الأحد، ديسمبر ٢١


بيقولك ان الدنيا دي زي البطيخه بالظبط

خضراء من الخارج

حمراء من الداخل

وفيها بذر اسود كتير

ومحدش يسألني تقصد ايه بده

لأن كل واحد حر يشوف الدنيا بالطريقه اللي تريحه

انا شايف الدنيا زي البطيخه ودي حريتي الشخصيه

بس ايه هو تعريف البطيخه اصلا

قشره صلبه او شبه صلبه اصلها مش معدن يعني

ودي هي المعوقات اللي بنقابلها في دنيتنا واللي بتعوقنا عن اننا نوصل لأهدافنا الحمراء المسكره اللي جوه البطيخه ده طبعا حسب اعتقادنا لأن ممكن البطيخه تكون من جوه قرعه ولا مؤاخذه يعني فتلاقي نفسك تعبت على الفاضي في الأخر واللي حسبته مسكر يطلع ممرر ولا ايه

اما بقى بعد المجهود والتخلص من القشره الصلبه محدش يفتكر ان التعب في دنيتنا بينتهي بتحقيق الحلم والوصول لتتر النهايه في الفيلم

حتى وانت عايش الحلم وعلى افتراض انه طلع احمر ومسكر وزي الفل بس برده لازم لازم تلاقي جواه بذر اسود كتير

لأ وايه اسود اسود يعني مش اي كلام وفي كل حته ويخليك متعرفش تزلط حته مسكره على بعضها هو كده مينفعش حاجه تبقى خالصه مخلصه ابدا

لكن لما تفكر شويه كده وتفتكر مامتك ايام الصيف بعد العصر لما بتحمر اللب بتاع البطيخه وتجيبه تقزقزوه انت واخواتك زي القرود في الجبلايه هتعرف ان حتى المشكلات بتاعة البذر دي ممكن لو عرفت تتعامل معاها صح هتحولها لتسليه مش بطاله


وعلى طريقة البنت خيخه نطلع من الموضوع ده بأيه

ان الدنيا زي البطيخه ده اكيد

ان الأهداف المسكره لازم تكون متحوطه بجدران شبه صلبه يمكن اختراقها بالعمل والمثابره

ان الحياه فيها مشاكل سوده كتير بس بالتفكير السليم ممكن تتغلب عليها وتكون حياتك بدون مشاكل


وسلام بقى ادعولي

هناك ١٥ تعليقًا:

انسانةعادية فى عالم مش عادى يقول...

بوست جميل جدا وتشبيهات حلوة جدا تسل ايديك ويارب كل انسان يقدر يتغلب على البذر الاسود فى حياته علشان يوصل لقلب البطيخ :)

(صندوق الدنيا) يقول...

فكرة لطيفة
وربما أجد الدنيا هي الأرض ونحن البطيخ
وكل منا يشقى برأسه...أأقصد بقشرته الصلبه
فلا يرى إلا صلابتها رغم أنها تحوى العسل...وأحيانا الشهد
نسأل الله أن يرضينا بما فينا وبما فسمه لنا
وأن يعيننا على ما ف الدنيا من بلاء وإبتلاء
جزاكم الله خيرا كثيرا

princess يقول...

بس مفيش بطيخ فى الشتااااااااا
الفكرة وصلت

الـسـيـدة نـون يقول...

اللى فهمته
ان سيادتك
وقعت فى بطيخة قرعة
وربنا يطلعك منها على خير

كاميليا بهاء الدين يقول...

هقولك حاجة بس مش تضحك ..

عجبتنى أوى أوى فلسفة البطيخة دى ..

والتشبيهات اللى فعلاً فى صلب الموضوع ..

كالعادة .. لقلمك مذاق خاص ..

دمت بكل الخير

عام سعيد عليك وعلى حبيبك ..


تحياتى

حاسوباتيه يقول...

هههههههههههه الي اعرفه ان بيقولوا ان الجواز هو الي عامل زي البطيخه لتطلع قارعه لتطلع حمرا اما ان الدنيا بطيخه فدي نظريه جديده
بس نظريه حلوه فعلا

حروف يقول...

ربنا يستر علي البذر الكتير حوالينا بذرة تكعبل بذرة توقع وبذرة تكسر وبذرة تعلم وبذرة نعدي منها بسلام يارب يكرمك ويوفقك وانت فينك مش باين بقاللك فترة سلام يا جميل

TIMMY !! يقول...

