبان
واقف على فضلات منسيه
راح تصبح زي الدبان عايش على فضلات وزباله
عايش ولا كأنك انسان
اصرخ زعق اشتم حتى
متخليش صوتك مكتوم
لحسن يجي اليوم وتلاقي اسمك بقى اصبح مرحوم
وساعتها الناس هتقولك عاش او مات مفرقش كتير

ارض الخليج العظيمه تييييييييت

2010-04-03T13:08:00.003+02:00

تحديــــــــــــــــــــث

ساره

اكتر حاجه ممكن توجعني اني اقول كلام في غضبي ويجرح حد بيعز عليا جدا جدا وبحترمه جدا جدا وانا اعتقد اني قلتلك قبل كده اني عندي اعتراضات كتير على الخليج وتقريبا مره اتكلمنا على خناقه بين سعوديين ومصريين وكان فيها اهانات متبادله وكده وانا عشان الزهايمر بتاعي مش فاكر اصلا احنا كنا توصلنا لأيه في نهاية الحوار وده الطبيعي بتاعي يعني لكن اللي اقدر اقوله يا ساره اولا انتي شخصيا من ارقى واطيب الناس اللي اتعاملت معاهم في المدونات

ثانيا بشهادة زميلي اللي فلوس ابوه راحت عليه قاللي ان فيه برده منهم كفيلين - معرفش ده جمعها ولا بتجمعوها ازاي - المهم فيه منهم مثقفين ومتعلمين بتكون المعامله معاهم جميله ومحترمه جدا لكن للأسف قليلين

وانا اعتقد اني راعيت ضميري في الموضوع ومحكتش حاجه خرافيه او مشفتهاش بعيني وبشهادة الاف الناس اللي عاشت هناك وياريت تقري رد فاخر صاحبي بعد الكومنت بتاعك وشوفي هو بيتكلم بعقلانيه ازاي برغم انه محروق منهم جدا طولت انا في التحديث وبعتذر ان كان كلامي اساء ليكي او زعلك مني لكن صدقيني اللي بيحصل صعب اعرفه ومقولش تييييت وبقول تيييت علشان محبش اني اقول لفظ وحش على اخواتي في الدين

تحياتي ليكي وتحيات غاده زوجتي

ارض الخليج العظيمه تييييييييت
من يومين كنت بتكلم عن السفر للخليج ومشاكله وللأسف" يوحنا" رئيسي في الشغل اتدخل في الحوار, تقولولي للأسف ليه مش فيه وحده وطنيه وحركات هقولكم ايوه فيه وانا بتكلم مع يوحنا في اي موضوع عادي بس المره دي الموضوع كان سخيف عارفين ليه لأنه سألني سؤال وجاوب بنفسه عليه
قاللي هو مش الأسلام حرم العبوديه عندكم ليه بقى العرب رجعوا العبوديه من تاني لكن بصوره مقننه ومحدش منكم اعترض وكمان بتوافقوا تسافروا الدول العربيه تشتغلوا هناك بصوره ابسط وصف ليها هو العبوديه.

يعني ايه كفيل ؟ يعني شخص يضمنك طول اقامتك هناك علشان لو عملت حاجه وحشه يبقى هو مسؤل عنها وده يعني كانك ناقص اهليه او لو فعلا عملت جريمه مش هيعاقبوك ويسلخوا راس اللي جابوك
الكفيل طبعا بما انه خيره عليك وعلى اللي جايبينك بفلوسه يا كلب فمن حقه طبعا ان يكون ليه عليك بعض الحقوق والفروض منها ان باسبورك يفضل معاه طول الوقت وانك متتحركش لأي مكان داخل البلد او خارجها الا باذنه لأنك لو خالفت اي من تعاليمه واوامره تبقى فاجر فاسق داعر عايز الحرق وتترحل على بلدكم يا معفن ومترجعش هنا تاني الا بعد خمس سنين ده لو رجعت يعني
طب عايز اشتري عربيه لازم الكفيل يوافق
عايز اعمل رخصه لازم الكفيل يوافق
عايز اروح احج لازم الكفيل يوافق
عايز اتجوز لازم الكفيل يوافق
عايز اخد نفسي لازم الكفيل يوافق
من الأخر انت بقيت ملكيه خاصه للكفيل برغم انه بيشغلك بمرتب وفيه عقد والمفروض ان الموضوع قانوني تماما لكن هو القانون كده انت بقيت من المماليك الف مبروك

وتخيل بقى ان المصيبه في ان معظم الشخصيات دي عندهم فلوس ومعندهمش اي تعليم والتزام حقيقي بالدين هي بس شوية مظاهر ويا سلا م بقى لما يحب ياكل حقك ابقى تف على وشي لو حد رجعلك حقك لينا زميل في الشغل الكفيل هبش كل تحويشة عمر والده في السعوديه وقاله يالا على بلدكم وهو راجل كبير وحاول يشتكيه لكن القاضي طلع قريب الكفيل السعودي الراجل راح يا عيني يشتكي للأمير والحق يتقال الأمير قالهم ازاي قرايب يحكموا في قضية بعض غيروا القاضي وفعلا القاضي الجديد حكمله برجوع فلوسه لكن هيهات يا معلم مين اللي ينفذ بقى ورحلوا الراجل من السعوديه واديه عمال يهاتي هنا من مصر لكن مين بقى كل سنه وانت طيب الكفيل اتكفل بيها
ومواقف كتير جدا بالطريقه دي والسبب اننا بنقبل علشان لقمة العيش اننا نتحمل ابشع الظروف علشان بلدنا مفيهاش غير الرقاصين والطبالين واللصوص ينهوبوها ,انا معنديش مانع ينهبوا براحتهم ويكسبوا ويزيطوا ويتجوزوا الرقاصات والمغنيات ويقتلوا بعض براحتهم بس يسيبوا الناس تاكل عيش يحفظوا كرامة الناس ميبقاش كل من هب ودب وطلع عنده شوية بنزين تحت الغنم بتاعته يبقى كفيل ويزل الناس براحته
وتسمع بقى العرب بيتريقوا على المصريين مثلا في اننا بنذل نفسنا للقرش واننا بنريل عليهم لما بيجوا مصر واننا بننصب عليهم علشان ناخد فلوسهم مع ان اعتقد ده بيتعمل معاهم في كل دول العالم اللي بيروحوها لأن واحد جاهل معاه فلوس وبيدور على شهواته وخلاص لازم كل ضعاف النفوس يطمعوا فيه
انا كتبت البوست ده علشان اسال كام سؤال لما احنا ربنا حرم علينا العبوديه دي بنرجعها ليه تاني بمسميات جديده
وليه كل واحد ربنا يفتحها عليه بعد شقاء وجوع بيبقى مستمتع قوي بأنه يذل ويفتري ويظلم كده
وعايز اعرف برده العرب دول واهل الخليج الكرام دول لما الدائره تلف بيهم والنفط يخلص ويقعدوا جنب غنماتهم من تاني هيبقى موقفهم ايه ومتوقعين معاملة الناس ليهم تبقى ازاي

كان معكم عز الدين ايبك من مصر وببعت سلامي لقطز صاحبي اللي دايق الويل من العرب التيييييييييييييت

شفتك فين قبل كده

2010-03-22T17:28:00.002+02:00

يوم اخر في عملي استيقظ من النوم الممتع للبرد المنغص
اخرج للشارع متوجها الى عملي واظل اتخيل وجوه زملائي نفس الوجوه ونفس الأحداث يوميا لا جديد يحدث نفس الأحاديث ونفس الأفكار

لكن اليوم سيحدث شيء جديد اشاعه مؤكده بأنهم سيحضرون موظفه جديده ,نعم الشباب كلهم بيحكوا عن الموضوع ده من اسبوع يا ترى شكلها ايه يا ترى الأدارة استنضفت المره دي ولا بعتت لنا بوز اخص جديد هههههههه
المهم اهو فيه حاجه جديده نرغي عنها النهارده
الساعه عشره بالظبط دخلت عدت قدامي بسرعه ملحقتش ابص على شكلها واتأكد منها لسه هقول يا خساره اتلفتت تاني ورجعت تسالني شؤون الأفراد فين لو سمحت بابتسامه ساحره مني طبعا رديت "حضرتك اكيد الموظفه الجديده اهلا بيكي" بهدوء ردت "ايوه ممكن تقولي بس فين شؤون الأفراد" شاورتلها ناحية مكتبهم يا بختهم قلتها في سري طبعا بس غريبه قوي شكلها مش غريب عليا انا عارفها اكيد بس يا ترى منين رجعت بعد شويه مع الواد سامح بتاع الأفراد اداها مكتب قريب مني وعرفها بالناس وانا منهم طبعا حتى اسمها مش غريب عليا نرمين احمد بس يا ترى منين اولا اكيد مش من الكليه لأن اسمها بدايته ن وانا أ يبقى مستحيل تكون زميلتي في الكليه طيب من ايام ابتدائي مثلا لأن انا المدرسه الوحيده المشتركه في حياتي هي ابتدائي يبقى هي اكيد من ابتدائي سالتها عن مكان سكنها لقيتها من منطقه بعيييده عني خالص يبقى مش من مدرستي كمان امال اعرفك منين يا ست نرمين انتي يمكن صديقه لأختي وشفتها عندنا ممكن قعدت ارغي معاها واكلمها عن اخواتي كلهم يمكن تعرف حد فيهم عجبها الحوار اللي مفيهوش معاكسه وتلميحات وليقتها عماله تحكي عن اخواتها ودراستها لكن برده معرفتش انتي مين يا نرمين "طب انتي مبتشبهيش عليا يا نرمين "مفهمتش سؤالي وخافت يكون معاكسه حسيتها كشت مني كده طبعا لميت الموقف بسرعه وقلتلها انا اصلي كنت بتكلم مع واحد صاحبي من فتره عن ناس اول مره نقابلهم ونحس اننا نعرفهم قوي ويا ترى ده سببه ايه وعلاقة ده بموضوع تناسخ الأرواح اللي الهنود بيقولوا عنه انشغلت معايا في الحوار اللي عملته وقعدنا نرغي وعدى الموقف بس انا هتجنن انتي مين يا نرمين
قعدت اسالها عن اهلها والدها ومامتها اخواتها عيلتها دراستها كل حاجه عنها فصصت كل حاجه عنها وبرده مش لاقي حاجه اعرفها منها هي نفسها بعد اربع ساعات بنرغي سالتني ايه ده انت بقيت عارف عني كل حياتي انت مباحث يا ابني ولا ايه ضحكت انا ولمحتها بتضحك ضحكه حلوه قوي
وخلص اليوم بسرعه وانا بحلم ببكره ييجي علشان اكلمها اتشجعت وسألتها معاكي موبايل ولا ماشيه بكارت ميناتل قالتلي "معايا ايه انت عايز الرقم ولا ايه ؟ " اتكسفت واتلخبطت "يعني لو يضايقك خلاص مش مشكله يعني انا اسف و....01255ورصت الرقم في ثانيه وقالتلي ايه حفظته ولا لأ وضحكت بكسوف
وانا مروح عمال افكر طيب اكلمها ولا لأ طيب هقولها ايه ده لسه اول يوم اشوفها وبعدين هي هتسالني بتتصل ليه اقولها ايه ووقفت في محطة المترو محتار وبفكر وهوب
يا خبر ابيض نرمين اهي هي فعلا نرمين احمد عبد الفتاح لا مش هي بشحمها ولحمها انما بطاقتها الراجل بتاع المحطه حاطط بطاقتها جنبه على لوحة المفقودات الظاهر حد لقاها وسابها هنا علشان هي تشوفها وتاخدها وانا شفتها قبل كده وقريت الأسم علشان كده شكلها مش غريب عني واسمها مش غريب عني رفعت سماعة التليفون وطلبتها
الو مين بيتكلم ايوه يا نرمين احمد عبد الفتاح انا زميلك الجديد
وعايز ايه يا زميلي الجديد وعرفت عبد الفتاح كمان
عايز اسالك سؤال
اسال يا سيدي
انتي ضايع منك حاجه ....

ازاي تكون موجود

2010-02-28T08:35:00.002+02:00

عايز اكون حاضر حاضر

مش حاضر غائب

يعني ايه

بعد ما اتفرجت على فيلم الف مبروك بتاع احمد حلمي واللي اتأخرت قوي في الفرجه عليه في النهايه قررت اني انا كمان نفسي اكون موجود وليا دور

طول عمري كانت سياستي هي الحياديه مادمت لا اقدر على التغيير

يعني في بيتنا مادمت مقدرش اواجه ابويا او اعترض على قراراته يبقى التزم الحياديه التامه وعمري ما ابديت رايي في اي موقف بيحصل والنتيجه ان ده بقى انطباع الكل عني اني مليش راي ومش متوقع يكون ليا راي على القل في المليون سنه اللي جايين

طب وناوي تعمل ايه دلوقتي يا فلحوس افندي بعد الهنا بسنه

لا مش بعد الهنا بسنه قوي يعني

اولا انا اخدت موقف قبل كده واكتر من موقف كمان

واكتشفت ان لو الواحد عايز حاجه وبجد مصمم عليها وقرر انه مستحيل ييتخلى عنها ومهما كان اللي بيواجهك لازم هتوصل وربنا هيوفقك ليها المهم متريحش وتقول لا انا تعبت او ده مستحيل والمهم برده ان الحاجه اللي بتحارب علشانها تكون تستاهل برده

عموما انا بدور على حاجه دلوقتي اعملها علشان احس ان ليا راي وموقف واني مش الحاضر الغائب بس انا مش عايز موقف بطلوي ولا كلام من ده ولا عايز موقف يحصل وانجح فيه ويعدي وخلاص على كده انا عايز اسلوب حياه

عايز يكون انطباع الناس عني من كل تعاملاتي هو ده

عايز يكون هو ده اسلوبي الدائم مش موقف في ساعة حماس وخلاص

وعلشان كده مش عايز اهيص مره واحده انا همشي خطوه خطوه وهتغير خطوه خطوه علشان مخبطش جامد في سور السجن واتعور

يمكن بالراحه اعرف اتشعبط على السور وانط بره

واوعدكم هبعتلكم من هناك جوابات كتييييييييييييير

سلااااام

اخوكم ايهاب

اتعلمت ايه

2010-01-04T09:57:00.002+02:00

اتعلمت ايه
سؤال سالته لنفسي وانا شايف الناس عماله تتكلم عن السنه الجديده واللي هيحصل فيها واللي حصل في اللي قبليها
ولقيت اني لازم افكر ايه اللي اتعلمته انا من السنه اللي فاتت علشان استفيد منه في السنه الجديده
انا هقول كل اللي اتعلمته لنفسي كده عشوائي وبعدين ابقى احلله بعدين على مهلي:

*متسمعش كلام حد بيجيب في سيرة بنت زميلتك مهما كان الحد ده صاحبك لأن دي اعراض ناس وممكن اختك او زوجتك او امك او حتى بنتك تتعرض للموقف نفسه بعدين.

*متعملش فيها عنتر جبنه على رئيسك بحجة انك مش بتاع نفاق فتفضل تعمل كل الطرق اللي تثبت بيها لزمايلك انك مبترقصش لرئيسك لدرجة انك تخليه يكرهك ويحطك في خانة البلطجيه في الوقت اللي زمايلك النصابين بقوا حبايبه ورجالته.

*مهما كان الشخص اللي بيحاربك قوي عنك او ليه نفوذ عنك او عنده حاجه يذلك بيها ومتصور انه يقدر يمنع عنك ويمنحك كما يشاء اعرف ان ربنا اقوى من الكل وإرادة ربنا هي فوق كل شيء لا يمنعها اي كائن علشان كده كل اللي عليك انك تصبر وتدعي ربنا مش بقول تبقى متواكل ومتعملش اي خطوه ايجابيه لكن وانت بتعمل خطواتك اعملها ودايما عندك يقين ان ربنا هو اللي بيمنع ويمنح .

*اتعملت برده ان مش معنى ان الف واحد قالك عن التجربه دي انها مش حلوه زي ما انت بتحلم او انها متعبه او انها مالهاش لازمه فتقوم انت متراجع او تحط في دماغك رايهم ده لا ادخل تجربك وعيشها استمتع بحلوها واتحمل مرها, هم اكيد برده عدى عليهم اوقات حلوه فيها بس المراره لما بتيجي كل واحد بيصرخ ويقول انا زعلان يا جماعه وتعبان انما لما بيبقى عايش يومين حلوين ولا بنعرف عنه حاجه وحياته بتبقى اسرار.

*اللي عايز يعيش مبسوط وبيته يبقى مستقر عليه بالأحترام والصراحه والتنازل حبه والتعاون
وقبل كل شيء الكلمه الحلوه.

*اتعلمت ان الصاحب الحقيقي مش مهم يكون ساكن جنبك او معاك حتى في بلد واحده ممكن مليون ميل بينكم وبرده يفضل حاسس بيك وقلقان عليك وبيفكر دايما ازاي يحل مشاكلك ويسمع اخبارك .

*اتعلمت برده ان الصاحب بيبان فعلا وقت الشده وان في ناس هي اتربت على كده انهم يبقوا رجاله مش البيئه بتاعة الشغل ولا الشارع ولا المدرسه ولا اي مكان هيعمل رجاله الرجاله بتعملهم امهاتهم .

*اتعلمت ان الراجل بيفضل ينكر دايما اهمية راي الست مع ان هو من اول لما بيتولد بيدور على امه ورأيها ولحد ما بيموت بيدور على راي مراته واخته وبنته كمان ده لما بيكون عنده عقل يعني وعارف قيمة المشوره .

*اتعملت ان ممكن بنت تكون جدعه وعندها اخلاق وكرامه وضمير اكتر من رجاله كتير حواليها.

*اتعلمت ان في ناس بطبعهم بيتولدوا وعندهم قدرة على القياده صح وفي ناس قدرتهم على انهم يكونوا مساعدين للقائد وفي ناس قدرتهم انهم يكونوا تابعين بس وفي ناس معندهاش قدره لا تقود ولا تساعد ولا حتى تحترم النظام وتبقى اتباع محترمين هم بس فالحين يعملوا مشاكل ويعترضوا وخلاص.

*اتعلمت ان اللي اتربى في بيت اهله وشافهم طول عمره مبيعرفوش يدبروا امورهم ماليا او ادبيا او عندهم اي مشاكل في ثقافتهم بياخد جزء مش صغير من مشاكلهم دي في حياته لما يستقل عنهم دايما بيبقى مصاب بنفس العاهه بتاعتهم سواء إسراف او بخل او غباء او تكبر او تجبر ربنا يحفظنا.

*اتعلمت ان في ناس تحبهم وتصاحبهم لكنك عارف انهم مش ملايكه او انهم مش كاملين الأوصاف لكن انت لو هتدور في كل صديق انه يبقى نسخه من احمد فاخر او نسخه من احمد حسن او من صديقي الجديد محمد حسن هتقعد طول عمرك تدور علشان تلاقي واحد او اتنين تاني زي الناس دي
واختم بقى بسر السعاده اللي النبي – صلى الله عليه وسلم – قاله في الحديث الشريف " من أصبح منكم آمنا في سربه ، معافى في جسده ، عنده قوت يومه ، فكأنما حيزت له الدنيا "

سعيد بكل واحد اتعرفت بيه هنا في التدوين وبناس كتير اتعرفت بيها السنه دي الحمد لله على النعمه

بحبكم كلكم جدا جدا يا اخواتي بجد

واحد وعشرين

2009-12-21T12:53:00.002+02:00

النهارده واحد وعشرين

بعد ما الفرح انتهى

وبعد ما الناس روحت

بعد ما الكل انطلق على وجهته

اللي روح

واللي بايت

واللي جاي يزفني

كل ده عدى عليه عشرين نهار

والنهارده واحد وعشرين يا بشر

ناس قالولي دول يومين

وناس قالولي اسبوع يادوب

وابقى قولنا رايك ايه

بكره تزهق

بكره تندم

بكره هتموت من النكد

اكتر المتفائلين قالولي شهر او شهرين كمان

بس لازم اه ولابد هتتقهر

بس تفتكروا اني اخاف

ولا اتراجع واشك

يا بني انت وهو والبنت التخينه الواقفه ديه

وانتي برده يا مسلوعه يا متداريه

انا زيكم شفت مليون مشكله قدام عينيا في بيتنا نفسه وبيت قرايبي وبيت صحابي كمان يا عم

بس دايما كنت افكر ايه السبب

واقعد اسرح واستكنيص وافتكر

ايه يخليني منقهرش

ايه يخليني منجرحش

مش هقول اني بقى فلفوس كبير وعرفت احل المعضله

عدت علينا اربع سنين قبل الجواز مليانين بردك مشاكل وخناقات

مهما كنت هتفتكس برده لازم تنتكس اوقات كده

بس عارف لو تفكر باعتدال

لو هتكسر عندك القاسي المحال

كل شيء راح ينصلح

لسه والحمد لله قوي متخناقتش يا بشر

بس حتى لو اتخانقت اوعى حد يقولي شفت

بكره نتخانق ونتصالح كتير

والحمد لله على كل ده

انا مش عارف اشكر الناس اللي باركولي والناس اللي حضرت الفرح وفرحوا معايا وفرحوني بوجودهم قد ايه بجد بجد وجودكم هو كان احلى هديه جاتني في فرحي ده غير الحاجه التانيه برده يا جماعه مش عارف اقول ايه يعني بصراحه

اتفرجت على الفيديو اخيرا بتاع الفرح وشفتكم واقفين وشفت اللي رقصوا كمان هههههه

بجد متشكر لك اخ واخت يشرفني دايما وجودهم في حياتي

حكيت لغاده كتير عنكم وفرحت قوي انكم جيتم واللي مقدرش يجي مسيري اقفشه في اي تجمع قريب ان شاء الله

عقبالكم جميعا

لولولولولولولولوليييييييي

محدش يجيب سيرة الرقص علشان معورش حد

دعوة فرح الشنكوتي

2009-11-23T11:01:00.004+02:00

الإخوه المدونين والمدونات

الرجاله منهم والستات

شباب وبنات

الكل يسمع ويقرب

خبر هاااااااااااااااااااااااااااام

الشنكوتي فرحه قرب

ان شاء الله هيكون الفرح رابع ايام العيد الموافق 30 نوفمبر 2009

المكان نادي ضباط النقل قاعة الفردوس

عنوانه كورنيش النيل خلف كلية الزراعه بشبرا الخيمه بعد كوبري المظلات

الساعه 8 مساءا

الكل لازم يجي ينورني ويحضر فرحي ان شاء الله

مش عايز اقول لكل واحد باسمه اللي بيحبني يجي او يدعيلي بقى وخلاص

خيخه اوعي تطلعي خيخه ومتجيش

رحاب متهزريش

شاهي

دوبه

كامي

لي لي

عسقلاني

سوووو

داليا قوس قزح وتجيبي جوزك معاكي

انا مش عايز اقول على كل الأسامي علشان مش هلحق كده المدونين بقم ما شاء الله كتير قوي علشان كده انا عارف الناس اللي بحبهم وبيحبوني كتير قد ايه الحمد لله وكلهم هيجو ان شاء الله اكيد

ادعولي بقى سلاااااااااااااااااااااام

اخوكم ايهاب

وحشتيني

2009-11-09T08:31:00.004+02:00

بوجه شاحب جلس في صمت في شرفة منزلة
عاش في هذا المنزل سنوات عمره الستون تقريبا جلس وهو ينظر الى الخطاب الملقى امامه على الطاوله في البلكونه رغم بساطة مظهر الخطاب الا انه يراه كأنه سيف قاصم لقد وصله اليوم خطاب اخطاره بأنه قد وصل الى سن المعاش وان حفل توديعه او كما يشعر هو حفل تأبينه وجنازته سيكون يوم الخميس القادم .
العجيب هو ان يوم الخميس هذا كان في العاده هو اسعد ايام حياته منذ طفولته وحتى في شبابه ورجولته والأن يختم حياته في هذا اليوم
لقد كان في صغره يعشق هذا اليوم ببرامجه وحلقات الكارتون الممتعه وعندما كبر اصبح هذا يوم خروجه مع اصدقائه وحتى بعد ان التقى بحبيبة عمره كان هذا هو موعدهم الأسبوعي الذي لم يخلفاه ابدا مهما كانت الظروف
وحتى بعد زواجهم ظل هذا يومهم الخاص الذي يقضيانه في مشاهدة اي فيلم او الخروج سويا واستعادة الذكريات الحبيبه

اطلق تلك الزفرة الحاره ونظر في الساعه ليجدها تجاوزت الرابعه صباحا واذان الفجر سينطلق بعد قليل
قام فصلى ركعتين وعندما سمع اذان الفجر خرج في هدوء الى المسجد ليصلي كما تعود طوال عمره وعندما عاد وجدها بوجهها الملائكي افاقت تبحث عنه فعلمت انه نزل للصلاه حضرت له الفطور والملابس النظيفه ككل يوم كانت تعلم انه اخر يوم له في العمل وانه مستاء جدا من هذا الأمر .
احتضنت كفه بكفها وابتسمت ابتسامه عرفها واحبها منذ سنوات
همست في اذنه "من الأن عدت ملكي طوال اليوم ولن يأخذك العمل مني طوال النهار هنروح الحفله مع بعض طبعا ولا في بنت حلوه منمره عليك غيري هتروح معاك" ضحك ونسي همومه بكلماتها " هو في حد يا مجنونه هيبص لواحد طالع على المعاش زيي"
ردت بقوه "متضحكش عليا بالأونطه دي رجلي على رجلك "
وفي الحفل جلسا سويا وجلس اولادهم بجوارهم نظر اليها والى اولاده وفكر للحظه "سبحان الله "
لقد كبر ابنائه جميعا وتزوجوا واصبح لديه احفاد صغار وزوجته لازالت بجواره تحبه وترعاه وقد اتم ما عليه من واجبات في الحياه وباقي له ان يستمتع بباقي عمره في عبادة ربه وحنان زوجته وابنائه واحفاده ماذا يريد اكثر من هذا
وفي هدوء وثقة قال " اللهم لك الحمد كما ينبغي لجلال وجهك وعظيم سلطانك"
التفتت اليه "بتقول حاجه يا حبيبي "

"بقوللك وحشتيني".

وبقيت راجل متجوز

2009-10-03T18:07:00.002+02:00

وبقيت راجل متجوز

كتبنا الكتاب الحمد لله بعد جهد جهيد

المهم اننا بقينا ناس متجوزين
ودلوقتي بقى اصبح عندي بندقيه يوه لا مش دي دلوقتي بقيت من المتزوجين

اللي حيرني فعلا هو الرد اللي سمعته من كل واحد متجوز اقوله انا هكتب كتابي
" ارجع يا مجنون"
وانا بصراحه عايز اسأل الناس دي سؤال " ايه اسوأ شيء في الجواز
انا هفترض كام اجابه وارد عليهم واستنى منكم بقية اجاباتكم

اولا كبت للحريه ومسؤليه
الأجابه بقى انه اه مسؤليه ومش لعبه لكن هي المسؤليه كبت لو الأتنين شايلين المسؤليه مع بعض يقى مش هيحسوا بكبت لو الأتنين اتنازلوا عن شويه انانيه هيستريحوا قوي قوي

زن الستات
وده مش شيء هنكره واقول انهم مش زنانين لكن بايدك تتفاهم وتناقش الموضوع عايز طولة بال علشان يقتنعوا بس لو فعلا انت معاك حق ومش مجرد عند وخلاص هتلاقي الدنيا فله قوي

بلاش عند
بلاش انانيه
بلاش معيله
والدنيا هتبقى فله
ولو عملت كل ده ولقيت الحياه لسه مش حلوه يبقى اعذرني انت اخترت غلط من البدايه
لأن قبل كل شيء اهم حاجه الأختيار

وسلام بقى علشان انا بقيت راجل مشغول

ملحوظه تخينه التلات مدونين اللي كلموني امبارح بدون ذكر اسمائهم انا متشكر جدا جدا جدا على مكالمتكم دي
ربنا يخليكم ليا

سلااااااااااااااام

عيد ميلاد ويوم ميلاد

2009-09-30T11:23:00.001+02:00

النهارده عيد ميلاده

وبعد بكره يوم ميلادي

زي النهارده احسن صديق ليا اتولد

وبعد بكره انا هتولد

انا بعد بكره هكون ان شاء الله هكتب كتابي على زوجتي المستقبليه ورفيقة الكفاح بقى

في مسجد فاطمه الزهراء بميدان فكتوريا بشبرا مصر

الحاضر يعلم الغائب بقى

اما النهارده فد عيد ميلاد احمد صاحبي ربنا يجيبه بالسلامه بقى من سفره

ربنا يقرب البعيد بقى

ابقوا نوروني

انا مش هكتب اسامي الناس اللي بعزمهم لأن هم عارفين نفسهم بالأسم بقى سواء اللي من شبرا واللي من بره شبرا واللي من الهرم واخويا اللي في الغردقه وهو عارف نفسه والبيه اللي في المعادي ومطنشني

وباقي احياء مصر كلها طبعا وانتي يا شعنونه طبعا عارفه نفسك

تحياتي ليكم وربنا يسعد الجميع

سلااااااااااااااااااااام

عيـــــــــــــــد سعيـــــــد

2009-09-21T11:03:00.001+02:00

عيد سعيد

كل سنه وانتم طيبين عارف اني مختفي من فتره بس هتعرفوا قريب السبب

ادعولي بقى

ومتخافوش مش هعمل حاجه من غير ما اقولكم طبعا

احنا اتفقنا قبل كده

كلكم هتبقوا معزومين

وش بيغمز

سلااااااااااااام

كل سنه وانتم طيبين

2009-08-26T23:22:00.001+02:00

رمضان كريـــــــــــــــــــــــــــــــــم

الله اكـــــــــــــــــــــــــــــــــــــــــــــــــــــــرم

عزام ذيدان

2009-07-20T09:26:00.002+03:00

عزام ذيدان
بعد غيبه كتيييير حبيت بس اجي ارغي بكلمتين عن موقف حصل معايا من ضمن مواقف كتير سخيفه عماله تحصل بقالها فتره كده
كنت راجع من شغلي على البيت ونازل من الميكروباص العزيز بعد ما اتخنقت من الحر وعرق الناس وحاجه صعبه خالص وانا نازل كان نازل معايا واحد معلم كده لابس عمه وجلابيه وضخم الجثه مش فاكر كنا بنتكلم على عيب ايه في العربيه وبنضحك انا معرفهوش بس الراجل بيكملني بود كده فرديت عليه عادي يعني المهم
سألني هو حضرتك يا استاذ بلدك ايه قلتله بني سويف لكن مولود هنا قالي على بلده هو كمان تقريبا حاجه في الصعيد بس مش فاكر هي ايه وقعدنا نتكلم وهو يرحب بيا وانا ارحب بيه تقولشي هنبقى نسايب
قاللي هو حضرتك بتشتغل مش كده قلتله ايوه طبعا قالي يا خساره
خساره ليه يا جحش ودي قلتها في سري طبعا
قالي انا اصلي كنت عايز نفرين يشتغلوا معايا في اكتوبر
طيب وهو انا نفر برده يا حاج
لا يا استاذ مش انفار عمال انا عايز واحد يمسك الحسابات الصبح وواحد يسجل الأيرادات ويحصلها اخر النهار
بس لازم يبقوا متعلمين وناس محترمين انا كان معايا نفرين زي الفل بس الجيش خدهم الأتنين مره واحده ومحتاس دلوقتي وانا قرايتي وكتابتي على قدي خالص
قلتله خلاص ممكن اسألك عن حد عايز شغل انا اعرف ناس كتير في منطقتي بيدوروا على شغل
اتفقنا على كده واداني رقم تليفونه واخد رقمي علشان يكلمني ويسالني عملت ايه
وبالليل في نفس اليوم لقيته بيتصل بيا
الو ايوه يا استاذ ايهاب في حد عندك جاهز من الناس اللي هيشتغلوا
جاهز ايه يا احاج هو بنطلون بيتخيط احنا ميعادنا بكره هتصل بالناس دلوقتي اقولهم تعالوا صاحب الشغل طلبت معاه دلوقتي
" نسيت اقول انه تاجر فواكه في اكتوبر تقريبا بيبيع بالجمله للتجار والمحلات بالآجل وبعدين يحصل منهم فلوسه"
المهم قلتله لا مفيش حد جاهز دلوقتي
طيب ممكن حضرتك تجيلي دلوقتي ساعه واحده بس تسجلي الحساب ده وانا هدفعلك يوميه كامله
يومية ايه بس يا حاج الساعه دي على المسا عموما انا ممكن اعدي عليك وامري لله مش انت قريب هنا في المنيب

" المنيب دي منطقتي "

قاللي لا انا في منيل شيحه ودي حته بعدينا في اتجاه طريق الصعيد
قلتله ده مشوار بس مش مشكله هجيلك كمان ربع ساعه مسافة الطريق
وفعلا اخدت بعضي وركبت ورحت على المكان
قابلني على قهوه في اول المنطقه كده وقعد يكلمني ويعتذر علشان جابني في وقت متأخر وقعد يحكيلي عن الناس اللي كانوا شغالين معاه وازاي هو كان كريم معاهم وهم كانوا جدعان قوي
شربنا الشاي وقعد يحكيلي عن القهوه دي اللي قاعدين عليها بتاعة عمه الكبير وده ابن عمه اللي بيشتغل فيها خلص تعليمه وساب الوظيفه ومسك القهوه وتعليمه ايه بقى " سياسه واقتصاد!!!!!!
وادي اول الهجص بقى

قلت مش مشكله خليه يهجص تلاقي الواد معاه دبلوم تجاره وهو بس بيترسم عليا مش مهم يعني
قالي تعالي اوريك بيت عمي وبيتي وننتظر السواق اللي جايب الحموله على القهوه التانيه جوه
قلتله ماشي وفعلا قمنا وعدينا قدام بيتين كبار كده واحد بتاع عمه والتاني بتاعه
وعزم عليا تيجي تتعشى قلت له الله يخليك اتعشيت يا سيدنا بس خلصنا بقى انا شغلي الصبح بدري
قعد يرغي معايا بقى على التليفونات اللي باعتهاله ابن عمه من ايطاليا وانه عايز حد يفك له الشفره بتاعة عده N95 ومش عارف ده بيتعمل فين وقاللي تقدر تاخدها تعملها وتجيبها تاني
قلتله ربنا يسهل يا سيدي وقاللي انا جاني منها اتنين لو عجبتك هديك واحده منهم هديه
قلتله يا سيدي متشكر وبعدين قاللي انا مبقتش اقعد هنا كتير اخدت شقه كبيره في ساقية مكي وقاعد فيها وعندي هناك شقه بأجرها لو انت حبيت تاخدها هكرمك فيها هعملك عقد خمس سنين بإيجار 200 جنيه بس ومقدم 2000 جنيه بس
بصراحه بقى هنا بقى فقت خالص
موبايل هديه تمنه ضخم
وشقه اسطوره المكان اللي هو وصفه انا عارفه مفيش فيه شقه اقل من عشر اضعاف المبلغ اللي هو بيقول عليه
وشغل سهل بمرتب معقول
ايه النعيم ده كله بصراحه هو لسه مطلبش مني اي حاجه في المقابل لكن كنت اتأكدت بقى ان الراجل ده عايز حاجه مش مظبوطه بس ايه هي مش عارف
قاللي انت صليت العشا ولا لسه قلت له لسه قاللي الجامع لسه مفتوح تعالى علشان تصلي قلتله كويس ربنا يكرمك
وعلى باب الجامع قاللي ممكن اعمل دقيقه من تليفونك اكلم السواق اصل تليفوني عطلان زي ما قلتلك
قلتله وماله خد كلمه
وفعلا اتصل بالرقم وابتدأ يتكلم وانا واقف مستنيه يخلص
قاللي متدخل تصلي على بال ما اخلص التليفون
بصراحه ضحكت من هبل الفكره وقلتله وانت مش هتصلي يعني
قالي لا ما انا صليت قبل ما تيجي انت
فهمت الفوله وقلتله لا انت تلاقيك مكسل تصلي تعالى يا راجل نصلي سوا
حسيته وشه قلب واتغاظ
والبعيد عامل زي الحيطه بس الحمد لله احنا على باب الجامع قاللي انت قصدك ايه خلاص يا سيدي هدخل معاك الجامع واستناك كمان ودخل قعد قدامي رحت واقف ومخليه قبلتي قدام عيني والتليفون لسه معاه طبعا
صليت العشا وقعدت جنبه رحنا قايمين ولقيته بيقولي هو انت متوضيتش ليه قلتله اصلي كنت متوضي من المغرب الحمد لله قاللي يا سلام والشاي اللي شربناه متمضمضتش منه حتى انت شكلك مخوني يا استاذ ايهاب
ليه بس كده يا حاج لا سمح الله هو انا قلت حاجه
خد تليفونك اهو يا استاذ ايهاب انت شكلك مخوني بعد ما انا دخلتك بيوتنا وعرفتك بناسي وامنتك وهأمنك على فلوسي تقوم تشك فيا كده
ورسملي دور الشهيد الفدائي المجروح في كرامته
قلتله يا حاج عزام المثل بيقول حرص ولا تخون
وعادي يعني اني اتعامل بحرص في اول مقابله لينا مش حقي يعني ولا ايه
قلب سحنته كده وقالي لا يا استاذ ايهاب الواحد المفروض يعامل الناس زي ما بيعاملوه مش تخونهم كده
عملت عبيط طبعا وقلتله عموما انا اتأخرت العربيه شكلها هتتأخر ومضطر امشي بقى قاللي خلاص براحتك هي هتيجي على الساعه واحده بالليل قلتله لا كده هيبقى متأخر قوي انا ماشي
قاللي طيب والناس اللي هتجيبهم

قلتله بكره ان شاء الله هيكونوا معاك طبعا
طبعا انا كلمت الناس قلتلهم انسوا الشغلانه دي علشان باظت لأني متأكد انه لما ملقاش فيا فايده قالك انصب على الناس اللي هيبعتهم وهيبقوا واثقين فيه على حس اني انا اللي اعرفه وكده
تاني يوم الصبح كلمني يسالني هي الناس هتيجي قلتله لا بصراحه مش هيجوا خلاص كده فركش
قعد يزعق ويتخانق في التليفون الراجل الظاهر صعبان عليه النصبايه باظت
شتمني وشتمته وقفلنا السكه وخلصنا
حسبت الخلاصه لقيتني خرجت بكوباية شاي وكوباية ليمون وزجاجة سفن اب شربتهم على حسابه
وهو خد مني دقيقتين على الموبايل يعني انا برده كسبان بتاع جنيه وربع كده مثلا
بس اللي ضايقني قوي اني اعرف ان النصاب ده بيبقى ليه نظره في الناس ومبيختارش غير الطماع او المغفل
يا ترى هو شافني انهي في دول
هو ده اللي زعلني في الموضوع كله

سلااااام

حرب طرواده

2009-06-04T14:28:00.002+03:00

ولو اني مكنتش قادر اكتب حاجه

ونفسيا مش مظبوط خالص لكن بناء على طلب سارة العزيزه قررت اني اكتب واتحملي بقى دمي التقيل وانا زعلان

حرب طرواده

قامت سنين وسنين

وماتوا بالملايين

علشان عيون واحده

فتنت امير اهبل

خطفها من جوزها

ورجع على بلده

والهبله سمعتله

وعلى بلده راحتله

وجوزها طبعا ثار

وبعد جيوش وتتار

شايلين معاهم النار

حالفين لينتقموا

وخطط كتير وحروب

اروح كتير بتروح

مالهمش ذنب في شيء

غير حظهم الأغبر

جابهم في سكة ناس

عايشين بانانيه

وفي النهايه بالحق

بيفوز اللي معاه الحق

وده كل شيء معقول

ونهايته شيء محتوم

فاهمينه وخلصنا

لكن تعالوا نشوف

ليه يبقى طبع الناس

الظلم بلا احساس

واحد يقف ويقول

انا قبل كل الناس

الكلمه لو اقولها

تصبح على رقابكم

كالسيف تشيبكم

ومهما ناس بتموت

ومهما ناس هتموت

مش هامه منهم شيء

كل المهم يا ناس

الكلمه يؤمرها

قرآن ننفذها

صعبان عليه نفرح

صعبان عليه نضحك

غروره صوره

مليون سنه هيعيش

يقتلنا بالكلمات

لكن انا هصبر

مفيش في ايدي سلاح

ولا حتى اقدر اصد

لكن مسيره في يوم

كما كل ظالم فات

هيجيله يوم وشوف

اخرة عذابنا ايه

لا هحاربه ولا اقاتله

ولا حتى هتحداه

انا بس هستناه

يقابلني يوم الدين

ويقولي ذنبنا ايه

تحياتي ليكم كلكم

اللهم لك الحمد

2009-05-28T10:06:00.003+03:00

تحديث مش هبه اختي يا فالحين ومحدش يسال انا فرحان ليه ممكن بس تدعولي وتدعو للبيبي الجميل اللي بحلم يوم اشوفه