علك عكسك تماما ..
أرى إن الحياة حاجة رخمة , و احنا اللي بنحط أهداف موهومة علشان نعديها و نقضي وقتنا و نعمل لها طعم و هي مالهاش طعم ..

أنا نفسي أعرف الناس المثابرة و المجتهدة دي مصدقة نفسها بجد ؟؟

حروف يقول...

ميرسي تعليقك عندي علي طير مسافر كويس ان عجبك الموضوع واسلوبي بس انت مجتش عندي ليه في القديمة ويارب تكون بخير

انا حره يقول...

من جوه قلبى

بجد متشكره اوى

Ehab يقول...

انسانه عاديه في عالم مش عادي

اسمك طويل قوي
قولي عجبه وخلصينا

هههههه

ربنا يكرمك متشكر على التعليق الجميل وياريت فعلا فعلا نقدر نستمتع بقلب البطيخه براحتنا

نورتيني

-------------------

ام البنين

اسمك جميل قوي
ربنا يحفظهم ليكي
ربنا يرضينا بما قسمه لنا
جزاكي الله كل خير على تعليقك وكلامك

----------------

البرنسيس
كويس انها وصلت ياربنسيسه
وبعدين مفيش بطيخ في الشتا ليه بقى دوري كويس هتلاقي وربنا يخليلنا الصوب والبطيخ الأسرائيلي
هههههههههههههه

-----------------
بنت خيخه و.. كلام

قرعه ايه يا زلبطه انتي
انا بس حبيت اشرح الفكره بكل جوانبها وجايز فعلا يكون في بطيخه قرعه في حياتي لكن الحمد لله في حواليا بطيخ احمر كتير وهم اهم تسلمي على الزياره يا اختي

===================

كاميليا

عام سعيد عليكي وعلى طبيبك الخاص
هههههههههههه

الحمد لله ان الموضوع عجبك انا كنت حاسس اني ابتديت اصدي ومعنديش افكار بس دي كانت فكره قديمه عندي فقلت اكتبها واشوف

نورتيني جدا جدا

-----------------------

حاسوباتيه

الجواز كبطيخه هو فعلا تشبيه معروف لكن انا حبيت اوسع النظريه واخليها شموليه اكتر - حلوه شموليه دي- والحمد لله انها نظريه مسكره

-----------------------


حروف دلو مره ثانيه وجرح ثاني سابقا

انا مش عارف ايه حكاية السامي الطويله دي
متقولي انت والنجوم وخلاص

ما علينا
حلو قوي تعليقك حددتي انواع البذر بالظبط وفهمتي قصدي
تسلم اضافتك منوره كعادتك
-----------------

TiMmy

هههههههههههههههههههه

ايه بس اليأس ده يا واد لما قريت تعليقك جريت اشوف مالك وفتحت مدونتك لقيت فيها بوست جميل قوي قوي
وعرفت انك بخير بس الحكايه كلمتين في ساعة زهق طمني عليك
منورني يا برنس

---------------------


حروف دلو مره ثانيه ومعرفش ايه سابقا

يا بنتي شوفيلك اسم مختصر شويه بقى حرام عليكي

يا ستي الموضوع كان تحفه مش محتاج اقولك طبعا وانا طبعا دخلت المدونه التانيه بس البوست طووووووووووويل قوي وعلشان ارد عايز ساعه كمان فدعيت عليكي في سري ومشيت
هههههههههههههههه

بجد انتي فنانه بس ابقي بطلي التطويل ده هيجرالي حاجه بالراحه علينا يا فنانه

----------------------

انا حره

من جوه ودني بقولك
لا شكر على واجب يا معلم
المهم انك بخير دلوقتي خدي بالك من نفسك قوي ومتخضيناش عليكي

---------------------


منورني كلكم دايما

سلاااااااااااااااااااااااااااام

اخوكم ايهاب

البت المشمشية حلوة بس شقية يقول...

ايه التشبيهات الحلوة دى
بس هو فيه بطيخ بيطلع فى الشتا ولا انتا مخزنو تحت السرسر يا لئيم

Kiara يقول...

ربنا معاك الاول ده الاول

طيب لو البطيخه طلعت مش حمرا

يبقي نشوف بطيخه تانيه مثلا ولا التصرف ازاي ؟؟؟؟؟

-_- يقول...

ربنا يحمر بطيخك ..

قول امين ..

تحياتي يا باشا

فارس الحسناء يقول...

تشبيهك للدنيا عاجبني قوي

ونظريتك من وجهه نظري صح

بس انت شكلك كده فعلا وقعت في بطيخة قرعة

تحياتي ليكي