خالووووووو

شرير

2009-05-14T07:39:00.002+03:00

البوست ده مساهمه مني في موضوع التحرش الجنسي ووقفتنا ضده

بالتوفيق للجميع

===================================================================

حبيت اجرب اكون شرير

واعيش في قصه من الأساطير

واكون انا الشر الخطير

تنين موافق

ساحر موافق

ان شالله حتى اكون جرير

انا قلت اجرب

واعرف واقرب

ايه المتعه يعني

في انك تكون انسان شرير

ولبست اسود

وجبت خوذه

وسلاحي حامي

وقعدت اخطط

وارسم وادبر

واقول هلاقي

ضحيه حلوه

اقتل واجرب

ملمس دمائها

على كف ايدي

واشوف دموعها

والخوف قاتلها

والكره جوه نظرة عينيها

واللحظه حانت

ورميت شباكي

وجريت عليها

عماله تصرخ

وترفع ايديها

فاكرني فارس

هنقذها يعني

زقيت ايديها

ولويت دراعها

ومسكت سيفي

وغرسته فيها

صرخت وصرخت

والدم ناطر

من بين عروقها

عماله تنزف

تصرخ وتنزف

وانا ايدي دايسه

بعزم ما بي

طلعت سيفي وغرسته تاني

والف مره ادوس بايدي

على نصل سيفي

قطعت راسها

ووقفت بيها

رافعها جنبي

رمز انتصاري

الدم نازل

على كف ايدي

غرق كتافي

وغرق هدومي

ووقفت افكر

انا ليه اذيتها

كان ايه الجنايه

اللي عشانها

فقدت حياتها

مالقتش غير ان الصبيه

كانت ضعيفه

وعرفت اني

وعن جداره

اصبحت واحد

شرير قراري

ومن النهارده

اعتدت دايما

اقف مكاني

ناصب شباكي

واقف منشن

مستني تيجي واحده جديده

استنوا دياما اخبار جناني

وابقى اندهوني

بسفاح اناني

=========================

معرفش ليه ساعات بحس اني ممكن اتعلم ابقى شرير

واحب اجرب ابقى شرير بس يا خساره بتفقس بسرعه

وعجبي

موجوع ليه وانت اللي قاتل

2009-05-06T12:05:00.003+03:00

لمين هعيش

لمين هعيش بعدك هعيش انا ليه

هتسوى ايه ايامى لو مش ليه

وتسوى ايه احلامى لو مش بيه

من غيره صعب الدنيا ديه احس بيها

وحياتى بعده صعب اتعود عليها

مش كل حب بيتنسى هنحب بعده

ولا كل حاجة حلوة بسهولة نلاقيها

املى الوحيد ومليش امل قبليه

املى الوحيد ومفيش امل بعديه

حياتى ليه وحياتى واقفة عليه

من غيره صعب الدنيا ديه احس بيها

وحياتى بعده صعب اتعود عليها

مش كل حب بيتنسى هنحب بعده

ولا كل حاجة حلوة بسهولة نلاقيها

احلم براحتك....ميضرش

2009-04-26T08:52:00.002+03:00

لما يبقى معندكش حاجه تبقى ببساطه عندك كل حاجه
هتقولي ازاي
بسيطه لما مبيكونش عندك مثلا عربيه
تنزل من بيتك الصبح طول ما انت رايح شغلك بتتفرج على العربيات دي حلوه دي مبعجره دي لذيذه دي غاليه دي دي دي ....وهكذا
ليه بقى عمال تفنط وتتفرج كده علشان لسه الأختيارات قدامك مفتوحه لسه محددتش انت هتشتري ايه
ومش شرط يكون معاك تمن العربيه دلوقتي انت بس بتخطط انك في المستقبل هتبقى تشتري عربيه
يبقى لما ميكونش عندك حاجه بتبقى مالك كل حاجه
لما واحد يكون مش مرتبط ولسه قلبه فاضي
بيقوم من النوم وهو بيحلم بالليله اللي قضاها مع هند رستم او غاده عبد الرازق
ينزل شغله وهو متخيل نفسه رايح الشغل مع منى ذكي في عربيه واحده
يرجع من الشغل في الحر والجري في الشارع وهو ماسك ايد نور القمرايه دي وبيجروا بمنتهى النشاط
كل شويه يتخيل نفسه مرتبط بواحده شكل مختلف
وبرده ده بينطبق على البنات كل واحده قافشه ممثل في خيالها وهاتك يا احلام

الفكره ان كل واحد فينا عنده في عقله خيالات وقدره على انشاء واقع ليه لوحده يعيش فيه ويعمل كل اللي نفسه فيه
كل واحد بيعمل لنفسه مجموعة احلام وامالات هايله وحاجات نفسه تتحقق
بس المشكله بقى مين هيتحرك ناحية احلامه
مين هياخد فعل حقيقي علشان يحقق احلامه
الفرق بين الناجح والفاشل مش في الفرص ولا الحظ
الفرق ان ده اتحرك ناحية حلمه
والتاني مستني الحلم يتحرك ناحيته وعمال يدعي وخلاص
مع ان الدين بيقول توكلوا على الله ولا تتواكلوا

يعني الخلاصه اللي عايز يتجوز غاده عبد الرازق يقوم يعمل اي حاجه في حياته علشان ينجح ويكبر ويعرف يتجوزها
وابقوا سلمولي عليها كتير

قرار

2009-04-22T14:07:00.002+02:00

علشان تاخد قرار لازم تكون قد القرار ده
عارف يعني ايه قد القرار ده يعني تكون قادر على تحقيقه
وقادر على تحمل تبعياته – حلوه تبعياته دي – المهم يعني الفكره انك لازم تاخد قرار في حياتك كلها
مش معقول هتفضل طول عمرك كده من غير ما تاخد قرار
بس هو ينفع اي حد ياخد قرار مش يمكن القرار ميكونش صح
مش يمكن ياخد قرار مش في مصلحته
امال هو ربنا عمل لينا صلاة استخاره ليه علشان نستخير ونتوكل
وبعدين هو يعني ايه مش مصلحته وهيعرف منين انه غلط ومش مصلحته الا لو جرب وشاف بنفسه مفيش حاجه اسمها تعرف وتتعلم من غير تجربه
ده الرياضيات واللي كلها قوانين ثابته واضحه يقولك مبتثبتش في دماغك الا لما تحل عليها مسائل عمليه كتير
يعني ايه
يعني لازم تجرب
لازم تمسك بايدك راس الكبريت بعد ما ينطفي على طول علشان تفهم انه برده هيلسع لأنه لسه سخن وملحقش يبرد علشان تفهم يعني ايه بروده لازم تقف في السقعه تحسها
كل حاجه مش هتعرفها وتقدر قيمتها وخطورتها الا لما تجربها بنفسك
عارف من كتر ما الأفلام الأجنبي مثلا بيتعرض فيها انفجارات ضخمه على طول بقت المشاهد ديه برغم حجم المصاريف اللي بتتصرف فيها مبقيناش نحسها قوي
لأننا اتعودنا نتفرج عليها كده من ورا الشاشه الزجاج بتاعة التلفزيون
قاعدين ولا حاسين يعني ايه نار ولهيب وحطام بيطير وناس ممكن تموت فعلا
كل ده علشان محدش فينا وقف جنب انفجار حقيقي في معركه حقيقيه وشاف يعني ايه ممكن راسك تطير بحديده طايره جنب منك يبقى لازم نرجع نقول ان التجربه هي خير برهان
عايز تاخد قرار ولا لأ بقى دلوقتي
ايوه هاخد قرار
ايه هو
قررت اني مروحش جنب اي انفجار ولا نار علشان راسي متطيرش

اتصالات

2009-03-30T11:34:00.002+02:00

اتصالات
مش قصدي الشبكة بتاعة النوبايل
انا بتكلم على فكرة الأتصالات في بلدنا
اي موقف تقع فيه لو عندك اتصالات تخرج زي الحلاوه
تموت حد تتخانق مع حد تشتم حد مش مهم عملت ايه
المهم ان عندك اتصالات وانا بصراحه معنديش اي اتصالات بأي حد خالص
اكبر رتبه في عيلتنا كانت جدي الله يرحمه عسكري في البوليس
قعدت احسب حاجات قد ايه كان ممكن تتغير في حياتي لو عندي اتصالات
اولا مكانش جدي هيسيب اسكندريه لما الجزار اللي قبضوا عليه بيبيع بغير التسعيره اتحبس على ايد جدي فحلف ليقتله طبعا الحكومه قالت لجدي منقدرش عليه احسن حل تسيب اسكندريه وتتنقل مصر
وقد كان يعني يا مفتريين كان زماني دلوقتي اسكندراني بحق وحقيق وعايش في اسكندريه ومتمزج المهم
قعدت افتكر لما كنت داخل من باب الكليه وغصب عني كتفي خبط في دراع امين الشرطه اللي واقف يتفرج على مانيكانات سياسه واقتصاد الجامدين المهم طبعا الراجل حب يترسم قدامهم قفشني من هدومي كده و"انت رايح فين مش تاخد بالك هو يعني الدنيا زنقت معاك مفيش غير هنا تعدي منه انت منين ياض طبعا اخوكم خاف على كرامته فرديت بهدوء وادب خالص انا من الجيزه حضرتك قالي خلاص عدي انت تبعنا مش فاهم تبعهم ازاي بس المهم اني نفدت ولو كان عندي ساعتها اتصالات كنت اكيد هتنفخ كده واقوله انت عارف بتكلم مين يا ابن التييييييت انت
افتكرت برده لما في الكليه طلعوا عيني علشان ضيعوا وصل الدفع بتاعي وقالولي انت مدفعتش السنه اللي فاتت ولازم تدفع تاني يا ستي انا دفعت بس الوصل مش لاقيه
مالناش دعوه انت متسجل مدفعتش
طبعا لو كان عندي واسطه كان ممكن يرجعوا للدفاتر بتاعة السنه اللي فاتت ويتأكدوا اني دفعت بدل ما انا طلع عليني لحد ما لقيت الوصل القديم
لو كان عندي اتصالات مكانش الراجل اللي اشترى جهاز تكييف من ابويا وقضى بيه الصيف كله جه يرجعهوله اخر الصيف ويقوله اصلي مش محتاجه وعايز فلوسي ولما ابويا رفض عملنا محضر في القسم والظابط ابن التيييييييت يقولنا لازم نحل الموضوع ده ودي اديله فلوسه وخد جهازك يا حاج وعوضك على الله
مواقف كتير قوي مش هاقدر احكيها كلها علشان البرستيج يعني وكده
بس المهم اني اتمنيت كتير يبقى عندي اتصالات

طب انا دلوقتي موبينيل ممكن احول اتصالات
ولا الفقري فقري برده

خائن

2009-03-25T08:23:00.003+02:00

"إن افضل اعتذار عن الخيانه هو ان تتوقف عنها"

خائن
تتردد صارخة في اذني
خائن
الكلمة تقطع شرياني
خائن
اسمعها كسيف على عنقي
خائن
لا املك ردا او عذرا
خائن
لا اجرؤ ان اطلب عفوا
خائن
الشبح الجاثم في قلبي
خائن
ينشب اظفاره في صدري
خائن
يصرخ بالكلمة يقتلني
خائن
يصرخ يسالني في غضب
خائن
هانت ايامي واحلامي
هانت تضحيتي بحياتي
خائن
ووعودك كانت زائفة
عن ذكرى كنت ستحفظها
عن قلب سقط ضحيتك
عن جسد ذاب من اللهفه
عن عمر فني في اسعادك
ابموتي افقد اخلاصك
ابموتي ماتت ذكرايا
خائن
الشبح يطارد مخيلتي
يقبض على روحي يخرجها
يصرخ بالكلمة في وجهي
خائن
ينفضني من فوق المقعد
واللحن الناري يتصاعد
لا اعرف هل يعزف شبحي
ام انه يسحر امرأتي
اللحن يعنف اذاني
وكأن اللحن يرددها
خائن
انظر بعيون زائغة
لإمرأتي تعزف بجنون
اتسائل هل كانت تعرف
اتسائل هل تتسائل
عن سر الضجة في القبو
عن سر عذابي وشرودي
انا لن اقدر ان اخبرها
عن شبح امرأتي المدفونه
في جدار القلب صورتها
وفي قعر القبو جثتها
خائن
ويعاود شبحي صرخاته
يسالني بغضب وبثوره
اجرؤت تدنس حرمتنا
بأمرأة اخى تعشقها
او تترك واحدة اخرى
تدميني بصوت خطواتها
خائن
موسيقى العزف تتصاعد
وغضبة شبحي تتذايد
يرتعد في غضب وكأنه
يرقص من صوت الألحان
يلتفت اليها في عزم
وفي لمح البصر بلا تردد
يقتلها بقسوة اشباح
قاتل
اصرخ في يأس في مكاني
قاتل
وهذي كانت اخر كلماتي
+++++++++++++

==================

البوست ده كان تعليقي على صوره ناشراها ليساندرا في مدونتها من وحي الصوره والصوره عجبتني قوي فكتبت البوست ده

الشجره

2009-03-07T22:10:00.002+02:00

الشجر عامل زي البني ادمين
والنهارده هتكلم عن شجره من دول
الشجره لما بتتولد بتكون ضعيفه ومجهده
العود طري
واي شده بتقلعه
واي قسوه عليه بحبل جامد تعوجه
في ناس بتربط بالحبال جذع الشجر من يوم تيجي وتزرعه
عشان اما يكبر يبقى ضهره منحني
ميسدش الشباك بورقه الكبير
لكن ده طبعا لما يبقى العود طري
والجذع لسه ضعيف قوي
والشجر دية كانت ضعيفه وهاديه زي صفحة نهر في بداية المسار
لكن الجانيني كان غبي
قال ايه عشان تبقى جميله وطيبه
لازم يشد الحبل يعصرها قوي
علشان تصير حلوه وسهله عليه يشيلها يحطها
الشجرة طلعت حلوه فعلا في العيون اللي تشوفها تشدها
لكنها من جوه تصرخ الف اه
الشجره كبرت على البستان ولازم تنقطع
وتروح على حته جديده تليق لها
لكن الجنايني قرر انه هو بس اللي يقول على فين تروح
ولا همه هي عايزه ايه
ولا همه هي ناسبها ايه
والصفقه تمت في الخفا
وجاي قال علشان ياخدها بجدرها
ويحطها عند الجنينه اللي صاحبها دفع لها
الشجره المره دي عصيت زمجرت
عم الجنايني مش مصدق من العجب
الشجره نطقت يعني ايه
ازاي وليه
بس اخرسي
يا شجره يا لعينه لسانك تقطعي
مالكيش تقولي رايحه فين
ولمين اكون
الشجره كبرت وفروعها صبحت مذهله
نفضت فروعها والورق
ورمت عليهم جذع واحد من الخشب
عم الجنايني اندهش
لا هو قادر يجبر الشجره على الرحيل
ولا هو قادر يقتنع
بأنه مش قادر يحكمها زي ما كان زمان
بيهزها
يرعبها كان بالفاس زمان
لكن النهارده الفاس قدم
والصحه صبحت مش قوي
مقدرش يعمل أي شيء
فرضخ لها
وسابها تختار ارضها
القصه لسه في البدايه يا ناس هنا
ولسه يا ما راح نشوف
يا هل ترى الشجره صح في الأختيار
يا هل ترى الشجره راح تقدر على الدنيا الغريبه لوحدها
طب لو في يوم حست برغبه في انها تكون كما عم الجنايني كان لها
وتكون قويه في كل شيء
تفرض على الأرض الجديده رأيها
يا هل ترى ايه بكره يحصل يا شباب
انا مش هاخمن أي شيء
هاستنى لما يكمل كل شيء
وهابقى احكي واقول عليه
يمكن يكون الجاي احسن من اللي راح
يمكن

ورده ريفيه

2009-02-26T11:15:00.002+02:00

القصه عن ورده
مش ورده في جنينه
دي ورده بريه في الريف كانت عايشه
مزروعه من سنتين بالحب مسقيه والطيبه راويها
الورده كانت حلوه لكنها خجوله
برائتها وجمالها عملولها اسطوره
الناس بتعشقها ولا يوم حدا يقدر يقطفها بصوابعه
وفي يوم في عز الصبح وردتنا جت صحيت على هيصه وحكايه
راعيها وحارسها قرر يجيب عنده هنا مزرعه للنحل
من زهره يعمله عسل بأنواعه
النحل كان يجي حواليها ويعدي واول ما يلمحها على طول كده يهدي
شغاله ولا اتنين واقفين كده عليها
وفي يوم بطرف العين شافت من النحاحيل
ذكر في غاية الحسن
بيشتغل حارس في قصر مولاته
ولا عمره فكر يوم يجي على ورقها او حتى يلمسها
عجبها الوانه وشكله ومقامه ما بين عشيرة النحل
الورده ببرائه مالت بورقاتها
عشان عينيه تشوفها فتحتله براعمها
نشرتله رياحينها
واتبسمت لجله
مالت بطرف الغصن علشان تبان اكتر
لا هو حس بشيء
ولا هدى حتى يبص
وفي لحظه واحده بس
وبدون ما يدرك حد
الورده منزوعه
من جدرها بتصرخ
اتاري طير احمق
لمحها قدامها
الوانها عسوله
وورقتها مفتوله
خطفها بضوافره
عشان يقدمها لعصفورته في العشه
الورده نزفت شهد
لفت بأخر نفس
ناحية مكان بيتها
واتنهدت وفي يأس
بصت لبيت النحل

يمكن بيها يكون حس
لكنه ولا شافها
ولا حس احساسها
ضيعتي عمرك ليه
على حد مبيدركش
ولا عمره يوم يفهم غير في الحرس والدم

جنيه مسحوره

2009-02-22T21:08:00.004+02:00

تحديث

ليس بالضرورة ان تكون كل اساطيري هي من واقعي انا

بعضها حقيقي وبعضها قرأته وبعضها سمعته من بعض الناس ولكني لا احب ان احكي الواقع كما يحدث والا كنت غيرت اسم مدونتي وسمتها برنامج حياتي القديم ده علشان كده بكتب قصص من مجتمعنا لكن باسلوبي انا زي ما تخيلتها مش دايما هاكون طرف في القصه وساعات هاكون طرف فيها ده للتوضيح فقط

جنيه مسحوره من ارض مهجوره
ههههه
حلوه قوي البدايه دي
عموما قبل ما ابتدي لازم احل اللغز اللي فات
الحل ان فاخر صاحبي مسافر عرفتم بقى طبعا معظمكم خمنوا الفكره صح
المهم حدوته النهارده ايه
عن جنيه من دنيا تانيه
دنيا غير الدنيا بتاعتنا خالص
الجنيه كانت شقيه الجنيه محدش قدر عليها طول عمرها
مجنونه ومغامره عايزه تجرب كل شيء عايزه تعرف كل شيء وعايزه تلعب وعايزه تضحك
واللي يجنن عايزه تحب
والحب عند الجن شيئ مش بسيط لأن اللي تحبه هتديله كنوز كتير لكن عليه يخلصلها ولو في يوم غدر بها راح تقتله
من كتر ما لفت وطافت في البلاد شافت كتير وكتير شافوها اتجننوا
لكن في يوم حبت ولد
مجنون كده قوي زيها لكن بشر
ولأنه يا اخوانا بشر
غلط اكيد وغلط كتير
والأكاده يا ساده يا كرام في انها لم تقتله
فضلت تحاول تعدله وتحسنه
بتحبه بنت الأيه قوي
لكن كما قلنا ووضحنا لكم
جنيه يعني مفيش معاها كلام هزار غدرك هيجي عليك قوام
وفي لحظه واحده خطفته وفوق جبال الدنيا طارت بيه ومن اعلى قمه حدفته
نزل مكسر زي تمثال محترق
جريت بتبكي نار ودم الغدر اصله بيحرق كل شيء لو حتى جن
جريت على العراف دموعها مولعه
عايزه تقوله وتساله فين الطريق
مسح على خدودها الجميله المذهله وشرحلها وسمع لها وشاور لها على السكه فين

فرحت وحست بالأمان وفي ثانيه ظنت انها بتحب عرافنا الهمام واترددت يا هل ترى تبوح تقوله بسرها
لكنها شافت كلامها وسرها باينين قصاده في نور ونار بنوره مسحوره قالتله سرها
وسمع لها

لكن ما يقدر يحترق بنار الغرام لأنه طول عمره عليه الحكم ساري من زمن
لا يحب واحده زيها ولا يقترب من سحرها
والا يصبح وقتها محبوس في قمقم من دهب
مقدرش يقبل حبها

وهي كانت عارفه كده بعدت وجريت من طريقه وسكته وفجأه اختفت
رجعت تلف بلاد بلاد وغابات تاخدها لأرضها
وبحور تشيلها تحطها وجبال تسافر وسطها
وفي يوم عجيب وقعت في حب جديد عجيب
صياد فقير
شكلو جميل وحبه باين من عينيه
بيحبها وبيحسها
وحلفلها ما يخونها يوم طول رحلته
فرحت صحيح بمحبته لكنها كانت خايفه منه في سرها
يا هل ترى هيصون حياتها وحبها
لكنها ملقتش غيره يحبها والوحده صعبه حتى عالجن الشجاع
فقررت تتجوزه
واتجوزوا
لكن الحكايه يا حبايبنا مخلصتش هنا
مجنوننه من يومها وعايزه قلب مارد من شرر مش عايزه صياد ابن صياد محترف
كان كل يوم يرجعلها ويضمها ما بين ايديه ويحبها
لكن حبه مكانش هو حبها
ازاي يا ناس تجوزوا جنيه مسحوره بقلب مليان نور ونار
لقلب غلبان زي ده
فأتجننت ثارت عليه
لازم تكون فارس شجاع لازم تكون امير كبير
مقدرش اكون زوجه انا لصياد فقير
صرخت وصرختها حرقت جوانب قصرها
وهو مش عارف يكون شئ غير كده
بسرعه رجعت ارضها
بحثت عن العراف بتاعها اللي نسيته من زمان
جت تساله ايش تعمل الجنيه ويا قلب من الحطب
لا قادره ترمي النار عليه لا تحرقه
ولا قادره تحيا ويا قلب من الخشب
عرافها بصلها ودور لحيته
عارف دواها وحلها لكنه لا يقدر يقول ولا يعترف
سالت وصرخت يا طبيبي فين دواك
سكت شويه وقالها
عشرين دوا ليكي هنا
لكني لا اقدر اجيبلك ايهم لأنهم في كل ترياق من تراييقي انا وسط الدوا في مر علقم بخلطه

وساعات يكون مسموم كمان
خايف لا سحري وقوتي وادويتي تيجي تفيدك تقتلك
يا هل ترى جاهزه يا جنيه يا حلوه يا مذهله تتحملي طعم الدوا
يا هل ترى هتفضلي علقم في زورك تبلعيه
ولا اجيبلك سم مخلوط بالعسل
ولا اسيبك ترجعي لصياد فقير حبك في يوم ومستنظرك

اسطوره فرعونيه مش حقيقيه

2009-02-08T14:30:00.002+02:00

هاحكيلكم اسطوره فرعونيه
بطلها الأمير نخت وده امير كان جامد جدا بس لسوء حظه اتفق عليه اربعه من السحره الأشداء
وقرروا يحبسوه علشان يستعبدوه ورموا عليه لعنه يفضل في الجب محبوس
لكنه كان طيب والكل بيحبه والشمس والقمر قرروا يساعدوه
الشمس تبعت نورها ودفئها عليه من بين جدران الزنزانه تكسر الموانع وتعبر تنورله وتدفيه
والقمر يجي بعديها يطمنه في لياليه ويخاف عليه ويحميه
وعرفوه ان مفتاح حياته مدفون في صخره تحت زنزانته
وكل اللي عليه يلحق يلاقيه
قبل ما السحره تعرف بيه
وبقى كل يوم يحفر حبه صغيرين
والسحره مش عارفين
وفي يوم عرف ان الميعاد قرب
لازم بسرعه يخرج المفتاح
وبدأ يسرع من خطته ويحفر بسرعه
لكنه فجأه الشمس فقدت سحرها اللي كانت بتساعده بيه
ومبقتش توصل عنديه
بالعافيه بتبعت له بواقي اشعتها من بين القضبان
وكلها كام يوم والشمس هتبعد عنيه
وقف عن التكسير والتدوير
وبصلها من بين القضبان
الشمس خافت عليه
قالت له سيبك مني واتلفت لمهمتك وقتك هيهرب منك
ابتسم وقال مهما كان اللي فاضل من الوقت قليل مقدرش اسيبك تمشي من غير ما اشبع من اخر قطره منك
سلام يا اعز صديق

طبعا محدش يسالني حصل ايه بعد كده لأني لسه مش عارف ومحدش يسالني طب القصه بترمز لأيه ولا حاجه كل ده انا مش هاقوله انا فاهم وخلاص يالا سلام بقى

2008-12-27T23:07:00.000+02:00

عذرا غزه لا اجد للصمت بديل
فأنا كبلدي اصبحت عميل
اهدي جاري النازي الغاشم
غازا وحديدا وهدايا العيد القادم
واقدم دمكي وشهدائك فوق البيعه
انا لا املك الا سكوتي
فكلامي هو محض خيانه
بالأمس اطمئن ابنائك
كي يرتاحوا و تغفل عينك
واليوم اراقب في ذل
دمك يراق على اراضيكي
عذرا غزه لا املك صوت كي اشجب
فأنا في بلدي مأثور
مثلي مثلك
ذلي وعاري وضعفي وجبني
شيء مالوف في بلدي

2008-12-21T15:12:00.000+02:00

بيقولك ان الدنيا دي زي البطيخه بالظبط

خضراء من الخارج

حمراء من الداخل

وفيها بذر اسود كتير

ومحدش يسألني تقصد ايه بده

لأن كل واحد حر يشوف الدنيا بالطريقه اللي تريحه

انا شايف الدنيا زي البطيخه ودي حريتي الشخصيه

بس ايه هو تعريف البطيخه اصلا

قشره صلبه او شبه صلبه اصلها مش معدن يعني

ودي هي المعوقات اللي بنقابلها في دنيتنا واللي بتعوقنا عن اننا نوصل لأهدافنا الحمراء المسكره اللي جوه البطيخه ده طبعا حسب اعتقادنا لأن ممكن البطيخه تكون من جوه قرعه ولا مؤاخذه يعني فتلاقي نفسك تعبت على الفاضي في الأخر واللي حسبته مسكر يطلع ممرر ولا ايه

اما بقى بعد المجهود والتخلص من القشره الصلبه محدش يفتكر ان التعب في دنيتنا بينتهي بتحقيق الحلم والوصول لتتر النهايه في الفيلم

حتى وانت عايش الحلم وعلى افتراض انه طلع احمر ومسكر وزي الفل بس برده لازم لازم تلاقي جواه بذر اسود كتير

لأ وايه اسود اسود يعني مش اي كلام وفي كل حته ويخليك متعرفش تزلط حته مسكره على بعضها هو كده مينفعش حاجه تبقى خالصه مخلصه ابدا

لكن لما تفكر شويه كده وتفتكر مامتك ايام الصيف بعد العصر لما بتحمر اللب بتاع البطيخه وتجيبه تقزقزوه انت واخواتك زي القرود في الجبلايه هتعرف ان حتى المشكلات بتاعة البذر دي ممكن لو عرفت تتعامل معاها صح هتحولها لتسليه مش بطاله

وعلى طريقة البنت خيخه نطلع من الموضوع ده بأيه

ان الدنيا زي البطيخه ده اكيد

ان الأهداف المسكره لازم تكون متحوطه بجدران شبه صلبه يمكن اختراقها بالعمل والمثابره

ان الحياه فيها مشاكل سوده كتير بس بالتفكير السليم ممكن تتغلب عليها وتكون حياتك بدون مشاكل

وسلام بقى ادعولي

تكلم ال .... تلهيك واللي فيها تجيبه فيك

2008-12-14T13:22:00.001+02:00

تحديث : معلش يا جماعه كتبت البوست في لحظة ضيق من موضوع شخصي شويه مع واحد قريبي المهم يعني قلت افضفض من غيظي لكن مش قصدي اني ادعي الناس تبقى بالصوره الوحشه دي انا بس حبيت اكتب البوست بصوره ساخره شويه لكن لما تضيف ساخره مع كآبه بيعملوا مزيج منيل اسود فمحدش ياخد على كلامي قوي
===================================

لما يكون عندك مشكله في تصرفاتك او في طباعك
تعمل ايه؟؟

اقولك على حاجه جميله جدا ومشهوره جدا ومنتشره بطريقه فزيعه

دور على ناس عندهم نفس المشكله واتريق عليهم فيها ولو ملقتش حد عنده المشكله دي لبسهاله يعني اتبلى عليه وخليه يصدق انها عنده
مش فاهمين !!!!
خلاص هاديكم مثال:
لو انت مثلا بتخاف من الكلاب يبقى تدور على حد من صحابك بيخاف من الكلاب وتفضل تتريق عليه قدام الناس وتحرجه لأنه جبان وبيخاف من حاجه عبيطه زي الكلب وكده يعني هتبص تلاقي نفسك بعد شويه انت اقتنعت ان الكلب مبيخوفش اصلا وانه حاجه عبيطه
مثال كمان
لو انت انسان كداب ومش عارف تتخلص من صفه معينه دور على حد غيرك من زمايلك في الشله مثلا ولف على كل اصحابك قول عليه ان هو اللي كداب وطلعها عليه سمعه ان هو كداب هتلاقي الناس كلها اقتنعت على طول انه كداب وكأنهم مستنين اللي يقولهم كده الناس بتفرح قوي في مصايب بعض صدقوني
مثال تاني
لو انت ليك حد يعرفك وعايز منك مساعده وانت مش عايز تساعده وبعدين في حد تاني كويس معاه وانت عرفت كده يبقى لازم تركز هجومك على انك تفهمه ان الحد ده مش كويس وانه مش بيساعده ولا حاجه انما هو بيضحك عليه وان انت الوحيد اللي قلبك عليه
امثله كتير ممكن اقولها بس المفروض انكم اذكى من كده وعدى عليكم الموقف كتير اتعلموا بقى الطريقه وافهموها كويس هتلاقوها ناجحه جدا اكتر من اي طريقه تانيه

دور على عيوبك ارميها على الناس هاجمهم بشراسه اعلن في كل مناسبه عن فضلك على الناس كلها واخلاقك العاليه وقيمتك التي لا تقدر بثمن .

اه محدش يقولي ان ده مش من الأخلاق ولا يقولي ان ده غلط لأنه لو غلط امال كل الناس اللي بيعملوه معايا وقدام عيني مع ناس تانيه بيعملوه ليه الا اذا كانوا مجربينه و نفع معاهم جدا؟؟؟!!!!

حسبي الله ونعم الوكيل

البلوره السحريه

2008-11-23T22:42:00.002+02:00

يا صاحبي ياللي في الشده كنت بالجأ ليك
وفي نور كلامك بشوفلي طريق
ولما احس غبائي يستحكم
اروح واقولك شدني وانا غريق
انا كنت لما احس الدنيا بتضلم
واحس اني عبيط ومتنيل
انا كنت بجري على بابك واخبطلك
وانده واقولك شدني انا غريق
تفتح ببانك بلهفه وشوق
وتمد ايدك في ايدي تشدني للنور
وبمعلقه فضه بتلمع نور
تسقيني طعم العلم والمعرفه والنور
وافتح ببان القلب والشبابيك
واكب منه الغبا والضيق
واعبي عقلي وقلبي منك خير
صحيح انا مشكلتي مش وياك
ولا الحكايه خناقه كانت معاك
كل الحكايه انا وانت برده يا زوق
واقعين في حيره ولخبطه بالكوم
يا صاحبي مين ينجدك من الغبا
وانت اللي كنت زمان رمز الأمل والنور
بلورتك السحريه راحت فين
افتحها ابوس ايدك وورينا
شوف مين غلط ومين اذى مين
افهم وفهمني وقول للكل
وافصل بحكمك في امر الغل
ده انا كنت مطمن ومسنود بيك
ومعتمد على رؤيتك بعين العقل
دلوقتي بتزعقلي ومتغاظ ليه
د ه انا عمري ما خنتك ولا كدبت عليك
انا بس مش عايز قراري يكون
غباوه في غباوه وظلم في ظلم
فهمت يا صاحب البلوره يا صديقي

في المترو والمحاكمه

2008-11-16T14:45:00.003+02:00

تحديــــــــــــــث

الى الأستاذ خالد عزب بص حضرتك البوست ده عن الحشريين والشخصيات اللي بتدي رايها وتحط مناخيرها فيما لا يعنيها والناس كلها لامتني على طولة بالي مع الشخص ده علشان كده قررت اني مأسكتش لحد حشري بعد كده او يفكر يهين تفكير

علشان كده احب اقول لحضرتك مع احترامي ليك يعني

"اطلــــــع بـــــــره"

ايوه بالعربي كده وبالزوق كده متجيش مدونتي تاني لا تقول رأيك ولا تتعب نفسك وتضيع وقتك الثمين عندي لما حضرتك شايف كلامي هايف ورغي من غير داعي بتتعب نفسك وتقراه ليه ثم مين اصلا قال لسعادتك ان ده موقع حكومي تعليمي دي مدونتي الشخصيه بقول فيها اللي يعجبني بس واتكلم عن تجاربي انا بس يعني كل ما فيها يخصني لوحدي انا واصحابي اللي بيهتموا بكلامي انا بقى لا اعرفك ولا عايز اعرفك ولا يشرفني اعرفك من الأخر وبدون تطويل علشان وقتك الثمين اطلع بره ومتجيش هنا تاني

والكلام لأي شخصيه حشريه, اللي يحب ينقدني يتفضل ينقدني لكن اللي يعمل علامه ويحاول يهزأني او يتطاول في الكلام مالوش غير ابو ورده هاستلفه من آبي

في المترو والمحاكمه

تاني حكايات من المترو يا اخواني
المره دي بقى هاحكي موقف حصل و مبقتش فاهم حاجه خالص منه
نبتدي
قعدت في المترو من اول الخط طبعا علشان انا ساكن في المنيب وهي اول الخط والحمد لله عرفت اظبط نفسي اني مقعش في غلطة عربية الستات دي وبقعد في عربية الرجاله على طول
المهم قاعد وفرحان بالموبايل بتاعي علشان عليه شوية برامج جديده والعاب بقى وفرحان بيهم زي اي محدث نعمه عادي يعني – الله يسامحك يا سووو انت اللي نصحتني بالموبايل الثري جي – المهم يعني قاعد بلعب في حالي وماليش دعوه بحد والمترو رايق لسه, وشويه الدنيا بدأت تتزحم وجه واحد وقف قدامي وتقريبا هو واقف فوق مني شويه شويه وهيدوس على دماغي
المهم طبعا انا بصيت لقيته مش راجل كبير ولا حاجه بس هو تقريبا عايز يتفرج على الموبايل ويمكن انا ازهق فياخد الكرسي عملت فيها عبيط طبعا وسبته واقف على رجلي براحته ,

لحد هنا وعادي الموقف بيحصل كتير وانا مشغول في الموبايل حد وقف جنبه وراح حاطط شنطته جنب مني على الرف اللي جنبي مأخدتش في بالي بصراحه ومبصتش هو مين اصلا ,

وبعد شويه الراجل اللي انا مكنتش شايفه ده بدل مكانه مع اخينا الغتيت اللي راكن فوق مني علشان يسند ظهره بصراحه كنت سرحان فمخدتش بالي ان المفروض اني اقومله لأنه فعلا راجل كبير شويه في السن وعادي يعني انا لما بلاقي حد كبير بقومله من نفسي من غير طلب منه او من غيره بس الشاب اللي جنبي فجأه اخدته الحماسه وقام وقعده لحد كده والموقف عادي خالص وانا مش مدي اهتمام هو صحيح سبقني للثواب بس برده هو فضل سايبه واقف قدامه كتير وانا مكنتش واخد بالي المهم بعد ما الراجل قعد شكره على معروفه والتاني يقوله لا يا حاج ده حقك اصلا ومكانك التاني يقوله الله يكرمك يا ابني وبعدين فهمت ان الكلام يقصدوني انا بيه على اساس اني تنح كبير وازاي مقمتش انا للراجل الكبير وان الشاب التاني قام مضطر لما لقى ان انا مفيش مني فايده مبقتش فاهم بصراحه هو ايه الفرق لو قام هو او قمت انا المهم حد قام وبعدين هو كان واقف قدامه هو يعني هو اقرب واحد منه المهم انا طبعا سمعتهم وعملت عبيط , ده يقوله اصل الناس معرفش جرالها ايه وده يقوله معلش يا ابني يمكن تعبان ولا حاجه
سكت وقلت يا واد طنش خااالص
يقوله اصل الزوق ومعرفش ايه وبعدين حسيت الكلام هيبتدوا يلبخوا بس قبل ما اتكلم اتلفتلي الراجل الكبير وقالي "مش يمكن تعبان هو مش انت تعبان برده وراجع من الشغل تعبان"

بصيتله وقلتله" الحمد لله على كل حال"
راحوا باصينلي باستغراب وقالي الراجل الكبير" انت بتشتغل ايه يا ابني "
حسيت في نبرة صوته كده انه عايز يقيمني كده ويعرف انا ايه في البلد دي يعني
رديت بهدووووووء " على باب الله "
ابتسم وقالي "لا بجد بتشتغل ايه؟"
كررتها تاني " على باب الله "
قالي" طيب انت خريج ايه ولا دي كمان على باب الله"

ابتسمت غصب عني وقلتله " على باب الله "
"يا سلام هو كله عندك كده انا عايز اتعرف بيك يا اخي ولا فيها حاجه دي"
"طيب اسمك ايه يا سيدي"
قلتله "واسمي يفيدك في ايه ولا شغلي يفيدك في ايه"
قالي" انا بس عايز اعرفك يمكن اقدر اخدمك بحاجه انت اصلك مش عارفني انا مين"
ان ان ان ان ااااااااااااه تشششششششش

مين حضرتك ؟؟؟

"انا ........" رتبه كده في الجيش مش فاكرها بصراحه , طبعا منظره ميديش على رتبه خالص وبعدين قعد يقولي انه ممكن يفيدني في جيشي وممكن يفيدني في العسكريه بتاعتي في الكليه حبيت افرسه بقى
قلتله انا ماليش جيش واخد اعفاء نهائي, وده حقيقي فعلا راح الظريف اللي واقف وقعده يقولي" اه اصله حيلة بابا وماما الحيله يا سيدي "

بصيتله باستخفاف وسكت معبرتهوش المهم راح سالني" طيب والعسكريه في الكليه"

قلتله لا ولا دي كمان ماليش عسكريه
الراجل حسيت هيضربني وبعدين قالي "ليه بقى "
قلتله" كده انا حاله خاصه على باب الله"
راح قالي "ااااااااه طيب "

مش عارف هو فهم ايه بس المهم انه زهق مني وحس اني مش بتعصب بسهوله ولا هيعرف يغلس عليا رجع سالني طيب هو اسمك ايه بس قلتله" اسمي ايهاب "
قالي "يعني اسمك حلو اهو امال مكسوف تقوله ليه "
همهمت في سري "لا اله الا الله" سمعني وقالي" الله يعني مسلم اهو" قلتله" يا سلام ايه المشكله "

سالني طيب بالنسبه للشغل يعني قلتله من الأخر بشتغل كذا كذا وخريج كذا كذا
تحب تعرف حاجه تانيه
قالي لا شكرا وسلم عليا كأننا اصحاب وسابني ونزل

بصراحه حسيت انهم حاكموني وحققوا معايا كده بأسلوب غريب برغم ان اللي كان واقف قدامنا سخيف وكنت ممكن اهزأه بس الراجل الكبير كان متعمد بصراحه ان كل كلامه يكون في حدود الصح يعني متعرفش تمسك عليه اي اساءه كل كلامه بشياكه كده برغم حشريته وسخافة بعض ملاحظاته الا اني مكانش ممكن ارد عليها باسلوب ناشف
ما علينا سرحت بعد ما نزل يا ترى انا في نظره دلوقتي ايه
تفتكروا انتوا ايه
وهل انا كنت غلطان
ولو حصل معاكم الموقف ده هيكون رد فعلكم ايه

ابن البواب .... خسرتنا القضيه يا منيل

2008-11-09T10:39:00.004+02:00

تحديـــــــــــــــــــــــــــث
يا جدعان مين قال بس ان انا بتهم البنت او بحملها الجريمه انا بقوله خسرتنا القضيه واثبت للكل ان البنت مش هي اللي عليها اللوم ده في قضية الأغتصاب لكن انا بتهم البنت وبلوم عليها في قضية التحرش بصوره عامه ان البنات برضه بقت بتتساهل قوي في لبسها وده في ظل ظروف بلدنا اللي كلنا عارفينها متوقع رد فعل الشباب يكون ايه متحطش البنزين جنب النار وتقولي متخافش متحطش اللحمه عريانه ورخيصه جنب الجعان وتقولي مش هيجي جنبها انما الأغتصاب ده قضيه محسومه طبعا وعمري ما قلت ان البنت هي اللي غلطانه وهي اللي تتحمل جريمه زي دي
انا لو ماشي في الشارع واتخبطت في واحد بلطجي بدون قصد وبعدين اتلفت رزعني بالبونيه في وشي نزلني مغمى عليا المفروض ان الناس تقولي انا عيب عليك تتخبط فيه ولا ايه بالظبط
الموضوع يا جماعه واضح ومفيهوش لبس او عدة اراء
انا بس حبيت اذكر جوانب قضية التحرش كلها من اغتصاب وعري وتسيب .

اكيد كلنا سمعنا عن قضية ابن البواب اللي حاول يغتصب الدكتوره وقتلها لما قاومته .
حادثه مفجعه ورعبت ناس كتير من فكرة ان حتى بيوتنا مبقتش امان واننا بقينا لازم نحرص قوي وننسى اسلوب زمان ونظام الدنيا امان والناس لسه طيبين مبقاش خلاص حاجه من الكلام ده

الواد ابن البواب استغل ان الدكتوره لوحدها وبالحيله اخد منها المفاتيح ودخل هجم عليها ولما قاومته قتلها و طبعا اتقبض عليه وبيتحاكم دلوقتي
المشكله بقى يا جماعه ان انا كنت من الناس اللي بتأيد فكرة ان انتشار ظاهرة الإغتصاب دي سببها الأول وليس الأوحد هو العري المتفشي والتسيب وتساهل البنات والستات في حاجات مينفعش يتساهلوا فيها ابدا وحتى موضوع التحرش في الشوارع ده كنت باني نظريه ان لجوء البنات للبس الضيق والشفاف واللافت قوي ده طلبا للجواز السريع هو ده السبب وراء التحرش .
بس المره دي الجريمه اثبتت ان نظريتي مش صحيحه قوي يعني
دكتوره وفي بيتها واكيد يعني لما تعرف ده متتوقعش انها بنت لسه عايزه تتعايق بجسمها وشبابها ولابسه محزق وملزق

طيب ايه السبب
ايه اللي ممكن نبني عليه الدوافع

مش قصدي دوافع الواد المجرم, ده دوافعه معروفه شاب ومش لاقي واكيد المخدرات لعبت دور هايل وفعال جدا ومفيش دين ولا تربيه ومفيش فلوس يظبط نفسه مع اي واحده بالفلوس وشاف ست جميله طمع فيها .
لكن انا بتكلم ايه اللي خلى المجتمع كله عباره عن مغتصبون بعد شويه بلدنا هيبقى اسمها المغتصبون المتحدون
كل واحد بيغتصب بطريقته
واحد بأيده وواحد بعينه وواحد بلسانه وواحد بودانه وواحد بمناخيره وواحد بيصدق على ده كله بجسده
طيب نبص على الطرفين بالراحه كده ونشوف مين اللي غلطان اكتر
ومحدش يرمي التهمه على طرف واحد
الطرفين في رأي بقوا مجرمين
ايوه مجرمين

نبتدي بالراجل الله يهديه
اولا دينا منعنا عن اننا اصلا نقعد في الطريق الا لضروره عارفين ليه علشان منتحرش بالنساء الماره ولا ننظر اليهم بصوره سيئه
والنبي (ص) قال انه لا يصافح النساء كل ده علشان منحاولش نلتصق بيهم باي صوره ومع ذلك تلاقي الناس في المواصلات احلى مكان ينقيه الراجل والعربيه كلها فاضيه لازم تلاقيه يجري يقعد جنب بنوته حلوه قاعده وسايب الكراسي الفاضيه كلها واحد تاني وهو معدي في العربيه تحس ان هو ناقص يقعد على رجلها وهو معدي جنبيها وياسلام بقى على اللي ماشي في الشارع وكل واحده معديه عينه في عينها يبصلها لدرجة انها تتخض منه وساعات تبصله باستغراب من نظرته هو بقى يقولك اهي استجابت للمعاكسه يقوم ناقل للمرحله اللي بعديها ويبتدي يسبل بالكلام
وغيره بقى اللي معندوش كلام يثبت بيه المزز يقوم ايه يخلي بنت حلوه معديه مهما كانت بقى وهوب تلاقي شتيمه قذره او نص قذره يرزعها في قفاها بدون سبب وكأنه ذنب انها حلوه وعاجباه
ده غير بقى الموضه بتاعت التحرش بالأيد وشد الهدوم والحركات دي وبتبقى جماعيه كمان تقريبا علشان ياخدوا ثواب الجماعه الله يهديهم

واللي برده غايظني هو سلوك الناس في الشارع ورد فعلهم لما بيبقى فيه موقف من دول, الناس بقت تنحه بشكل ولا ليهم دعوه كأنهم في اوروبا ولاد المنكوبه بنت بتستنجد وواحد بيضايقها والناس ايه تبص بتناحه كده وتمشي ويجيلك واحد ابن تيييييييت يقولك اصلها لو محترمه مكانش حصلها كده يعني هو البعيد اللي عاكسها هو اللي محترم بقى.

وياسلام على التحرش في الشغل وده انواع فيه المباشر القذر وده غالبا من شخص ليه سلطه عليها وفيه اللي غير مباشر يعني نظام عايز كل بنت تهزر معاه وتسلم عليه وتقف تهزر جنب منه شويه ودول معروفين والبنت تقدر توقفهم عند حدهم , اما اللي يغيظك بقى هم اللي غيتهم التريقه والشتيمه من وراها طبعا والتلقيح باشاعات وسفالات لا تصدق .

طيب كل ده وحاجات تانيه كتيره هي سفالات واسائات من الرجاله نيجي بقى للطرف التاني

تلاقي الستات ماشاء الله بقوا حلوين ونغشين كده في الشوارع وكأن لا عندنا دين بينهانا عن التبرج ولا عن العري وكأن التحايل على الدين بقى لعبتهم كل واحده ايشي باديهات وايشي بناطيل واتحدى بنت تقولي لا ده لبس محترم!!!!!!!

بلاش نضحك على نفسينا اللي بيغلط يقول بغلط ونفسي اتغير مش يقولي لا ده عادي ومفيهوش حاجه وحريه شخصيه
لو عايزين دي تبقى الحريه الشخصيه ونبقى زي الدول الأجنبيه يبقى تتحملوا الإغتصاب والسفالات وكل البلاوي اللي عندهم هناك مش تقوليلي الرجاله معندهاش نخوه
هي اصلا في النخوه اللي عند الرجاله اللي سايبين بناتهم وستاتهم بالمنظر ده وكأنهم عميوا فجأه ومحدش بقى شايف حاجه
المكياج بقى اجباري لكل بنت والحواجب اللي نهى الرسول عن المساس بيها بقت نضافه شخصيه الحجاب بقى مجرد منديل ملون على قد الراس والقصه بتهفف من تحتيه لحسن نقول عنها قرعه البدي مجسم كل تفصيله في جسمها واسمحولي اقول انكم عباره عن كتل دهن متراصه فوق بعضها وطبعا البنطلون اللي بحجة انه عملي ومريح في المواصلات لا هو عملي ولا نظري حتى ضيق لدرجه خانقه وجسم كل تفصيله حتى لون الأندر وير باين منه ده غير الساقط والذي منه وياسلام بقى على الحياء في الشارع الضحك بصوت عالي والهزار مع الشباب بالأيد وفي مناطق مذهله بصراحه في جسمهما مبقاش فيه مشكله في اي حاجه كله عادي
يعني تقدروا تقولوا ان البنت رخصت قوي عند نفسها علشان توصل للمنظر ده

عارف هتاحكموني على كلامي ده بس المصيبه بقت واقع ولازم نقول الحقيقه لنفسنا علشان ميبقاش بلدنا بعد كام سنه اكبر نسب للإغتصاب والدعاره عندنا
نفسي لما اخلف بنت تنزل تروح مدرستها وانا مطمن
بصراحه نفسي

كاميليا الف مبروك يا عروسه

2008-10-16T09:08:00.004+02:00

النهارده فرحي يا جدعااااااااااااان

بس الحقيقه بقى انه فرح كاميليا يا جدعان وانا فرحان جدا والكل فرحان الف مبروك يا كامي ربنا يوفقك ويسعدكم ياااااارب
انتي اختنا كلنا وكلنا فرحانين بيكي ومع اننا مش قادرين نسافرلك لكن كلنا قلوبنا عندك طبعا بتباركلك وتغنيلك وتقولك
طالعه من بيت ابوها داخله بيت الجيران
واخده من الشمس طرحه ومن القمر فستان

وبرده عايز اقولها كام نصيحه كده
خدي بالك من نفسك ومن جوزك وان غلبك بالمال اغلبيه بالعيال
وقصصي طيرك ليروح لغيرك
وخلي بالك ان تحت الساهي ايه .....

يعني خدي بالك من جوزك يا بنت والف الف مبروك وانا جاي اهدي النفوس بس

ويحضرني اغنيه عظيمه بتقول

يا عشاق النبي صلوا على جماله دي عروسة البيه تعالوا بنا نسندهاله
وادي نور جمالها اهو هل هلاله يا هنيا للي ينولها يا هنياله
مين شاف كده بني ادمين
راح تطلعي وحشه لمين
ده الأب عريض وسمين
والأم لون الياسمين
يا سلام يا حتة سكره
يا ترياق ياللي معطره
يا عريسها يا زين ما انتقيت

يا عشاق النبي صلو على جماله
عليه الصلاة والسلام

الف مبروك يا كامي ربنا يتمملك بخير ويسعد ايامكم ويحفظكم ويجمع بينكم في خير

عقبااااااااااااااااااااالي يارب

كان نفسي

2008-10-14T09:06:00.001+02:00

كان نفسي

كل واحد فينا عنده حلم بيحلمه
كل واحد نفسه يبقى حاجه فوق
كل واحد نفسه ايده تكون جناح وترفعه
كل واحد نفسه برضه يطير لفوق
وانا برده زيي زيكم
كان نفسي اطير
كان نفسي اعلى للسما
وجناحي يخبط في السحاب
لكن علشان برده انا
كده زيكم
عيل عبيط
مشافتش عيني السور هناك
مشافتش قيد بيشدني
حسيت للحظه بأني عاجز عن الكلام

وفقدت بهجة كل شيء
لكن هاقول شكرا يارب
على نعمتك
انت اللي عالم بالطريق فيه بكره ايه
انا بحمدك واستنجدك
الحمد لك والشكر لك
=====================================

انا طبعا بقول الحمد لله على كل شيء لكن غصب عني بقول خساره
سامحوني يومين كده افوق من الزعل وبعدين ارجع زي الفل انشاء الله

تاج بس جاااامد

2008-10-08T09:02:00.002+02:00

التاج ده جاني من احمد الغردقاوي عارفينه طبعا بس هو حب يدبسني في التاج وانا قعدت افلفص منه لكن على مين الواد صعيدي ودماغه ناشفه قوي المهم يعني مطولش عليكم علشان خاطر هو حبيبي بس ومهددني يقطع رقبتي لو مش جاوبت انا هانزل التاج اهو يا ابو حميد خلي المطاريد ترجع الجبل بقى وبلاش عنف الله يهديك

بدأت تدون من إمتى ؟ ودخلت العالم ده إزاي ؟
ياااااه رجعتوني لأيام زمان يا ولاد بدأت التدوين من اكتر من سنه اهو في الأول طبعا مكنتش فاهم حاجه وفتحت المدونه وبعدين سبتها كتير بس البدايه الحقيقيه لما شفت الصفحه بتاعة كيف تنشا مدونه ومنها ابتديت انطلق واصلا اللي طلع الفكره في دماغي لما شفتهم مستضيفين في برنامج سخيف كده على دريم ناس مدونين وكانت اول مره يقولوا حاجه عدله فقلت اعرف ايه التدوين ده بقى

أيه كان إنطباعك في البدايه ؟
مبهور جدا طبعا وكنت مش عارف اعمل ايه علشان اقدم نفسي للناس دي واتعرف بيهم وياترى رد فعلهم ايه وهل فعلا حد ممكن يعبرني ويجي عندي وبقيت مبهور اكتر بصداقتهم ومعرفتهم ببعض واللي بهرني قوي بقى هو عددهم الكبير واللي كل يوم بيكبر اكتر واكتر ماشاء الله

من أكثر شخص بتهتم بتعليقه على بوستك الجديد ؟
كل الناس بحب تعليقهم وبعدين مش مهم مين اللي يعلق المهم بيعلق يقول ايه كل واحد بيجي يعلق ويقول رأي مفيد بيهمني جدا اما اللي يهمني انهم يقرؤا البويت فدي حاجه تختلف ومش هاقولكم مين علشان انتم هتبلغوا عني

ما هي أهم شيئ تعلمته من عالم التدوين ؟
ان البلد دي لسه فيها عقول كتييييييير قوي نضيفه وصاحيه وعندها استعداد تعمل كتير واني ممكن لو دورت كويس في بلدنا الاقي اصحاب كتير ممتازين افخر بمعرفتي بيهم يعني مش كل الناس محششين ولا حاجه ولا كل الشباب بتريل في الشارع على بناطيل البنات المفتريات الله يهدهم

ما هو أكثر شيئ كرهته في عالم التدوين ؟
الناس اللي بتشتم ده حتى المثليين في الأول قلت اسيبهم في حالهم يغرقوا بعيد عني مش مشكله وبعدين لقيت ان الموضوع بقى شتايم وقلة ادب وتطاول على كل شيء حتى الدين وبكره قوي الناس الجبانه اللي بتشتم بأسماء ناس غيرهم او سعات اسماء مجهوله

هل تشعر أن التدوين له تأثير؟
اه طبعا له تأثير مادام الناس سمعت عننا ومادام الحكومه بعتت رجالتها في الصحافه المهببه يشتمونا ويفهوا الناس اننا ولاد تييييت وبنحاول نزعزع حلوه نزعزع دي – استقرار البلد يبقى احنا اكيد ابتدينا نعمل صوت ويبقى لينا اثر جميل

تهدي التاج ده لمين ؟
مش عارف اهديه لمين بصراحه مش عايز ادبس حد لكن كل اللي يحب التاج ويحس انه هيقول فيه كلمتين مزنوقين في زوره ياخده مني هديه ويبقى يقولي

وسلام بقى يا جرعان بحبكم كلكم ومبسوط قوي اني دخلت التدوين وسط الناس دي القدام منكم اتعلمت منهم وحبوني وحبتهم والناس الجديده بتيجي تتعرف عليا ويقولولي كلام حلو قوي بصراحه بحس اني هنا في جنتي الصغيره الكل بيحبني الحمد لله وانا بحب كل الناس بجد بجد بقى عندي مليون اخ ومليون اخت
كل سنه وانتم طيبين

انا عايز من ده

2008-09-17T22:34:00.004+02:00

انا عايز من ده

"وجعلناكم شعوبا وقبائل لتعارفوا ان اكرمكم عند الله اتقاكم "
اللهم لك الحمد على نعمك التي لا تعد ولا تحصى
فكرت كثيرا في نعمة اصدقائي حولي وبالذات المدونين الذين تعرفت عليهم خلال هذه الفتره التي قضيتها في التدوين ووجدت في كل منهم صفة او صفات احببتها فيهم وتمنيت ان اقتبسها واتعلمها منهم ومن جاور السعيد يسعد فتمنيت الأتي
احمد سووو خفة دمك وجدعنتك والكاريزما التي تتمتع بها
نوران بنت خيخه شجاعتك وصدقك مع نفسك قبل الناس
هبه دوبه حكمتها ونصائحها الغاليه
كاميليا شفافيتها ورومانسيتها
آبي اشراقتها وحبها للحياه ولماضتها
شيماء الجيزى الحيويه الرهيبه التي تملكها
احمد الصباغ لباقته المذهله وقدرته على التنظيم
ابو خالد ابوته الفياضه ونور قلبه اعزه الله
خالد همس الأحباب طيبته وعشريته وجدعنته
نيجرو دخوله القلوب بلا استئذان واخلاقه الجميله وخفة دمه الرائعه
رندا كرمها الحاتمي وطيبتها
لي لي خفة دمها واسلوبها الساحر وشياكتها الجميله
ابن حجر العسقلاني اخلاقه وفنه الجميل
مريم من اسكندريه جدعنتها وتدينها وجرئتها
شاهي امومتها برغم طفولتها والطيبه اللي بتشر منها بصوره تجنن ربنا يحفظها
جاد صراحتها المجنونه
فرنسا هانم جرائتها وعقلها الكبير وقلبها الطيب الصافي
دعاء مواجهات رومانسيه خارقه وايمان ينبض
احمد غردقه رجل بمعنى كلمة رجل كريم وعزيز وشهم ونعم الأخ
سمر الشافعي رقتها وطيبتها
ليساندرا ذكائها الأدبي وروعة فكرها
كنت هنسى قوس قزح سعيها للخير دايما ورسوماتها الجميله
لسه ناس كتير عايز اقول عنهم ومش عايز انسى حد علشان ميزعلش مني لكن انتم كلكم عارفين اني بحبكم كلكم وانا اخترت عينه من الناس اللي بحبهم جدا ولسه في ناس كتير عايز اقولها لكن انا بقى قررت اسيبكم تكملوا انتم كل واحد يقول مين شايف فيه صفه بيحبها ونفسه يتعلمها منه وتبقى فيه
لما فكرت لقيت اننا بنكمل بعض بصداقتنا بنكمل بعض

اما بعيد عن المدونات فأنا لي اصدقاء في حياتي يكملوني واكملهم فطرت معاهم امبارح في البيت وحسيت انهم جزء مني

ده اللي بشوفه فيكم كلكم يا اصحابي اما عن نصفي الأخر وحلم حياتي فكعادتي كلما اردت ان اصف لها شيء يعجبني فيها توقفت الكلمات وعجزت عن النطق واكتفيت بأن ابتسم وادعي لها ان يبارك الله فيها ويحفظها لي

كل سنه وانتم جميعا بخير اغتنموا عشر المغفره وادعوا لي

سلام اخوكم ايهاب

ان تحبه وتخشاه

2008-09-10T11:37:00.000+02:00

ان تحبه وتخشاه
كلما فكرت مع نفسي ايهم ابدا به ان احبه اولا ام اخشاه
ففكرت ان اتأمل نعمه علي وفضله واتأمل وعيده للمذنبين والعاصين واقارن ايهم يطغى على ذهني ويدعوني الى الألتزام اكثر
فبدأت بوعيده وتهديده للعاصين
اللهم تب علينا واغفر لنا وارحمنا
وجدت اني كلما سمعت من امام في خطبه عن عذاب واهوال يوم القيامه ارتعب من فكرة طول المده وهول الألم فأنت لا تفكر فقط في ذلك ولكن فكر ايضا في ان ينظر الله اليك بعين الغضب اللهم استر علينا ونجنا لقد سمعت ان من الناس من سيتساقط لحم وجوههم من عتاب ربهم لهم على ذنوبهم فما بالي بمن يغضب الله عليه ولوهله شعرت بالخوف والرعب ماذا لو سقطنا ماذا لو كانت ذنوبنا ستحرمنا من ان نكون ممن يظلهم الله في ظله يوم لا ظل الا ظله تخيل كل هذا ولم نرى لا الجنه ولا النار بعد ز
ولكن قبل ان اقرر ان يكون دافعي الأول هو خوفي منه
فكرت ان انظر ايضا الى رحمته وسعة مغفرته ومنحه التي لا تعد ولا تحصى علينا
وتذكرت ما سمعت عن فرحة الله بعبده التائب وتذكرت ان الله يغفر الذنوب جميعا
وانها يظل يغفر الذنب ونعود اليه ثم نتوب فيغفره ثانية ونعود الى الذنب ثم نتوب فيغفره ثالثة ويظل كذلك نعود ونتوب ويغفر لا يحرمنا باب التوبة ابدا حتى تطلع الشمس من مغربها او تخرج ارواحنا
سمعت عن مغفرته فذهلت منها
وسمعت عن تقبله لعباده ورحمته بهم سمعت عن الأعرابي الذي قال لرسول الله لأن سالني عن ذنوبي لأسألنه عن رحمته وغفرته لا اذكر تفاصيل الحديث ولكني عندما سمعت رد الله عليه " لا نعاتبه ولا يعاتبنا " تخيل ان يكون الله رحيما به ويقبل كلام الرجل
نظرت حولي عل نعمته علي فوجدت نعما كثيره جدا لا اشعر بها لمجرد انها موجوده بكثره واني ولدت وجدتها
كلما بحثت اكثر في حبه لعباده وجدت اني احبه اكثر
ووجدت اني احق بالتوبة اليه واستغفاره حبا فيه قبل ان يكون خوفا من عذابه ولكني لا ازال اخاف عذابه فلو اني لم اتب فماذا يكون حالي
لذلك قررت انشاء ا لله ان يكو حالي معه
ان احبه واخشاه
ولتبقى دائما محبتي له قبل خوفي
فلقد قال ان رحمته سبقت غضبه
اللهم لك الحمد على نعمة الأسلام وكفى بها نعمه
كل سنه وانتم جميعا بخير والى الله اقرب وعلى طاعته ادوم

رمضان كريم ---- الله اكرم

2008-08-30T13:54:00.002+02:00

رمضان كريم
الله اكرم
جمله نقولها لبعض في رمضان ولكن اريد منكم التوقف عندها للحظات
فهي تذكره من كل منا للأخر بأن هذا شهر الخير فيه كثير وكرمه فائض فيكون الرد عليها ان الله اكرم يعني كل هذا الكرم هو من الله اصلا وانه لا يقتصر على رمضان فالله واجد في كل مكان وزمان وليس في شهر واحد من السنه ولكنه يمنحنا في رمضان ما لا ندرك عظمه
لذلك ادعو الله ان اقدر انا وكل منكم احبائي واخواني ان نستفيد من هذا الشهر الجميل
شهر ملئه الله بمغفره ورحمه وعتق من النار
لقد امتلأت جعبتي بسيئات واخطاء وزلات كل جوارحي ملت من كثرة ذنوبها اصابني الهم والغم والأكتئاب كثيرا وادعيت اني لا اعلم السبب ولكني اعلم انها ذنوبي تثقل على روحي وانفاثي تخنقني لكنني اعاهد نفسي امام الله ان اسقط كل تلك الحمول عن ظهري في رمضان واطمع في رحمة ربي الواسعه واطمع في رحمته ومغفرته وكرمه وحبه الجميل لعباده اللهم اجعلني من عبادك المخلصين

ادعوا لي جميعا ان اخرج من رمضان هذا وقد سقطت عني كل سيئاتي واستبدلتها بحسنات
واعملوا جميعا على ذلك فرصه جميله وكرم من ربنا انه امهلنا الى رمضان
اللهم اغفر لي ولوالدي وللمؤمنين
يارب اغفر لي يارب اغفرلي
ولكن لأني اعلم ان شروط التوبه ثلاث او اربع
ثلاث اذا كان الذنب مع الله بينك وبينه
اقلع عنه
اندم عليه
استغفر الله
اما اذا كان الذنب متعلق بحق شخص ما
عليك ان تعيد الحق لصاحبه لتكتمل توبتك
لذلك اطلب منكم جميعا من كان يعتب علي في اي شيء ان يسامحني ويدعو الله لي بالمغفره
ارجوكم الى كل من خدعته او اذيته او ضايقته او كذبت عليه او اي فعل صدر مني ان تسامحوني

اما عني فأنا اسامحكم جميعا ولا اجد في نفسي اي غضب او ضيق من اي شخص والحمد لله
كل سنه وانتم جميعا بخير
رمضان كريم ______ الله اكرم

يافطة نانسي

2008-08-09T10:38:00.004+03:00

تحديث
انا لما الولد نيجرو حبيب قلبي فكرني اننا المفروض نشيل نانسي علشان رمضان قلت اشيلها واحط التعليق ده علشان عجبني قوي
من الولد كنج تووت

الناس بتمشي في الحياة بتزُك

تسند على الصورة حتى لو بتشُك

مع إن لينا دليل هو السند و الخير

بس إحنا ناس غاويين نعُك

و عجبي

KING TOOOT

على طريق المحور بعد خروج العاملين عندنا في الشركه من شغلهم البعض منهم ساكن في قريه قريبه من المصنع وبينزلوا من فوق المحور عندها لكن لأن المحور طويل جدا وشبه بعضه ابتكروا طريقه علشان يعرفوا بيها مكان نزولهم وهي ايه بقى

يافطة نانسي

اعلان كبير عن داماس بتاع الجواهر ده ونانسي واقفه زي تمثال الحريه تشاور لهم على طريقهم

المهم يعني فجأه وبدون مقدمات اعلان نانسي اتشال الناس بقت هتجنن يعرفوا مكان نزولهم ازاي دلوقتي

وخصوصا لو مروحين بالليل والطريق كحل مش باين له اي معالم

الموضوع اخد كام يوم والناس هتتجنن وكذا مره يغلطوا في مكان نزولهم ومش عارفين يعملوا ايه

بس بعد كام يوم رجعت يافطة نانسي تاني والحمد لله صحيح بشكل تاني لكن برده هي نانسي محدش هيتوه عنها طبعا

فكروني بحال ناس كتير في بلدنا كل واحد ماشي في طريق الدنيا طريق سريع جدا لكن طويل والسكه بقت شبه بعضها كل حاجه زي بعضها الصح شبه الغلط ومفيش حد يدلك على الطريق ومحتاج دايما علامه تنور طريقك فبتلجأ لأي دليل قدامك انشالله نانسي

يافطه لواحده عريانه وبتدلع عادي احنا كمان هنمشي وراها كل واحد فينا حاسس ان طريقه طويل قرر ياخد دليله حد من اللي بيلمعوا دول حرامي كبير سياسي نصاب رقاصه مشهوره او ممثله او مغنيه كلهم بيرقصوا دلوقتي

كله نسي ان القدوه والديل الصح مش عند دول

عند رسولنا الكريم (ص) وفي سنته وكتاب ربنا

الدنيا فعلا بقت شبه المحور كلها مطبات وبلاوي والحكومه حتى لما تقولك هنصلحها ضيقت الدنيا على الناس كتيييير قوي ولما اتفتح في الأخر طلع نص محور اقتطعوا نص الطريق علشان يحطوا فيه عربيات الرادار

هي دي مصر يا عباس

سلااام

في الغردقه شفت كتيييييييييييير

2008-07-19T23:18:00.004+03:00

اهداء الى احمد صديقي من الغردقه

عايش عمرك كله بتسمع
ناس بتقولك اوعى تصاحب
وان الصاحب حاجه صعيبه
وانك تلقى في وسط الغابه
ناس فيها طيبه
ناس جواها صداقه وحب
ناس رجاله بجد الجد
ناس من غير ما تفكر تطلب
هم يقابلوك زي اخواتك
يوم تقابلهم تلقى عنيهم
فيها رجوله وحب وطيبه
خير جواهم مالي قلوبهم
من غير ما المصلحه بيك تربطهم
هم كفايه عليهم انك
تبقى صاحبهم من حبايبهم
حتى سلامهم لما تشوفهم
اول مره تشوفك عينهم
احلى سلام في الدنيا تشوفه
زي ما اكون واقف في الغابه
وفجأه الاقي ايد يتاخدني
وبتحضني
سابلي النمره قال كلمني
لما طلبته راح مقابلني
شاب لقيته
راجل حق
جوه عيونه طيبه وحب
وفي اخلاقه زي الأب
اخ كبير واقف مستني
لما اقابله ياخد بأيدي
شافني وشفته
فرحت بطيبته
راجل نادر اني اقابله
ياما كان نفسي
انه يكون عايش في بلدنا
بينا وبينه مسافه طويله
الغردقه مشوارها يا احمد
صعب علينا
ساب مصلحته
وقلق راحته
وقابلني وكأني انا ضيفه
انا مش هاقدر اقولك حاجه
غير كلمه قالهالي ابويا
انك لما تقابل راجل
فعلا راجل
هو ده كنزك اللي لقيته

احمد من الغردقه وهو احد المدونين الجمال جدا اصله صعيدي شخصيه جدعه جدا اول لما عرف اني مسافر الغردقه سابلي رقمه وقابلني هناك وقام معايا بأجمل واجب وكأني ضيف عليه في بيته مش معدي بالصدفه من بلده وبجد بجد عرفت ان معرفة الرجال كنوز
حقيقي يا احمد انا بشكرك على موقفك الكريم معايا انا وزمايلي
انشاء الله هاحكي عن رحلة الغردقه بس حبيت ابتدي بالشخصيه الجميله دي

جزاك الله خير يا احمد

الى الغردقه

2008-07-05T15:57:00.004+03:00

نبأ هااااااااااااااااااام

رحلة شرم والغردقه في بيوت الشباب احجز الأن

شرم الشيخ 70 جنيه بالأضافه الى 20 قيمة اشتراكك في بيت الشباب

الغردقه 60جنيه بالأضافه الى 20 قيمة اشتراكك في بيت الشباب

الرحله اربعة ايام وثلاث ليالي

مواعيد رحلة الغردقه

13 - 7

15 - 7

29-7

مواعيد رحلة شرم الشيخ تقريبا مقاربه ليها بس مش فاكرها

روحوا بنفسكم بقى الحقوا قبل الحجز ما يخلص

طبعا كلكم عارفين ان بلدنا فيها حاجات جميله كتيييييييييير قوي بس كالعاده مش للناس اللي زينا العاديين او حتى لو هي لينا بتتحول كده بقدرة قادر لغيرنا وتختفي عننا زي مثلا الرحله دي اللي بقول عليها فرصه جميله تروح اماكن تجنن وباسعار تعتبر ملاليم بالنسبه لأسعارها تبع اي شركة سياحه لكن الغريب ان مفيش ناس كتير تعرف عنها حاجه بيوت الشباب نفسها مبتروجش للموضوع كأنه حاجه عيب انها تتعرف عنهم لكن انا عايز كل اللي ليه مزاج يصيف في مكان شيك ولذيذ وميدفعش كتير لازم يدور على الفرص دي ويلحقها قبل ما تتهف وتضيع مننا زي كل حاجه ما هي ضايعه

الغردقه شباب وبنات

شرم الشيخ للشباب فقط البنات يمتنعون

مش علشان حاجه معينه بس هو نظام البيوت كده نظرا لعدم توافر قسم سكني للبنات في شرم بعكس الغردقه ليهم جناح مخصوص ليهم

والحاضر يعلم الغايب والغايب يسال الحاضر

انا عن نفسي حجزت في رحلة 15 - 7 اشوفكم على خير انشاء الله

اه كنت هنسى العنوان

1 ش الأبراهيمي جاردن سيتي بجوار سفارة كندا وسفارة السودان

ت 0227940527

ترى اين ذهبت

2008-06-28T16:43:00.003+03:00

جلس يتذكر في هدوء ذكريات الطفوله
العيد الكبير
بهجة لكل طفل في سنه ولكنه ليس اي عيد انه العيد الكبير وابيه يصر على ان يتبع السنه ويذبح في مدخل مسكنهم ويوزعوا اللحم على جيرانهم كي يعتادوا السنه
ولكنه مجبر على ان يذهب اليها
بيتها بعيد جدا وعليه ان يمشي مسافه طويل اخذ يصبر نفسه بالثواب الذي سيأخذه كما اخبرته امه وان الله سيجازيه خير جزاء وقد حدث .
لكنهم هذه المره اعطوه حقيبه كبيره بها بعض الأشياء غير اللحم
ربما كانت الفروه هو لا يعلم ولا يريد ان يعلم كل ما يريده ان ينتهي الأمر ويرجع ليلعب مع الأطفال في سنه

الصيف حار جدا والشمس تقتله والحمل على كتفه يحاول تعديله من كتف لأخر الحقيبه البلاستيكيه تنزلق من يده بفعل العرق والثقل الرهيب بدأ يشعر بالتعب والخوف من الا يستطيع الوصول الى منزلها كانت تسكن في مكان غريب فلا توجد محلات او ناس في الطريق
كان مسرورا ان الوقت صباحا لأن هذا المكان في الليل لابد انه مرعب جدا بعض الكلاب تحوم حوله هو يكره الكلاب كثيرا ويخافها كالموت حاول ان يجري بسرعه قبل ان تقترب لكن الحمل الثقيل يجبره على السير البطيء كان خائفا جدا اخذ يقرأ سورة الفيل الشيخ في المسجد اخبره انها ستبعد عنه الكلاب اذا اخافته وقد نجحت لم تقترب منه الكلاب واصل السير لقد مرت اكثر من نصف ساعه وهو لازال يمشي كان يشعر بضيق شديد ولكنه لم يقدر ان يقول لا ان ابيه شديد جدا معه وقد يضربه بشده اذا اعترض او ابدى حتى عدم موافقته
انتبه الى انه اقترب من الشارع طرق الباب فتحت له لم يكن احدا من ابنائها موجود ادخلته وسلمت عليه واعطاها الكيس شكرته كثيرا كانت فقيره جدا والبيت يدل على حالتها الماديه الصعبه
لم يكن قادر على الرد اخذت تسأله عن حاله ولا يجيب وفجأه انفجر باكيا لم يكن يعرف لما يبكي بالظبط لقد وصل واتم مهمته ولكنه كان قد شبع خوفا وتعبا طوال الطريق
احتضنته واحضرت له في سرعه زجاجة مياه غازيه وكانت بارده جدا ولذيذه شربها في سرعه واعلن عن اضطراره للرحيل حتى لا يقيلق ابوه عليه سألته لما كمان يبكي فلم يجبها واطرق بوجهه
لم تعاود السؤال فقط طبطبت عليه وودعته
اخذ طوال الطريق يفكر انه عندما سيكبر سيعاملها احسن معامله لأنها فعلت معه ذلك
وعندما عاد انبه والديه على التأخير وانه مؤكد كان يلعب في الطريق لم يستطع ان يرد واطرق ساكتا
ودارت الأيام وكبر ولكنه لم يستطع ان يوفي بنذره تجاهها هل تعلمون السبب
لقد اضطرت للهرب من العائله كلها فقد قررت العائله انها بعد موت زوجها اما ان تنتظر الموت او ان تتزوج اخيه حتى لا تضيع ورث الأرض من زوجها على الغرباء
لقد تركت كل شيء وهربت وهو الأن لا يملك لها الا الدعاء بأن يوفقها الله لما فيه الخير لها

جائني تعليقات كثيره اني بعلق عند البنات بس
علشان الناس تستريح انا هاخد اجازه من التدوين والتعليق وكل حاجه لفتره كده استجمع افاكاري واركز شويه
ادعولي سعدت جدا بكل الناس اللي عرفتهم مش هاغيب انشاء الله لكن الله اعلم هاغيب قد ايه

اخوكم ايهاب

تحديث انا رجعت تاني يا رجاله يظهر مبقدرش اعيش بعيد عن الناس اللي بحبهم قوي هنا

متشكر لكل اللي سأل عني وبحبكم كلكم

تجربه

2008-06-10T11:17:00.002+03:00

كل واحد فينا لما بيحب يعمل مصيبه جديده او ذنب جديد في حياته يقولك على حجه جميله قوي
اصلي عايز اجرب
يا جدعان اجرب دي لما تبقى فكره حلوه وعايز اجرب هتمشي معايا ولا لأ رياضه هوايه مثلا
انما تعالى اتفرج
داخل ديسكو ليه
عايز اجرب ادخل جو الديسكوهات ده وارقص واتفرج
طيب طلبت خمره ليه وانت هناك
اصلي الجو عجبني ولقيتهم كلهم بيشربوا قلت اجرب
طيب مين البنت اللي بترقص معاها دي انت مش بتقول مرتبط
ايوه دي حاجه تانيه بنت فزيعه دمها شربات وروشه كده ومش مكلكعه
قصدك مش محترمه
لا يا جدع دي بنت ناس خالص ورقصنا للصبح وباستني قبل ما امشي وقالتلي دمك سكر
طيب وبعدين
روحت معاها ليه على شقتها وايه اللي هببته ده معاها
كنت عايز اجرب بصراحه اني اعمل كده واروش ومقدرتش احوش نفسي

واحد تاني بقى
رحت فين مع اصحابك
دخلنا القهوه كنت عايز اجرب قعدة القهوه
وبعدين
شربت شيشه او سجاير- حسب اصحابه- كنت عايز اجرب برده شكل الدخان لذيذ قوي
وبعدين
كنت عايز اجرب الحشيش اللي معاهم فجربته برده
وبعدين
ولا قبلين بقالي فتره كده مش قادر استغنى عن المخدرات خالص

واحد حلو بقى غير ده وده
اصحابي فكروا في فكره مجنونه
فقلت اجرب معاهم
فكرة ايه دي
نسرق عربيه ابو واحد فيهم
وبعدين
ولا قبلين طلعت مش بتاعة ابو صاحبهم وانا اتحبست فيها تلات سنين

تحبوا اكمل بقيت التجارب اللي الناس بتعملها من باب التجربه يعني وحاجه جديده

المصيبه ان كل واحد يجرب ذنب معين ولو معجبهوش يقول اصلي استحرمت وتبت عنه مع انه يمكن تاب غصب عنه علشان مش قادر عليه وعلى مصاريفه مثلا
اما لو قدر عليه او عجبه الذنب بقى يرجع يقولك مش قادر ابطل هاعمل ايه يعني اتعودت عليه خلاص مش بأيدي صدقوني اتعودت اخونك اتعودت اشرب مخدرات اتعودت اسرق اتعودت اكدب اتعودت حاجات كتير مش قادر ابطلها وكل ما احب اذود ذنب جديد

اروح اقول بجرب

بس مش على طول صدقوني

ولو عجبني اقول غصب عني اتعودت عليه يا ناس حد يساعدني

ملحوظه تخينه
انا مش بعمل الحاجات دي الحمد لله انا مش متعود ولا حاجه
اروح بقى اجرب حاجه جديده علشان اتعود عليها
سلاااااااااااااااااااااام

عشر اسئله

2008-05-31T12:52:00.003+03:00

عشر اسئله عايز اسئلهم ونجاوب عليهم سوا
انا هاقول رايي وعايز كل الناس تقولي رايها في الأستفتا ده

1 لو في جواك حب قديم او على الأقل ذكرى لحب قديم تعمل ايه؟
2 لو كان الحب ده سايب جواك ذكرى جامده وجرح معلم قوي في قلبك
3 لو الجرح ده باين في عينك الحزن منه وماليك قوي تمحيه ازاي من عينك وتخفيه عن الناس
4 هل انت لو كملت حياتك مع حد جديد وحب تاني وارتبطت واتجوزت تبقى بتظلم الشخص اللي هترتبط بيه
وايه هو نوع الظلم انك خبيت عنه ولا انك تكون لسه محتفظ جواك بالحب القديم ولا انك بس تكون لسه مجروح من الذكرى اللي معلمه جواك
5 هل الحب الجديد بعد الجواز يقدر ينسيك اللي فات وحبك القديم
6 هل من حق حبيبك الجديد انه يعرف بماضيك وحكايتك مع الحب القديم وايه هي الحدود اللي المفروض يعرف عنها وايه اللي ميخصهوش ؟
7 هل لو صارحته باللي كان,هل هتقدر تصارحه ان لسه جواك مشاعر او حتى ذكرى مش قادر تمحيها؟
8 لو قابلت الحبيب القديم صدفه هتتصرف ازاي هتكلمه ولا هتتجاهله ولا هتبصله وتمشي وهتعرف حبيبك بالموقف ده ولا لأ
9 هل من حقك تحتفظ بمشاعر حب جواك لحبيبك القديم بعد الجواز من حد تاني
10 هل انت راضي عن قرارك بالمواصله في حياتك ونسيان الماضي وانك تكمل مع شريك حياه جديد وهتنسى الماضي وهتبني اسره جديده وحياه احلى ولا انت بس بتخدع نفسك وياترى كده بتظلم الشخص اللي هتختاره يكمل معاك؟؟؟؟؟
******************************************************************************

بصوا انا هابتدي اجاوب من وجهة نظر رجالي طبعا عايز اعرف ردودكم وياريت متطنوشونيش
اولا لو جوايا حب قديم او ذكرى حب قديم هافضل غصب عني فاكرهم طول الوقت حتى لما انساهم اي ذكرى بسيطه هتفكرني بيهم لأني مادمت حبيت حد يبقى خلاص ده معلم جوه قلبي وليه مكان صغنن لسه اسمه مكتوب فيه الا اذا كانت نهاية القصه بخيانه او غدر بالتالي مكانه ده هيتمسح والذكرى هتبقى مجرد احتقار بس مش اكتر

لو سايب جوايا جرح قديم قوي ومعلم فيا قوي يبقى بمنتهى الأنانيه هادور على حب جديد يعوضني عنه اما لو كان هو اللي غدر فعلا وانا متأكد من ده يبقى من غير انانيه ولا حاجه من حقي اكون حياه جديده ومش من حق حد يتهمني بالأنانيه

اخبي حزني عن الناس ازاي دي بسيطه قوي اندمج مع الناس اهتم بيهم اكتر ما اني اهتم بمشكلتي
افكر في مشاكلهم وماربطهاش بحالتي مفضلش اقيس كل قصه على قصتي انسى اللي حصل وامسح من عيني الحزن بأني ارسم ضحكه وبسمه على شفايف حبي الجديد وهي اكيد هتنسيني الدنيا وما فيها

الحاله الوحيده اللي اظلمه فيها اني اكون لسه بحب الشخص القديم ومخبي عنه الموضوع
لأني هافضل طول الوقت مش معاه وقلبي متعلق بحد تاني يعني بخونه من الأخر وماتدهوش فرصه يختار اذا كان يوافق يقبلني كده ولا لأ
واظن مفيش حد يقبل يتجوز حد لسه مرتبط بحد غيره وبيحبه وشايل ذكراه وحبه جوه قلبه
اه يقدر طبعا مادمت انا مستعد لده لكن لو انا مصر اني مش انسى يبقى مهما عمل هيفضل ينفخ في قربه مقطوعه يعني القرار قراري اني اسيبه ينسيني ولا اني افضل فاكر واضيع حبه في الهوا

من حقه يعرف اني ارتبط بحد قبل منه وده بيبقى في مصلحتي علشان لو يوم عرف من حد غيري ميبقاش انا خبيت عنه وساعتها هيشك فيا وفي نفس الوقت هيقدر ظروفي وحياتي اما حدود المعرفه ايه يكفيه يعرف ان نوع العلاقه كانت ايه ومدى القرب بينا كان قد ايه انما التفاصيل الصغيره مالهوش فيها مش بس علشان الحريه وكده لكن كمان علشان متتعبهوش وتخليه حاسس ان حد غيره امتلكني قبل منه او اني ممكن اقارن بينه وبين التاني مثلا في العلاقه وكده فبلاش التفاصيل الدقيقه يكفيه الخطوط العريضه
اصلا لو كان جوايا لسه مشاعر للتاني القديم يبقى مش من حقي احب حد تاني واظلمه معايا انما لو ذكريات غصب عني يبقى المفروض اني اصارحه لكن الواقع واللي انا شايفه اني مقولهوش مادمت ناوي انساه يبقى مع الوقت ومع حبي الجديد ولما علاقتي بالحب الجديد تبقى اقوى تلقائيا هلاقي القديم والذكريات دي كلها حاجات وقصص اسطوريه نسيتها من زمن وباتسلى بيها من وقت للتاني بدون ما اخون حبيب ولا اجرحه ويمكن نتريق عليها سوا كمان

لو قابلته مش انا اللي هاخد الخطوه هاسيبه هو يختار عايز يسلم ولا لأ لأني معرفش ظروفه تسمح بأيه ومش بحب اسبب لحد موقف محرج خاصة لو كانت اتجوزت يعني لكن لو هي قررت تيجي تسلم عليا اول حاجه هاعملها هاحاول اعرفها على مراتي وافكر مراتي بيها ولأن حبيبتي ذكيه اكيد هتفهم انا عايز اوصل ايه هتفهم اني بفهم التانيه ان حياتي مستمره مع حد تاني والسكه هنا مقفوله اتوكلي بعيد بقى
يعني هاعرف حبيبتي بالموقف حتى لو كانت مش موجوده وقتها لازم تعرفه لأن نفس الفكره اني مش بحب حاجه هي تعرفها بعدين من غيري واكون وقتها في موقف اللي بيخبي علشان غلطان اكيد

مش من حقي احب حد وافضل احب القديم برده واصلا مادمت لسه بحب القديمه يبقى انا محبتش مراتي الجديده ولا حاجه انا واخدها زوجه شكليا وخلاص مجرد قضاء للوقت ويبقى ساعتها جواز فاشل بلا طعم

انا موافق تماما على فكرة ان الدنيا مبتقفش على حد يعني مش معنى ان قصه انتهت يبقى خلاص اقفل كتاب حياتي واقتل نفسي او اتجوز بدون حب واقضيها نكد طول عمري لأن لو القصه انتهت يبقى اكيد مكانش فيه ليها تكمله انا وهي فشلنا نكمل واكيد اقتنعنا بالحل ده يبقى نستاهل نسيب بعض ومادام كده يبقى من حق كل واحد فينا يبني حياه جديده

الدنيا على الحال ده طول عمرها واللي بيخالف ده بيتعب نفسه واللي حواليه وخلاص
وانا مش هاظلم حبيبتي علشان حبيت قبلها اللي قبلها هي مش مسؤله عنه ولا يعنيها في شيء اللي يخصها وابقى بظلمها فعلا لو بخونه وانا معاها انما القديم ميخصش حد غيري

وفي الأخر احب اوضح نقطه الحب مفهوم كبير قوي وعظيم قوي بس مش معناه اسطوري زي ما احنا بنتخيل ويا اما نهايه سعيده جدا يا اما ماساه لا الحب ممكن يتكون ويجي بطرق كتير قوي وصدقوني بيكون برده جميل قوي

لكنه زي انواع الأكل في اطباق كتير شهيه لكن لكل منها مذاق مختلف وكل واحد فينا بيفضل نكهه معينه لا يقدمها الا طبق معين

وبالتالي ميقدرش يختار غير الطبق ده بس مش معنى كده ان اللي عمل الطبق ده مش هيطبخ غيره زيه يبقى مادام طبق وقع مني اروح اخد غيره الدنيا فيها اكل كتير مش لازم نقعد نعيط جنب اللي اندلق بقى
اللي راح راح وخلصنا قوم اطلب طبق جيد احلى واطعم وانضف من اللي على الأرض متمدش ايدك في الطبق المدلوق صدقني هتلاقي الطبق اتكسر وايدك هتنجرح منه وخلاص
اتمنى اعرف رأيكم في اللي قلته

تحديث :

كاميليا اضافت سؤال للبوست عايزكم تردوا عليه برده

اذا كنت من اصحاب قلم، تكتب، تعيش لحظات تكتب فيها بمشاعرك، قد تكون مشاعر حب للحب ذاته، هل هذا مسموح؟؟؟؟ أم عليك ان تنتظر حتى يمتلئ قلبك بحب من ارتبطت به كزوج، ثم تعود لتكتب؟؟؟؟

لازم اكتب طبعا لازم افضل اكتب لأني اكيد من كتابتي هعرف اقيس مدى زوال السم من جسمي الكتابه هتبقى معياري للحكم على حالتي خفيت ولا لسه مريض بيه نسيته ولا لسه هو محور حياتي المهم يعني استغل كتاتبي علشان اصارح نفسي بالحقيقه واكشف لنفسي الواقع اللي عامل نفسي مش شايفه اتكلم عنه بصيغة الماضي علشان اتعود انه خلاص بقى ماضي مش واقع حواليه

بتحبوا بعض....... ايه الدليل

2008-05-21T15:11:00.002+03:00

بتحبوا بعض
يا كدابين بتحبوا بعض
ايه الدليل على انكم بتحبوا بعض
ايه اللي يثبت انكم دايبين في بعض
بتقولوا ايه
قال مشتاقين
ودي فيها ايه
لو مشتاقين يمكن يكون لأي شيء
مش شرط يعني تحبوا بعض
علشان يهب الشوق في قلبكم
بتقولوا ايه متقربين
ازاي يكون بقى قربكم
هو الدليل على حبكم
يا اغبيا
هو اللقا سر الهوى
بتحبوا بعض ده شيء كبير
محتاج دليل
وحاجات كتير
تثبت لنا وتثبت لكم
كده انكم بتحبوا بعض
عايزين تقولوا مالكش فيه
ازاي بقى
دا انا كلى فيه
وليا فيه
وحياتي بيه
وازاي اعيش من غير عينيه
ارجع يا واد منك لها
واتعلموا من عمكم
معنى الهوى
بصوا على عاشق قديم
غرقان لشوشته في الهوى
عنده الدليل مليون دليل
على حبه اللي مدوخه
مش زيكم
تايه ذليل
الحب لازم وياه يكون مليون دليل
لازم تدوق الويل وذله
تسهر دموعك فوق خدودك تلسعك
تسهر تنادي على القمر
تبعت معاه مليون سلام
يمكن كمان تسهر تحارب في الشيطان
وهو ماسك فكره واحده لحضرتك
ابعد وسيبها
دي مش تليق بحضرتك
تهجم عليه
تخرم عينيه
وتقوله هي مفيش كلام
هي الأمل
عايزين دليل
على اني فاهم ايه بقول
مش بس عامل فيه فالح والسلام
استنوا حبه هاقولكم
انا كنت بردك زيكم
محتار قوي
والشوق واخدني وهدني
والحيره ماسكه في النافوخ راح تخرمه
والشك فجأه مني راح
لما التقيت اسمي انكتب
على صفحه بيضا حنينه
الصفحه هي قلبها
وفي قلبها اسمي انكتب
وتحت اسمي اترسملي خط سير
روح من هنا
احود هنا
اطلع وعدي من هنا
وفي نهاية سكتك
توصل اكيد
لحته واسعه مبحبحه
تقعد وتتربع كمان
في عرشها
فاهمين يا بقره منك لها
بحبها

ومهما عدى على العيون
اشكال وناس بنحبها
بردك يا عمري بحبها
واشتاقلها
واحس هي لوحدها هاسملحها
تدخل وتقعد فوق عروشي وعشتي
فارس انا وبحبها

فارس انا دي بالعند في دوبه علشان بتتريق عليا اني بتكلم عن حصاني وقصري كتير البنت مش مصدقه اني كنت ابن السلطان بس انا اللي بتواضع معاكم يعني

التاج بتاع خيخه

2008-05-02T11:36:00.003+03:00

تاج الدكتوره خيخه

اذكر عشرة اشياء عن نفسك
1 - ايهاب سيد
2- مسلم
3 - خاطب غاده حبيبتي
عارف خيخه هتقولي بلاش حمرقه واكتب عن نفسك مش بطاقتك
طيب نقول تاني بقى
هاديء الطبع غالبا
لكن اتقي شر الحليم لما بتنرفز بتصرف بطريقه عصبيه جدا
بحب المزز جدا وبعتبرهم سلعه تقدم مجانا على الطريق
مش كل البنات طبعا
لكن كل واحده بتسمح لنفسها تتحول من انسانه لنوع من العروض المجانيه تبقى متستاهلش اني احترمها
بكره التحرر اللي من غير هدف
جبان ساعات قوي
مبحبش حد يستكردني ولما بحس انه بيستكردني بكرهه قوي وباديله على دماغه بس من بعيد لبعيد
وزي برده اللي يحاول يأذيني بدون داعي ومن بعيد لبعيد بروح انا اطلع افظع منه واخليه يندم انه جرب يطعني في ظهري
ساعات بكون لئيم قوي قوي
وكتير بكون متفاجأ
متفاجأ دي من تصرفات الناس لأني بحب ابص جوه الناس مش على المنظر من بره وبالتالي بشوف بلاوي جواهم
بحب اسمع من الناس كتير علشان ادخل جواهم قوي
حشري وفضولي جدا
مش عارف كده كام حاجه
بس انا خلاص مش عايز اقول حاجه تاني
كفايه كده
هاوصف نفسي اني امير ولو كنت حتى غفير
فارس واقف في ساحته حتى لو شرابي شاحته

سلاااااااااااااااااااااااااااام
بهدي التاج بقى ل كاميليا طبعا
هبه دوبه
سووووووووووو حبيب قلبي
لي لي
ابي بتنجان اموت واخليها تعترف بالحقيقه

الى الأسكندريه انشاء الله

2008-04-26T22:05:00.002+03:00

في رحله مكوكيه انشاء الله ليوم واحد اقضي يوم الأتنين شم الفسيخ في اسكندريه هربا من الحر وريحة الفسيخ وزحمة الدنيا واكتئاب الأعياد اللي مش عارف اخلص منه

ادعولي بقى اقضي يوم حلو مع فاخر صاحبي وعبده اخويا

عارف انه خبر شخصي قوي بس حبيت اشاركه مع اصحابي وحبايبي

انشاء الله لما ارجع اوريكم الصور

انا بحب اتصور قوي في اسكندريه بحس الصور بتحفظلي جزء من متعه اللحظه

اللي يحب يشوفني هناك في اسكندريه يبعت يقولي بقى

اشوفكم على خير

سلااااااااااااااااااام

حسن ................ مريم

2008-04-15T13:43:00.002+02:00

اليومين دول موسم الولاده الظاهر
احمد حسن صديقي العزيز قوي قوي خلف طفل جميل خالص ربنا يحفظهوله ويباركله فيه وسماه حسن وده على اسم باباه الله يرحمه
وجاري محمد وزوجته كانت زميلتنا في الجامعه خلف برده بنوته قمر واسمها مريم
الف مبروك للأتنين
ومبروك ليا انا كمان علشان كده هابقى عمو ايهاب بقى
والعيال دي طبعا لما تكبر هيقعدوا يقولوا عمو ايهاب جه عمو ايهاب راح وهابقى متصيت قوي
انا بفكر اخطب الواد حسن للبنت مريم من دلوقتي بقى علشان نبقى نسايب في بعضينا
عقبال الناس كلها بقى يخلفوا ويتجوزوا ويبقوا تمام التمام
عقبالنا جميعا
انا مبسوط قوي الخبرين جم مع بعض تقريبا وانا بصراحه مذهول لسه اصل فكرة الأطفال دي بتذهلني جدا يعني ايه حد يخلف
يعني ربنا كرمه بطفل ايوه يعني ايه بقى
يعني هيلاقي حد يقوله يا بابا ويا ماما وكده يعني
طيب ده الموضوع بقى هيبقى مسؤليه
مش احنا واحنا صغيرين كان بابا ده بيعرف كل حاجه في الدنيا وماما دي اشطر واحسن واحلى ست في الدنيا
بس انا لسه مش بقيت بعرف كل حاجه في الدنيا
ومش عارف هي مراتي هتبقى اشطر ست في الطبخ ولا لأ
طيب العيال كده هيتعقدوا بقى
وبعدين هو انا هاربيهم ازاي
يعني ايه اربيهم
اقولهم ده صح وده غلط ازاي
اذا كنت انا لسه بغلط كتير
ومش عارف ابطل وابقى زي بابا كده
طيب ما يمكن باب كان زيي كده وبعدين بعد ما خلف بقى حلو كده نقول يمكن طيب افرض انا مبعرفش اربي مش في ساعات مدرسين بيبقوا مبيعرفوش يشرحوا ممكن برده اطلع اب فاشل ومبعرفش ابقى اب دي وقعه ايه دي بقى
مش عارف, طيب اعمل ايه علشان اتعلم ابقى اب كويس
دوبه دايما تقول كلكم راع وكلكم مسؤل عن رعيته
يعني انا هابقى مسؤل عن رعيتي برده والمسؤليه مش ان انا اشخط فيهم وازعق واضرب العيال وخلاص المسؤليه اكيد حاجه كبيره قوي مش عارف وياترى هابقى قد المسؤليه ولا لأ
اتمنى انجح في الموضوع ده عموما مش هنسبق الأحداث هنستنى لما ابقى اخلف وبعدين اشوف ربنا يستر بقى
وربنا معاكم يا حسن انت ومريم واهلكم يعرفوا ازاي يبقوا بابا سوبر وماما سوبر

سلااااااااااااااااااااام

اعتصام وثوره .......... بس من منازلهم

2008-04-04T15:11:00.002+02:00

طول عمرها مصر المحروسه

حكام ظلمه وفراعنه بكل لون

جبابره ومقرفين

اموالنا بيسرقوها

وولادنا بيقتلوها

والغاز في بلدي راح

على ارض المجرمين

يتباع هناك رخيص

علشان عيون حبيبته

دي تاج فوق الرؤس

كلمتها لازم تطاع

مش عارفين هي مين

معقوله ده كلام

امريكا ست ابوها

وست كمان اخوها

وست اللي جابوها

بنبيع حديد وغاز

بترول وكمان ازاز

يمكن لما نساعدهم

في الخطه الجايه ليهم

يدونا حته برده

من الكحكه المستويه

مادمنا خلاص شاركنا

في قتل المسلمين

عرب ومسيحين

خلاص يبقى هناخد حته من فلسطين

بقينا شعب خاين

خاين لنفسه طبعا

علشان سمحنا ليهم

يكونوا واجهه لينا

مقدرش حد فينا

يقف يقول كفايه

والراجل اللي قالها

عملوله ميت حكايه

في السجن هناك رموه

من ودنه علقوه

وبكره هيقتلوه

وتقولوا هوبه قال

طول عمر بلدنا نايمه

والناس غلبانه خايفه

ويجي حبه منا

ينادوا بالشجاعه

يقولوا يالا بينا

نقف وقفة شجاعه

قدام كلاب جياعه

مفيش خلاص شجاعه

والناس تهرب تسيبهم

قوم هم ياخدوا بالهم

من الحبه الرغايين

ياخدوهم يسحلوهم

وبكره يرجعوهم

يا اما ناس جديده

يا اما على الحديده

في الصحرا يدفنوهم

او ممكن يرشو ابوهم

انا عارف بكره ممكن

نعمل وقفة شجاعه

قال يوم ما قلنا ثوره

هنقضيها في بيتنا

قالك ما تنزلوش

والشارع متشوفوش

والسوق متخشهوش

وشغلك متروحوش

وهم هيفهموا

قال ايه كده شجاعه

يا عالم ارحمونا

في النشره عرتونا

خلاص انا برده مالي

انا هاقعد جنب ماما

العب لي ماتش كوره

وهاسمع الأذاعه

وبكده راح اكون شاركت

في ثورة المياعه

اوعوا تقولوا انهزامي

لحسن هاقول لمامي

الشنكوتي اتهزأ يا رجاله.....ان ان ان اااه

2008-03-06T09:25:00.003+02:00

ده الكلام اللي جاني وهاقولكم كانوا بيقولولي كده ليه

"اولا انت شكلك تافة بتاع كلام وبس واحتمال غيران لان القصة نالت اعجاب وانت فاشل ما عملتش حاجة على الفاس اتشهرت كدا يابنى روح اعملك حاجة موفيدة وبطل غلاسة وهبل على الناس"

طبعا كلكم عارفين موضوع الكتاب اللي هبه اختي نشرته وكان اصلا في ناس سرقت فكرة السلسله بتاعت " يوميات اتنين مخطوبين عمر وساره" وعملت عليها اجزاء جديده ونسبوا القصه لنفسهم المهم يعني لقيت ان فيه ناس كتير معجبه بالسلسله والمشكله محدش عارف مين الكاتب الأصلي ولقيت في جروب على الفيس بوك عن القصه وبينزل فيه اجزاء جديده منها والموضوع منتشر وحاجه فللي ومفيش اعتبار خالص للكاتبه الأصليه وسلملي على حقوق الملكيه في بلد كا مافيها يدل على ان السرقه هوايه اكتر منها حاجه ملحه

المهم يعني انا اخدتني الحماسه ودخلت الجروب ده وكتبتلهم كلمتين عن الملكيه الفكريه وان ميصحش حد يسرق مجهود حد والكلام ده

راحوا هم بقى ردوا عليا على اختلاف ارائهم كل واحد اداني كلمتين منهم ناس محترمه جدا اتناقشت بالزوق ومنهم ناس بجحت ومعندهاش اعتراض على فكرة السرقه على اساس ان بما ان مفيش قانون يمنع يبقى عادي ايه يعني القصه حلوه مسروقه مش مسروقه مش مهم زي برده اللي يقولك الفلوس حلوه مسروقه مش مسروقه مش مهم المهم ان يجيني فلوس هي دي المصيبه الناس مبقاش عندها فكره عن يعني ايه حرام نسرق مجهود غيرنا في اشغالنا مع زمايلنا في دراستنا حتى تلاقي كتير نفسهم يسرقوا مجهودك دايما ويفرحوا بنسبه لأنفسهم المهم يعني من ضمن الردود اللي جائتني ردا على كلامي هو الجزء اللي انا حطيته فوق ده وانا حبيت اوريكم بس ان ساعات ناس تدافع عن الباطل بحماسه وكأن هم اللي صح وانا اللي مجنون وبتكلم عن اوهام واحلام

وناس تسألني وانت مالك انت تتكلم ليههي هبه كانت اشتكتلك اصلهم ميعرفوش اني اخو هبه المهم شرحتلهم اني اخوها واني عارف ان محدش استاذن منها قبل ما يسرق الفكره ومستني بقى ردهم دلوقتي وهابقى اعمل تحديث بالرد لما يجي لو حد منكم مشترك في الفيس بوك ممكن يبقى يدخل يتفرج

http://www.facebook.com/group.php?gid=6635933057

ده اللينك بتاع الجروب بتاعهم

ابقوا اتفرجوا على باقي حلقات الصراع

كان معكم من اهدى مكان في الأرض

حازم فوده من باريس

سلاااااااااااااااااااااااااااااااااااام

نفسي الاقي بيتنا....بعد ماسبتك عند المترو

2008-02-29T17:17:00.004+02:00

تحديث
انا كاتب حاجه خياليه مش واقعيه يعني غ مش بتشرب سجاير ولا انا كمان يا جماعه
ومبحبش شرب البنات او الرجال للسجاير عاده مش لطيفه خالص
لكن هو الكلام جه كده على اساس القصيده اللي انا اتأثرت بيها وكتبت الكلام ده

انا كنت في مدونه همسات

وعجبني قوي بوست هناك

فعملت فيها الشاعر العالمي ورحت كاتب كلمتين من نفسي يا جماعه

اشمعنى انا يعني اصله بصراحه فكرني لما بوصل غاده للبيت واسيبها عند المترو

واقف جنب المترو بفكر
يعني خلاص هتسيبني وتمشي
اصل خلاص المترو هيجي وهي هتركب
يمكن ترفض تركب فيه
يمكن تلقى المترو زحام
تصبر تاخد واحد تاني
وانا هاستنى معاها المترو لحد مايجي ياخدها ويرحل
هافضل اسرح ويا المترو لما هيمشي وهي معاه
هافضل افكر لما هتوصل مين هيكون على بالها كلامه
مين راح يشغل بالها خيالها
فجأه لقيتها مدت ايدها على جيب جاكتي
اخدت منه الولاعه
وحتى سجايري اخدت واحده
بين شفايفها اتغرس الفلتر
طرف سيجارتي ناره تنور
كنت اتمنى ابقى مكانه
لكن نار اشواقها وحبي دي بتحرقني
خفت عليها
مسكت ايديها
اوعي يا عمري تأذي شفايفك من دخاني
اوعي وحاسبي بنت جميله رقيقه في سنك
ليه بسجايري تلوثي نفسك
شفت في عينها نظره عارفها
جوه عيوني في اخواتها
نظره وكلمه قاللولي حكايتي هي حكايتك
وجه المترو وركبت جنبي
انا مقدرتش اسيبها وامشي
رحت معاها لحد شارعها
وهناك شفت البيت والناس
وهناك تهت من الأحزان
اصل لقيتها بتجري سابتني
راحت على باب بيتها ودخلت
وانا من يومها بعدي استنى يمكن تخرج كده بالصدفه
او يوم حتى اسمع صوتها
انا ملحقتش امسك ايدها انا ملحقتش ادوق شفايفها ولا خدودها
بكره هيجي اليوم واشوفها
والمس ايدها
بكره هتيجي واشوفها واخدها جوه في قلبي
لكن لما انا شفتها بكره
ولا قلتلها ولا خبتها جوه عيوني
ولا حتى قدرت اكلمها وافهمها
كل اللي قدرت اني اقولهولها
اني امبارح بعد ما سبتك
تهت في شارعك
واني لحد اليوم ولبكره هفضل ماشي ادور يمكن اعرف ارجع واوصل بيتنا

اتمنى يكون عجبكم وميكونش سخيف قوي يعني

سلااام
==============

تحديث تاني
ده تعليق كاميليا اختي ربنا يسعدها

"لما المترو اتحرك بيا
حسيت حاجة خطفت قلبى
وصورة حلوة جوا عنيا
وشوق وحنين مقدرتش اخبى
ولاقيت نفسى بطلب رقمه
عايزة احس انه معايا
رد عليا .. همست باسمه
ضحك وقالى احنا حكايا
قولت وحشت قلبى طيب
قالى ياريتنى كنت قريب
قولت تعالىقالى ياريتنى كنت معاكى

كاميليا

هبه اختي نشرت الكتاب وهتعمل حفل توقيع تعالواااا

2008-02-21T09:49:00.003+02:00

واخيرا وبعد طول انتظار

كتاب يوميات اتنين مخطوبين نزل يا رجاله في المكتبات والمحلات
متوافر بمكتبة عمر بوك ستور

مكتبة مدبولي

الديوان بالزمالك

مكتبة ساقية الصاوى

وكمان حفل توقيع في: عمر بوك ستور
15 شارع طلعت حرب فوق مطعم فلفله ( عند محطة مترو السادات
من الساعه 6 مساء الى الساعه 9 مساء
وذلك يوم الجمعه الموافق 22 فبراير 2008

وقناة OTV هتيجي تصور حفل توقيع الكتاب
والدعوه عامه وهنبقى لمه
تعالوا شرفونا واحضروا معانا اللحظه دي
كلكم مدعوين

تحديث

الحفله تمت الحمد لله على خير

وحضر معانا ناس كتير حلوين

صحيح OTV اعتذروا ومحدش جه لكن فيه واحد صحفي من الدستور جه حضر معانا

واجمل حاجه ان لي لي جت حضرت معانا

عقبال كل الناس لما تنشر كتبها كده

2008-02-11T08:58:00.000+02:00

هو احنا ليه بنكره بعض

سؤال دار في بالي من فتره وكل شويه يعدي قدامي موقف يخليني افكر فيه اكتر
انا افهم ان الناس تحقد على بعض في الشغل و في المرتبات والفلوس وكده يعني انما دايما بيكون في سبب
النفس البشريه كده طماعه وانانيه الا من رحم ربي

جميل وعادي واتعودنا عليه
بس المشكله ان الناس بقت بتحقد على بعض ويكرهوا بعض كده على طول من غير اسباب

يعني تلاقي واحد جاي الشغل جديد لسه معملش بتلاته مليم وبيحقد على الناس القديمه ويقولك انا عايز فرصتي زيهم وتلاقي الناس القديمه بيحقدوا عليه ويقولك ايوه يا سيدي ده جاي على الراحه احنا ابتدينا الشغل في المرمطه وهو جاي بعد ما الشركه استقرت

طيب ده برده عادي وفهمنا اسبابه

لكن تركب الميكروباص تلاقي الناس بتبص لبعض بغل كده وبدون سبب
وتلاقي بنت ركبت –سيبك طبعا من المزز اللي البنطلونات هتتفرتك عليهم دول لازم يقفوا علشان نعرف نتفرج على جسمهم كويس- المهم بتبقى بنت محترمه ولابسه محتشم وواقفه يا عيني هتتفعص وسط الناس وتلاقي الرجاله والشباب وبالذات الرجاله تلاقي الواحد متنح كده وواخد الكرسي واستحاله يقعدها ويقف لها ويقولك ايه اللي بينزلهم اصلا من البيوت يزاحمونا مع ان هو برده بنته نزلت الصبح معاه تروح شغلها
وتلاقي الواحد بعد ما كان زمان اللي مش عايز يقف ويقعد البنت او الست تلاقي عينه في الأرض او باصص من الشباك عامل فيها عبده العبيط
انما دلوقتي تلاقيه مبحلق فيها كأنه هيقولها حاجه وهو متنح بيتفرج عليها ناقص يقولها ورينا بقى الحركه السحريه واقعدي في الأرض او الزقي في السقف علشان نسقفلك

النهارده مثلا لقيت بنت ركبت الميكروباص بتاع الهرم ده والميكروباص عامل زي علبة الصلصه البايظه هيفرقع ناس والبنت واقفه هتنكفي على الأرض لولا الزحمه سانداها وواحد راجل قاعد جنبها بيبصلها هاموت واعرف متنحلها كده ليه الأول افتكرته هيقفلها وبعدين لقيته هو بيبصلها يتفرج عليها وهي مزنوقه اهي لو كانت لابسه محذق وملزق كنت عذرته انما كانت لابسه عادي يعني رايحه الشغل واضح
المهم فجأه واحد قاعد على الحته اللي في ضهر السواق حديده معفنه كده قام وقالها تعالي اقعدي هنا احسن

وقبل ما تعرف توصل واحد راجل ناصح هوب جري قعد هو- قال يعني مش واخد باله -هي ابتسمت وقالتلهم خلاص خلوه مستريح المهم فقت انا من السرحان والتأملات الهبله بتاعتي وقمت قعدتها مكاني

مش بس كده تعالوا اتفرجوا في عربية السيدات في المترو استحاله واحده تقف لحد غيرها
كل واحده حاسه انها اكتر واحده تستحق تقعد وتلاقي بيعاملوا بعض بغتاته وخنقه وكأن كل واحده بتكره التانيه طب لييييييييييه

الرجاله بقت بتكره الستات
والستات بتكره الرجاله
والرجاله بتكره الرجاله
والستات بتكره الستات
ممكن حد يقولي فاضل مين يحب مين

وشكرا

الموبايل ضـــــــــــــــــــــــــاع ..............عااااااااااااااااااااااااااااء

2008-01-27T08:49:00.000+02:00

الحمد لله

يوم الجمعه صحيت من النوم عايز انام خمس ساعات كمان

بس لازم انزل اروح الشغل علشان عندي كوم متلتل هناك وبالمره اعمل اضافي

واهو بدل ما اجي يوم السبت اخد كلمتين على الشغل المتعطل

-صحيت لقيت ابويا مش رايح بدري قاللي انا هاجي بس متأخر شويه

قلت مش مشكله انزل اروح بالمواصلات وبالليل نرجع سوا بالعربيه يبقى مفيش مشكله حلو برده

وفعلا جهزت ونزلت

-وبعد ما ركبت التوك توك الجميل ومشيت اكتشفت اني نسيت الموبايل في البيت فقلت للواد ارجع يا ابني تاني نسيت حاجه فرجعت جبت الموبايل من البيت -خدوا بالكوا كويس رجعت جبته بنفسي- المهم ركبت ونزلت في الميدان ركبت الميكروباص ومنه نزلت في الجيزه

- بحط ايدي على جيبي ملقيتش الموبايل امسك يا جدع الميكروباص لقيته بيلف من بعيد ومش هيجي تاني من هنا غير بعد شويه كتير طيب اعمل ايه بسرعه واحد من السواقين قالي اديني النمره نتصل على الموبايل قبل ما حد يقلبه وطبعا كان الخط اتقفل خلاص الناصح اللي لقى الموبايل او اللي سرقه بقى قفله فورا قبل ما الحق ارن عليه وخلاص كده عليه العوض يا ساتذ نصيبك كده قلت خلاص قدر الله وما شاء فعل

ورحت الشغل لقيت الدنيا مكركبه ومفيش حد حتى اخد منه كوباية شاي في البوفيه

-واكتشفت اني كان المفروض اشتري اكل من الطريق علشان الكافتيريا هنا قافله يوم الجمعه فمفيش اكل لحد ما بابا يجي او لحد ما اروح

-وطبعا ابويا كلمني قالي انه مش جاي النهارده تعالى انت بقى

-فقلت الحق عربية الشركه اركب فيها بدل بهدلة الصحراوي في يوم الجمعه وفعلا ركبت معاهم

-بس اكتشفت اني نسيت اختم على البوابه قبل الخروج يعني هتكتب مجتش قلت انزل جري الحق اختم

-يقوم ايه بقى يقولك خلاص العربيات هتمشي واول ما حطيت رجلي بره العربيه قفلوا الباب وطلعوا كلهم وسابوني

والحمد لله رحت على الطريق لقيت ميكروباص اتزنقت فيه كده وخلاص

-جينا في الرمايه الواد اللي جنبي قالي لو سمحت انزل علشان اعرف انزل قبل ما الأشاره تفتح وفعلا نزلت ويادوب لسه ماسك الباب الأشاره اتفتحت والسواق انطلق فورا وانا ايه بقى متشعلق بأيدي وسناني في الباب وطبعا اترزعت في الباب رزعه حلوه كده ودخلت العربيه عايز اكل زمارة رقبته

وقعدت ازعق في السواق وهو متنح كده مش مصدق اني بشخط فيه اصله من الأشكال اللي الواحد في العاده بيتجنبها تماما بس كنت جبت اخري اصلا

المهم نزلت من الميكروباص وركبت من الهرم للجيزه فطبعا قعد جنبي شوية عيال راكبين مع امهم وليه رخمه كده سابتهم وطفشت قعدت ورا خالص وهم قعدوا جنبي او بمعنى اصح على حجري وقعدوا يصرخوا وبضحكوا ويفركوا لما كنت هاعيط من الغيظ

ولما نزلوا كنت عايز احدفهم بالطوب من الشباك

وصلت البيت الحمد لله دخلت بسرعه على السرير وقلت لأمي انا هنام لحسن حاجه تحصل تاني بقى

انا فاضلي شعره واحدف العيال بالطوب في الشارع

وقبل ما انام قلت اكتب البوست ده قبل ما انسى بس اكتشفت ان الكمبيوتر بيعلق وصفخة الأكسبلورر بتقفل لوحدها فمعرفتش اكتب حاجه

بس النهارده الحمد لله عرفت اكتب اهو

وبعدين قبل ما انام ساعتها فكرت في حاجه غريبه قوي

لما سيدنا موسى كان مع الرجل الصالح في سورة الكهف

وكان عمال يحصل قدامه حاجات عجيبه وهو شايف انها اذى كبير للناس بس هي في الحقيقه خير ليهم عظيم ميعرفوش مقداره ايه

فكرت ان الناس اللي مصدر رزقهم اتعطل بتخريبه للسفينه اكيد زعلوا قوي على مصدر رزقهم

يبقى الواحد المفروض ميزعلش ويقول الحمد لله قضاء اخف من قضاء

والحمد لله على كل شيء

ملحوظه

طبعا انا كده فقدت كل الأرقام اللي كانت عندي ولسه هادور على العقد علشان اوقف الخط القديم واجيب شريحه تانيه وموال كده

لما يبقى يخلص ابقوا الله يستركم تدوني ارقامكم اللي ضاعت مني

وعليه العوض ومنه العوض

سلااااااااااااااااااااااااااااااااام

فازه مكسوره

2008-01-21T16:58:00.000+02:00

عيل صغير بيلعب خبط بالكوره بتاعته الفازه الفخار وقعت اتكسرت ميل عليها لمها على بعضها لزقها بشريط قص ولزق ساذج قوي
الفازه اتجمعت بس بقت متشوهه خالص
الطفل بص ليها وقال الحمد لله صلحتها علشان ماما متزعلش
بس تفتكروا هو كده صلحها فعلا وياترى مامته هتنبسط قوي بانه صلحها كده
مع انه عكها خالص
بس هو مكانش ممكن يعمل اكتر من كده مفيش حاجه بتنكسر بترجع زي الأول بالظبط
انما يعني على قد ما بيقدر كل واحد فينا بيصلحها كده ويلصمها على ما تفرج يعني لزقه هنا وسناده من هنا وكلمتين اسف من هنا
واهي الحياه بتمشي

بس يا ترى الزهريه هترجع تاني زي الأول زهريه جميله وشيك ولا خلاص كده اللي اتكسر مش ممكن يبقى جميل زي الأول ويا ترى هو فعلا مصدق ان هي كده بقت حلوه وكويسه وانه ادى واجبه ناحية الزهريه دي
مش عارف

ناس كتير بتعمل مواقف فظيعه وبعدين تصلحها بكلام عبيط ميفيدش ببصله لكن اهي بتريح ضميرها
اعذرني سامحني مكانش قصدي
انا عارف ان المسامحه والمغفره حاجه عظيمه وكل واحد لازم يكون قلبه كبير ويساع الناس ويعرف ان مفيش حد مبيغلطش
بس

ليه من البدايه نلعب بحاجه قابله للكسر كده

ليه من البدايه نمد ايدينا على حاجه مش من حقنا على حاجه مش هنعرف نحافظ عليها

يمكن طمع يمكن غرور ويمكن حاجات كتير الأسباب كتير بس ياترى في الأخر الفازه استفادت ايه دلوقتي عمالين نتكلم من غير ما نقدم حل مفيد للفازه
فكروا معايا يا جماعه ايه الحل اللي ممكن نعمله لكل فازه اتكسرت
على الأقل ياريت كل واحد مننا يقابل فازه متلصمه يحاول ميفكرهاش ويشاورلها على الشروخ
ياريت متسألش مين كان السبب
ياريت لو قدرت تداوي الشروخ ومعاك معالج للفازات متبخلش بيه
ساعات كلمه منك
وقفه شهامه
كتف صديق وفي
بيكونوا علاج مفيد قوي للشروخ اللي اتسبب فيها طفل غبي بيلعب بكورته وخبط الفازه

سلام

يا سلام لو نبطل نكدب على نفسنا

2008-01-10T09:39:00.000+02:00

ساعات بنحب نضحك على نفسنا قوي

كل واحد شايف نفسه افضل الناس وكل واحد شايف ان اخطائه دي حاجه بسيطه وعاديه جدا ايه يعني كل الناس بتغلط ده انا اللي بعمله ده حاجه بسيطه جدا انتم مش بتشوفوا الناس بتعمل ايه والمصيبه ان الناس بقت بتتفاخر بالغلط فالبتالي اللي بيسمع يقولك الحمد لله انا يا عم كويس قوي كده ومحترم جدا

تلاقي مثلا الزوجه الخاينه وده اشنع صوره الست ممكن تتخيل نفسها فيها
فتلاقي كل ست مش بتخون جوزها مع راجل تاني فرحانه قوي انها ست شريفه وعمرها ما كانت ست خاينه مع انها ممكن تكون بتخونه بصوره تانيه مش شرط تنام في السرير مع راجل تاني علشان تبقى بتخونه ساعات الخيانه مش بتكون جنسيه بس ممكن تخونه وتبيع افكاره ايوه بجد ممكن واحده تاخد افكار زوجها وتنسبها لنفسها او لحد تاني عزيز عليها او هيدفعلها مقابل كويس دي برده خيانه وممكن تخونه لما تكشف اسراره لصاحبتها الأنتيم وتقولك انا عمري ما خرجت سري بره بيتي مع ان صاحبتها استلمت منها السر وبكل نيه خالصه راحت تحكي لأمها وامها تحكي لزوجها ولأختها واللي طبعا هتحكي لزوجها وعيالها واللي هم كمان هيحكوا لأصحابهم ويا سلام بقى على التسلسل بتاع القنبله لما تفضل الناس تحكي لبعض لغاية ما تلاقي سر بيتك جايلك من اذاعة اليابان تصحى من النوم تلاقي مذيع ياباني واقف بيتكلم ويقول "هذا وقد تردد في الأوساط المصريه ان حضرتك نسيت تشتري هديه لحماتك في عيد الأم او انك يوم الخميس صحتك كانت مش ولابد فالبتالي لم تقم بواجباتك كما ينبغي
تلاقي الناس بتتكلم مع بعضها عن اسرارها كان مفيش اسرار خلاص ويرجع يقولك الدنيا مفيهاش امان

عندك مثال تاني الراجل اللي شايف نفسه مصلح الكون طبعا الدعوه واجب كل انسان مسلم لكن برده مش معنى كده تفرض على الناس رأيك وكأنك العالم الوحيد في الكون وتلاقي الواحد منهم عمال يشخط فيك ياجاهل يا فاسق يا ســـــــــافــــــــــــــــــل
ويقولك اصلك بتهمل في شغلك واصلك بتستغل ممتلكات الشركه لأغراض شخصيه واصلك وفصلك وطبعا مش عايز اقولك ان هو غالبا بيعمل اكتر منك بس هو ناصح بيعملها في صوره سليمه بيظبط نفسه برده بس في السليم

وحتى المدونات اللي الواحد قال اخيرا هنهيس ونرغي بحريه تلاقي واحد مش عاجبه اسلوبك خالص وده طبيعي مش كل الناس بتتفق على حاجه واحده لكن اللي مش طبيعي انه يهينك ويهينك قوي كمان وطبعا هو مطمن انك مش هتعرف تجيبه من قفا امه وتديله العلقه التمام على طولة لسانه دي ده برده يودينا لناس تانيه

اللي بيعتمد على نقطة انك مش عارفه ويئذيك كده بدون سبب لمجرد انك مش عارفه ومش طايله تلاقي واحد كسر اي حاجه من حاجاتك وبدون داعي خالص مجرد انه عارف انك مش هتعرفه او يشتمك من على الشات او الميل او يبعتلك فيرس هديه
او يديك زمبه حلوه عند رؤسائك

واحد تاني بياذي نفسه ومش بيئذيك انت وده اللي بيضحك على نفسه
معايا واحد في الشغل نفسه يعينوه بمرتب كويس ويتعمله عقد ويتظبط كده ومع ذلك يقولك لو مش عملولي العقد بمرتب كويس هامشي واروح حته تانيه الشغل بره على قفا من يشيل اقوله ايوه يا حبيبي على قفا من يشيل بس كل واحد وامكانياته يعني حضرتك معندكش خبره في حاجه ومعندكش لغه خالص والكمبيور بتعرج فيه بالعافيه يبقى حضرتك هتشتغل بره ايه بتاع بليله

مش عارف هي المشكله ان الناس بتحب تضحك على نفسها ولا هو نوع من التعامي عن الحقيقه علشان نهرب من الواقع المر ولا ايه بالظبط

طبعا مش عايز انسى اشهر واقوى مثال الراجل الخاين اللي بيعمل كل المنكرات ويقولك لا انا عمري ما نجست بيتي قال يعني هو مادام بيخرب الدنيا بعيد عن البيت يبقى كده كويس ويقولك دول غانيات يعني ليله وبتعدي وانا بحب مراتي ومش بخونها تقوله ازاي يقولك اخونها دي لما احب واحده تانيه عليها واعمل معاها علاقه يعني تقوله والستتات اللي انت عامل معاهم علاقه يقولك لأ دول علاقات عابره كده نزوات يعني
اموت واعرف مين اللي ابن الكلب اللي قالهم ان كلمة نزوه يعني حاجه سهله وممكن مراته تسامحه عليها لأنها نزوه يعني غصب عنه ومؤقته وتعريف جميل قوي
يخليني عايز اروح اشوف موضوع النزوه ده
وختاما ياريت نبطل نضحك على نفسنا كل واحد يشوف اخطائه وعيوبه ويعرفها كويس يمكن لو معرفناش نمحيها على الأقل نقللها شويه